الماتىدا جاستار ءۇشىن 2،5% تومەن پايىزدىق مولشەرلەمەمەن شاعىن نەسيەلەۋگە وتىنىمدەردى قابىلداۋ جالعاسۋدا. باعدارلامانىڭ اگەنتى "اگرارلىق كرەديتتىك كورپوراسيا" اق بولىپ تابىلادى، نەسيەلەۋ ءبولىمىنىڭ باس مامانى قانات وماروۆ وكق بريفينگىندە نەسيە بەرۋ ءراسىمى تۋرالى ەگجەي-تەگجەيلى ايتىپ بەردى، دەپ حابارلايدى Almaty-akshamy.kz
نەگىزگى تالاپتاردىڭ ىشىندە ءوتىنىم بەرۋ ساتىندە جەكە كاسىپكەر رەتىندە تىركەلۋ مەرزىمى 5 جىلدان اسپاۋعا ءتيىس. 21-35 جاس ارالىعىنداعى جاس كاسىپكەرلەر مەن جۇمىسشى جاستار جەڭىلدەتىلگەن نەسيە الۋعا ۇمىتكەر بولا الادى.
"وسى باعدارلامامەن قازاقستان رەسپۋبليكاسى بويىنشا 28،9 ملرد تەڭگە ءبولىندى، ونىڭ ىشىندە الماتى جاستارى ءۇشىن 4،8 ملرد تەڭگە ءبولىندى. بۇل مىڭعا جۋىق كاسىپكەر مەن جاستار. الماتى قالاسى بويىنشا 350 كاسىپكەر مەن جاستارعا كەڭەس بەرىلدى، 71 كاسىپكەر بويىنشا وتىنىمدەر قابىلداندى، ولاردىڭ تورتەۋى كوميسسيانىڭ قاراۋىنا جىبەرىلدى"، - دەدى ق.وماروۆ.
شاعىن نەسيە سوماسى مال شارۋاشىلىعى سالاسىنداعى جوبالار ءۇشىن - 7 جىلعا دەيىن، بيزنەستىڭ باسقا باعىتتارى ءۇشىن - 5 جىلعا دەيىن وتەۋ مەرزىمىمەن 5 ملن تەڭگەگە دەيىن قۇرايدى. شاعىن نەسيە مەرزىمىنىڭ ۇزاقتىعىنىڭ ۇشتەن بىرىنە دەيىنگى نەگىزگى بورىش پەن سىياقىنى وتەۋ بويىنشا جەڭىلدىكتى كەزەڭ كوزدەلگەن.
كەپىلمەن قامتاماسىز ەتۋدىڭ بولۋى مىندەتتى شارت بولىپ تابىلادى. كەپىلمەن قامتاماسىز ەتۋ تۇرىندە جىلجىمالى جانە جىلجىمايتىن مۇلىك قابىلدانادى. كەپىلمەن قامتاماسىز ەتۋ بولماعان جاعدايدا ءۇشىنشى تۇلعالاردى كەپىل بەرۋشى رەتىندە تارتۋعا بولادى (اتا-انالارى، تۋىستارى جانە ت.ب.).
نەسيەلەۋ بويىنشا شەشىمدى قالا اكىمدىگى جانىنان قۇرىلعان ارنايى كوميسسيا قابىلدايدى. كوميسسياعا قالالىق ءماسليحات دەپۋتاتتارى، مەملەكەتتىك ورگانداردىڭ، "اتامەكەن" كاسىپكەرلەر پالاتاسىنىڭ، بيزنەس-قوعامداستىق پەن ب ا ق وكىلدەرى كىرەدى.
قاجەتتى قۇجاتتار ءتىزىمى:
1. جەكە باسىن كۋالاندىراتىن قۇجات؛
2. جوبا بويىنشا بيزنەس-جوسپار؛
3. شوتتىڭ بولۋى تۋرالى قىزمەت كورسەتەتىن بانكتەن انىقتامالار؛
4. قارجى ۇيىمدارىنان (كرەديتتەر بولعان كەزدە)كرەديتتىك بەرەشەكتىڭ، ونىڭ ىشىندە مەرزىمى وتكەن بەرەشەكتىڭ بولۋى تۋرالى انىقتامالار؛
5. قاتىسۋشىنىڭ/ۇمىتكەردىڭ جالاقىسىن جانە (نەمەسە) وزگە دە تابىستارىن راستايتىن قۇجات (جيناقتاۋشى زەينەتاقى قورىنان ءۇزىندى كوشىرمە) بولعان كەزدە؛
6. كەپىلدى قامتاماسىز ەتۋ رەتىندە بەرىلەتىن مۇلىكتى باعالاۋ تۋرالى ەسەپ؛
7. كەپىل بەرۋشى جانە كەپىلمەن قامتاماسىز ەتۋ جونىندەگى قۇجاتتار.
ءوتىنىم بەرۋ ءۇشىن ساتبايەۆ كوشەسى، 5 مەكەنجايىنداعى "اگرارلىق نەسيە كورپوراسياسى" اق فيليالىنا قۇجاتتاردى تاپسىرۋ قاجەت. شاعىن نەسيەلەر بويىنشا. تولىق اقپاراتپەن كورپوراسيانىڭ agrocredit.kz.سايتىندا تانىسۋعا بولادى