جاستاردى ەڭبەكقورلىققا باۋلىعان ءجون

رەسپۋبليكالىق قوعامدىق شتاب مۇشەلەرى پاۆلودار وبلىسىنىڭ سايلاۋشىلارىمەن كەزدەستى
بۇگىن پرەزيدەنتتىككە كانديدات قاسىم-جومارت توقايەۆتىڭ رەسپۋبليكالىق قوعامدىق شتابىنىڭ مۇشەلەرى پاۆلودار وبلىسىنىڭ جۇرتشىلىعىمەن، كاسىپورىنداردىڭ ەڭبەك ۇجىمدارىمەن جانە جاستارىمەن ءبىرقاتار كەزدەسۋ وتكىزدى.
ۇگىت-ناسيحات ناۋقانى باستالعاننان بەرى ەل وڭىرلەرىندە سايلاۋشىلارمەن 13 مىڭنان استام كەزدەسۋ ءوتتى. ولاردىڭ باستى ماقساتى – كانديدات قاسىم-جومارت توقايەۆتىڭ سايلاۋالدى باستامالارىن تۇرعىندارعا جەتكىزۋ.
ەكىباستۇز قالاسىندا رقش مۇشەلەرى جۇمىسشىلاردىڭ قۇقىقتارىن قورعاۋ جانە وندىرىستەگى قاۋىپسىزدىكتى ارتتىرۋعا قاتىستى باسىمدىقتارى تۋرالى ايتىپ بەردى.
«ازاماتتاردىڭ ادال ءونىمدى ەڭبەگى قۇرمەتتەلۋى، قورعالۋى جانە وعان لايىقتى ەڭبەكاقى تولەنۋى ءتيىس. قىزمەتكەرلەردىڭ مانساپتىق بولاشاعى مەن تابىسى ولاردىڭ كاسىبيلىگىنە، جاۋاپكەرشىلىگى مەن ابجىلدىگىنە بايلانىستى بولۋى كەرەك. جاستاردى ەڭبەكقورلىققا باۋلىعان ءجون»،- دەدى رەسپۋبليكالىق قوعامدىق شتاب دەلەگاسياسىنىڭ باسشىسى اسحات ورالوۆ.
پاۆلوداردا قاسىم-جومارت توقايەۆتىڭ جاقتاستارى ترامۆاي باسقارماسى مەن ەلەكتروليز زاۋىتىنىڭ ۇجىمدارىمەن كەزدەسۋ وتكىزدى. 
بۇدان سوڭ دوستىق ۇيىندە شتاب مۇشەلەرى ءوڭىر جۇرتشىلىعىمەن سايلاۋالدى باعدارلامانىڭ نەگىزگى باعىتتارىن تالقىلادى. «تورايعىروۆ ۋنيۆەرسيتەتىندە» عىلىمي قوعامداستىق وكىلدەرى سايلاۋالدى باعدارلامادا كورسەتىلگەن الەۋمەتتىك قولداۋ شارالارىن قاراستىردى.
جاستار بەلسەندىلەرىمەن كەزدەسۋدە رقش مۇشەلەرى – جاستار ساياساتىنداعى، ال كاسىپكەرلەرىمەن جۇزدەسۋدە ەكونوميكا سالاسىنداعى سايلاۋالدى باستامالارعا توقتالدى. 
جالپى، بۇگىن رەسپۋبليكالىق قوعامدىق شتاب مۇشەلەرى پاۆلودار وبلىسىنىڭ اقسۋ، ەكىباستۇز قالالارىندا، سونداي-اق باياناۋىل، جەلەزين، ۋسپەن جانە ت.ب. اۋداندارىندا سايلاۋشىلارمەن 20-دان استام كەزدەسۋ وتكىزدى.