جۇمىسپەن قامتىلماعان جاستارعا ارنالعان «اكسەلەراتور» جوباسىنىڭ 50 قاتىسۋشىسىنا ءوز جوبالارىن ىسكە اسىرۋ ءۇشىن مەملەكەتتىك گرانت بەرىلدى.
اتالمىش شارا «Almaty Resort» شيپاجايىندا ءوتتى. «Jas Camp Almaty» جاستار لاگەرىندە 50-دەن استام جاستار وزدەرىنىڭ بيزنەس جوسپارىن ىسكە اسىرۋعا مۇمكىندىك الدى. ولارعا 1 ملن.تەڭگە كولەمىندە مەملەكەتتىك گرانتتاردى الماتى قالاسىنىڭ اكىمىنىڭ ورىنباسارى ارمان قىرىقبايەۆ سالتاناتتى تۇردە تابىستاپ، ءوز قۇتتىقتاۋىن ايتتى.
بۇل جوبا بيزنەستى باسقارۋ سالاسىندا جاڭا ءبىلىم الۋ، جوبالاردى ىسكە اسىرۋ جولدارىن انىقتاۋ جانە ولاردى ورىنداۋ ءۇشىن قاجەتتى رەسۋرستاردى تابۋ ارقىلى قالانىڭ جۇمىسپەن قامتىلماعان جاستارىن قولداۋعا باعىتتالعان.
«جوباعا تىركەلگەن جۇمىسسىز مارتەبەسى بار 1000-نان استام جاس بالالار قاتىستى، ولاردىڭ 100ء-ى بەس كۇن ىشىندە «Almaty Resort» كەشەنىنىڭ بازاسىندا بىلىكتى تالىمگەرلەر مەن جاتتىقتىرۋشىلاردان شەبەرلىك سىنىپتارىنان ءوتتى»، – دەيدى شارانىڭ ۇيىمداستىرۋشىسى اقىلبەك دوسجان.
وقىتۋ بارىسىندا قاتىسۋشىلار كاسىپكەر رەتىندە قاجەتتى داعدىلار مەن كاسىپتەردى ۇيرەنۋگە، قوعامداعى تاۋەلسىز ومىرگە بەيىمدەلۋگە جانە ءوز ويلارىن جۇزەگە اسىراتىنداي پايدالى داعدىلاردى يگەرۋگە ەرەكشە نازار اۋدارىلدى.
«جاستارعا قولداۋ ءبىلدىرىپ، قارجىلاي كومەك بىلدىرگەن الماتى قالاسىنىڭ اكىمدىگىنە العىس بىلدىرەمىز. مەن ورتوپەديالىق ماتراس جاسايتىن سەح اشۋ ءۇشىن بيزنەس قۇرعان بولاتىنمىن. مىنەكەي، ونى جۇزەگە اسىرۋ ءۇشىن قارجى دا الىپ جاتىرمىن. دوستار دا تاۋىپ جاتىرمىن»، – دەدى الماتىلىق قاتىسۋشى.
ايتا كەتەيىك، ءىس-شارانى «الماتى قالاسىنىڭ جاستار ساياساتى باسقارماسى» كمم ۇيىمداستىردى.
