تاجىكستان ازاماتتارى ءوز جەرلەستەرىن ۇرلاپ، اقشا تالاپ ەتكەن، – دەپ حابارلايدى Almaty-akshamy.kz.
32 جاستاعى م.ەسىمدى تاجىكستان ازاماتىنىڭ جوعالىپ كەتكەنى تۋرالى پوليسياعا ونىڭ جەرلەسى ارىزدانعان. ەر ادامنىڭ ايتۋىنشا، م.ەسىمدى ازامات 13 تامىزدا دوسىمەن كەزدەسۋگە كەتىپ، قايتىپ ورالماعان.
– جەدەل تەرگەۋ توبى قۇرىلدى. ق ر قك-نىڭ 125-بابى (ادامدى ۇرلاۋ) بويىنشا قىلمىستىق ءىس تىركەلدى. ەڭ الدىمەن، م.ەسىمدى ازاماتتى ۇرلاپ كەتكەندىگىن، سودان كەيىن ءبىز ونى قاي جەردە قاماۋدا ۇستاعانىن بىلدىك. جالعا الىنعان پاتەر الماتىنىڭ مەدەۋ اۋدانىندا ورنالاسقان. پوليسيا ارنايى جاساقتارىنىڭ كومەگىمەن ارنايى ءىس-شارا جۇرگىزىلدى. 20 مىڭ دوللار كولەمىندە وتەماقى تالاپ ەتۋ ءۇشىن وتانداسىن ۇرلاپ كەتكەن تاجىكستاننىڭ التى ازاماتى ۇستالدى. ولار ونى ۇرىپ-سوعىپ، بۇكىل پروسەسستى ۆيدەوعا تۇسىرگەن، – دەيدى الماتى قالالىق پد ۇيىمداسقان قىلمىسقا قارسى كۇرەس باسقارماسىنىڭ باستىعى جانات نۇرعالييەۆ.
كۇدىكتىلەر ۋۇي-عا قاماۋعا الىندى. ق ر قپك-نىڭ 201-بابىنا سايكەس، وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.