جاسىل جەلەكتىڭ قامقورشىسى - دارىگەر حوۆين

كۇن سايىن ول اۋلاسىنداعى اعاشتار مەن گۇلدەردى سۋعارىپ، قاراپ جۇرەدى.

قىسى-جازى الماتىنىڭ تۇرعىنى ۆلاديسلاۆ حوۆين ءوز اۋلاسىنداعى اعاشتار مەن گۇلدەردى باپتاۋمەن الەك. بيىل جاز ىستىق بولعاندىقتان، ونىڭ جۇمىسى قيىنداي تۇسكەن، سول سەبەپتەن تاڭعى 4-تە تۇرىپ، اعاشتاردى سۋعارا باستايدى، دەپ حابارلايدى Almaty-akshamy.kz ءتىلشىسى.

ونىڭ اۋلاسىندا وسەتىن اعاشتار مەن گۇلدىڭ ءتۇرى كوپ. بيىل بۇل وسىمدىكتەردىڭ سانى دا، ءتۇرى دە كوبەيە ءتۇستى، سەبەبى ول الماتى اكىمشىلىگى ۇيىمداستىرعان شارا ناتيجەسىندە تەگىن اعاش كوشەتتەرىن العان.

«كوكتەمدە ينتەرنەتتەن الماتى اكىمشىلىگىنىڭ اعاش كوشەتتەرىن تاراتاتىن اكسياسى تۋرالى وقىدىم. ءسويتىپ، 20 اعاشتىڭ كوشەتىن سۇراپ الدىم، وندا تەك قۇس شيەسى عانا (چەرەمۋحا) قالىپتى، وتىرعىزعان اعاشتارىمنىڭ بارلىعى دا كوكتەدى. جەكە ءوز باسىم ۇيىمداستىرىلعان اكسياعا ريزا بولدىم»،– دەيدى الماتىلىق. 

قازىرگى كەزدە ۆلاديسلاۆ حوۆين وسى اعاشتار مەن گۇلدەردى باپتاۋمەن كەلەدى. الايدا قالاداعى وزگە وسىمدىكتەرگە جۇرەگى اۋىرادى، سەبەبى اعاشتار كەي جاعدايدا سۋعارىلماي قالادى. 

«مەن ساعان 4.30 تۇرامىن، ءسويتىپ، اۋلاداعى بارلىق وسىمدىكتەردى سۋعارامىن. 2-3 كورشىمنەن باسقا كومەكشىم دە جوق»، – دەيدى ول.

مۇنداي جۇمىستارمەن ءتىس دارىگەرى ءقازىر عانا شۇعىلدانىپ جۇرگەن جوق. 

«2019 جىلدان باستاپ ءوز اقشاما (بايزاقوۆ پەن قازىبەك بي كوشەلەرى قيىلىسىنداعى اۋلا) ءۇيىمنىڭ اۋلاسىن كوگالداندىرىپ كەلەمىن. بىرنەشە كولىك توپىراق اكەلىپ، اۋلاعا توكتىردىم، سەبەبى قۇرىلىسشىلار ءتۇرلى قوقىستارىن تاستاپ كەتەدى عوي. اعاش كوشەتتەرىن، گۇل، گازون ءشوبىن، تىڭايتقىشتار الدىم، شوپتەر مەن بۇتالاردى قىرقاتىن قۇرال الدىم»، – دەيدى ۆلاديسلاۆ حوۆين.

قالا تۇرعىنى ىستەگەن جۇمىسىن مىندەتسىنبەيدى، ءبىراق ءوز ىسىمەن وزگەلەرگە ۇلگى بولىپ، تابيعات پەن وتاندى قالاي ءسۇيۋ كەرەكتىگىن كورسەتىپ كەلەدى.