2024 جىلى قازاقستاندا جاستارمەن جۇمىس ىستەۋدىڭ باستى باعىتى رەتىندە «ادال ازامات» تۇجىرىمداماسى ايقىندالدى. مەملەكەت باسشىسى بۇل باعىتتى ۇلتتىق قۇرىلتايدىڭ ءۇشىنشى وتىرىسىندا اتاپ كورسەتىپ، جاستاردى ادالدىق، ادىلدىك، جانە ەڭبەكقورلىق سياقتى قۇندىلىقتارمەن تاربيەلەۋ كەرەكتىگىن جەتكىزدى. بۇل تۇجىرىمداما ەلىمىزدىڭ بولاشاعى بولاتىن جاستاردىڭ قوعامدىق ومىردە بەلسەندىلىگىن ارتتىرۋعا، الەۋمەتتىك جاۋاپكەرشىلىكتى مويىنداۋعا جانە ەلىمىزدىڭ دامۋىنا وڭ ىقپال ەتۋگە باعىتتالعان. وسىلايشا، جاستار اراسىندا ادالدىقتى، ادىلدىكتى جانە ەڭبەكقورلىقتى ناسيحاتتاۋ ماڭىزدى مىندەت بولىپ سانالدى. بۇل تۋرالى aqshamnews.kz حابارلايدى.
جاستاردى جۇمىسپەن قامتۋ
قازاقستانداعى مەملەكەتتىك جاستار ساياساتىنىڭ باستى باعىتتارىنىڭ ءبىرى – جاستاردى جۇمىسپەن قامتۋ ماسەلەسى. 2024 جىلى ەلىمىزدە 400 مىڭنان استام جاس جۇمىسقا ورنالاستىرىلدى. بۇل باعىتتا بىرنەشە ايماقتاردا ارنايى باعدارلامالار جۇزەگە اسىرىلىپ، جاستاردىڭ ەڭبەك نارىعىنا كىرىگۋىنە كومەكتەسۋگە باعىتتالعان اۋقىمدى شارالار اتقارىلدى.
ماسەلەن، استانا قالاسىندا «Jol Tap» باعدارلاماسى اياسىندا 3،9 مىڭ ادام وقۋدان ءوتتى. الماتى، اقتوبە جانە قاراعاندى وبلىستارىندا «Jumys Tap» باعدارلاماسى جۇزەگە اسىرىلىپ، 10 مىڭنان استام جاس جۇمىسپەن قامتىلدى. سونىمەن قاتار الماتى قالاسىندا «Jobfair365» ونلاين پلاتفورماسى جۇمىس ىستەپ، ونىڭ كومەگىمەن 2،5 مىڭ جاس مامان جۇمىسقا ورنالاستى. استانا قالاسىندا «Jol Tap» جوباسى اياسىندا مەملەكەتتىك قولداۋ شارالارى بويىنشا 19،5 مىڭ ادامعا كەڭەس بەرىلدى. ونىڭ ىشىندە 3،9 مىڭ ادام ءارتۇرلى ماماندىقتار بويىنشا وقىتۋ كۋرستارىنا قاتىستى.
جاستارعا ءبىلىم بەرۋ جانە كاسىبي باعدار بەرۋ
جاستار رەسۋرستىق ورتالىقتارى 2024 جىلى ەلىمىزدىڭ ءتۇرلى ايماقتارىندا كاسىپتىك باعدار بەرۋ ماقساتىندا 500-دەن استام بوس جۇمىس ورىندارىنىڭ جارمەڭكەسىن ۇيىمداستىردى. بۇل ءىس-شارالاردا 1 ميلليوننان استام ادام زاڭگەرلىك، پسيحولوگيالىق، كاسىپتىك باعدار جانە باسقا دا باعىتتار بويىنشا كەڭەس الدى. NEET (ءبىلىمى جوق جانە جۇمىس ىستەمەيتىن) ساناتىنداعى جاستارعا ەرەكشە كوڭىل ءبولىندى. قازاقستاندا بۇل ساناتقا جاتاتىن 160 مىڭنان استام جاس بار. ولارعا «Zhas project» باعدارلاماسى اياسىندا 280 گرانت ءبولىندى. ءار گرانتتىڭ مولشەرى 1 ميلليون تەڭگەنى قۇرادى.
ماۋسىمدىق جۇمىستار مەن «جاسىل ەل» جوباسى
قازاقستاندا 20 جىلدان استام ۋاقىت بويى جۇزەگە اسىرىلىپ كەلە جاتقان «جاسىل ەل» جوباسى جاستاردى ماۋسىمدىق جۇمىسپەن قامتۋعا ارنالعان. بۇل باعدارلاما اياسىندا سوڭعى ءۇش جىلدا 100 مىڭنان استام جاس ەڭبەككە تارتىلدى. بۇل جۇمىس ورىندارىنىڭ 30 مىڭنان استامى اۋىل جاستارىنا ارنالعان. «جاسىل ەل» جوباسى جاستاردىڭ جازعى دەمالىسىن ءتيىمدى وتكىزىپ، ءوز-وزىن دامىتۋعا مۇمكىندىك بەرەدى.
تۇرعىن ءۇي ماسەلەسىن شەشۋ
قازاقستاندا جاستارعا تۇرعىن ءۇي ماسەلەسىن شەشۋ بويىنشا جۇيەلى قولداۋ كورسەتىلۋدە. 2017 جىلدان باستاپ، مەملەكەتتىك باعدارلامالار اياسىندا 7 200-دەن استام جاس قازاقستاندىق باسپاناعا يە بولدى. بۇدان باسقا، «وتباسى بانك» جانە وبلىس اكىمدىكتەرىمەن بىرلەسىپ، ەلدىڭ 16 وڭىرىندە جاستارعا ارنالعان يپوتەكالىق باعدارلامالار ىسكە قوسىلدى. بۇل باعدارلامالار ارقىلى 35 جاسقا دەيىنگى كەز كەلگەن قازاقستان ازاماتى تۇرعىن ۇيگە قول جەتكىزۋگە مۇمكىندىك الدى. باعدارلامانىڭ شارتتارى بويىنشا باستاپقى جارنا 10% قۇرايدى، ال پايىزدىق مولشەرلەمەسى 5%-دان باستالادى جانە نەسيە 19 جىلعا دەيىن بەرىلەدى.
«پرەزيدەنتتىك جاستار كادرلىق رەزەرۆى»
قازاقستاندا جاستاردىڭ كاسىبي دامۋىنا جانە كادرلىق الەۋەتىن ارتتىرۋعا باعىتتالعان «پرەزيدەنتتىك جاستار كادرلىق رەزەرۆى» جوباسى دا ۇلكەن ماڭىزعا يە. 2019 جىلدان باستاپ ىسكە اسىرىلىپ كەلە جاتقان بۇل جوبا جاستارعا مەملەكەتتىك جانە كۆازيمەملەكەتتىك سەكتورلاردا باسشىلىق لاۋازىمدارعا تاعايىندالۋ مۇمكىندىگىن بەرەدى. 2024 جىلى العاش رەت ايماقتىق كادرلىق رەزەرۆكە ىرىكتەۋ جۇرگىزىلدى. وعان رەسپۋبليكالىق ماڭىزى بار قالالار مەن وبلىستاردىڭ جەرگىلىكتى اتقارۋشى ورگاندارى قاتىسىپ، 505 ادام رەزەرۆكە قابىلداندى. بۇل ادامدار ەكى جىل بويى رەزەرۆتە تۇرىپ، مەملەكەتتىك ورگانداردىڭ كەلىسىمىمەن باسشىلىق لاۋازىمدارعا كونكۋرسسىز تاعايىندالۋ مۇمكىندىگىنە يە بولدى.
گرانتتار مەن سىياقىلار
قازاقستاننىڭ جاستارعا ارنالعان ارنايى گرانتتىق باعدارلامالارى دا بار. 2024 جىلى «تاۋەلسىزدىك ۇرپاقتارى» گرانتى اياسىندا 30 جاسقا دەيىنگى جاستارعا 90 ملن. تەڭگە كولەمىندە گرانتتار تابىستالدى. جوبانىڭ التى باعىتى بويىنشا گرانتتار ءبولىندى، ولار عىلىم، مادەنيەت، IT، مەديا، بيزنەس جانە ۆولونتەرلىك سالالارىن قامتىدى. سونىمەن قاتار، «دارىن» مەملەكەتتىك جاستار سىيلىعىنىڭ كولەمى 1 ميلليون تەڭگەگە دەيىن ۇلعايتىلدى.
ستارتاپتار مەن يننوۆاسيالار
ستارتاپتار مەن يننوۆاسيالىق باستامالاردى قولداۋ جاستاردى كاسىپكەرلىككە ىنتالاندىرىپ، جاڭا جۇمىس ورىندارىنىڭ اشىلۋىنا جانە ەكونوميكانىڭ وسۋىنە ىقپال ەتەدى. جاستارعا ارنالعان گرانتتار مەن جوبالار كاسىپتىك باعدار بەرۋمەن قاتار، جاڭا يننوۆاسيالىق يدەيالاردى جۇزەگە اسىرۋعا دا مۇمكىندىك بەرەدى.
جالپى العاندا، قازاقستاننىڭ كوپۆەكتورلى جاستار ساياساتى جاستاردىڭ قوعامدىق ومىرگە بەلسەندى ارالاسۋىنا، ولاردىڭ ازاماتتىق جاۋاپكەرشىلىگىن ارتتىرۋعا جانە ەلىمىزدىڭ دامۋىنا ۇلەس قوسۋىنا ىقپال ەتەدى. مەملەكەت جاس ۇرپاقتى قولداۋ شارالارىن ءتۇرلى باعىتتاردا جۇزەگە اسىرىپ، ولاردى ەڭبەك نارىعىنا جانە قوعامنىڭ ماڭىزدى سالالارىنا تارتۋعا كۇش سالىپ وتىر.