جاستارعا جالعا بەرىلگەن تۇرعىن ءۇي جەكەشەلەندىرىلمەيدى

تۇرعىن ءۇي تەك 5 جىل مەرزىمگە بەرىلەدى

جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي جەكەشەلەندىرۋگە جاتپايدى، دەپ حابارلايدى Almaty-akshamy.kz.
نۇر-سۇلتان قالاسى اكىمدىگىنىڭ تۇرعىن ءۇي قورى مەكەمەسىنە سىلتەمە جاساپ.
يندۋستريا جانە ينفراقۇرىلىمدىق دامۋ مينيسترلىگىنىڭ اقپاراتىنا سايكەس «جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى شەڭبەرىندە بەرىلگەن جالعا بەرىلەتىن تۇرعىن ءۇيدى جەكەشەلەندىرۋ مۇمكىندىگى تۋرالى ۇسىنىس قابىلدانبادى.

«تۇرعىن ءۇي تەك 5 جىل مەرزىمگە بەرىلەدى، ياعني 5 جىلدان كەيىن ءسىز باعدارلاما شارتتارىنا سايكەس بەرىلگەن تۇرعىن ءۇيدى بوساتۋىڭىز كەرەك. وسى باعدارلاما بويىنشا ساتىپ الۋ قۇقىعىنسىز جالعا بەرىلەتىن تۇرعىن ءۇيدى العانداردىڭ بارلىعىنا تۇرۋ ۋاقىتى ىشىندە «وتباسى بانك» اق-عا ءوزىنىڭ پاتەرىنە باستاپقى جارنانى جيناقتاۋدى ۇسىنامىز»، دەلىنگەن حابارلامادا.

«جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى – بۇل جۇمىس ىستەيتىن جاستاردىڭ ءوز باسپانالارىنا اقشا جيناقتاۋ مۇمكىندىگىنە يە بولۋى ءۇشىن مەملەكەتتەن قولداۋ.
باعدارلاما بويىنشا جالداۋ شارتىن بۇزۋ شارتتارى:
1) 6 ايدان ارتىق جالداۋ اقىسىن تولەمەۋ؛
2) 3ء-شى ادامدارعا پاتەردى تاپسىرۋ؛
3) ءوتىنىش بەرۋشىدە نەمەسە ونىڭ وتباسى مۇشەلەرىندە مەنشىك قۇقىعىندا مۇلىكتىڭ بولۋى؛
4) جالداۋ شارتىنىڭ 5 جىلدىق مەرزىمىنىڭ اياقتالۋى.