ەل حالقىنىڭ 20%ء-ىن 14-29 جاس ارالىعىنداعى جاستار قۇرايدى
قازىرگى ۋاقىتتا مەملەكەتتىك جاستار ساياساتىندا جاڭا تاسىلدەردى قالىپتاستىرۋ ماڭىزدى جانە الماتى وسى ۇدەرىستە ترەند-مەيكەر بولۋعا ءتيىس. بۇگىن الماتىعا جۇمىس ساپارى اياسىندا ەرىكتىلەرىمەن جانە شىعارماشىل جاستارىمەن كەزدەسكەن پرەمەر-مينيستردىڭ ورىنباسارى ەرالى توعجانوۆ وسىنداي وي ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ۆيسە-پرەمەر ءوز سوزىندە ەل حالقىنىڭ 20%ء-ىن 14-29 جاس ارالىعىنداعى جاستار قۇرايتىنىن اتاپ ءوتتى. جاس قازاقستاندىقتاردىڭ جان-جاقتى دامۋى – ۇكىمەت ءۇشىن باسىم مىندەت ەكەنىنە توقتالدى.
«پرەزيدەنت قاسىم-جومارت توقايەۆ جاستاردىڭ قوزعاۋشى كۇش ەكەنىن ايتىپ، ونىڭ زور الەۋەتىن اتاپ ءوتتى. ءبىز بۇل دەڭگەيدى جوعارىلاتۋىمىز كەرەك. قازىرگى ۋاقىتتا مەملەكەتتىك جاستار ساياساتىندا جاڭا تاسىلدەردى قالىپتاستىرۋ ماڭىزدى جانە الماتى وسى ۇدەرىستە ترەند-مەيكەر بولۋعا ءتيىس. مەن سىزدەردى ءوز ۋاقىتتارىڭىز بەن الەۋەتتەرىڭىزدى ادىلەتتى، جاڭا قازاقستاندى قۇرۋ جولىنا پايدالانۋعا شاقىرامىن. تۋعان ەلدىڭ يگىلىگى ءۇشىن قىزمەت ەتۋگە، ادال ەڭبەككە، پروگرەسسيۆتى بىلىمگە جانە وزىق تاجىريبەگە سۇيەنۋگە ۇندەيمىن. ءبىز بىرگە جاڭا قازاقستان قۇرامىز!» - دەدى ەرالى توعجانوۆ.
كەزدەسۋدە ناشاقورلىقتىڭ الدىن الۋعا جانە ەسىرتكىنىڭ تارالۋىنا قارسى كۇرەسكە باعىتتالعان «NarkoSTOP»، شەت تىلدەرىن دامىتۋعا باعىتتالعان «تىلدەر ساياحاتى» جوبالارى تىڭلدالدى. ۆيسە-پرەمەر اعىلشىن ءتىلىن وقىتۋعا ارنايى ورىندار ۇسىنۋدى تاپسىردى. سونداي-اق، ينكليۋزيۆتى قوعامعا دا كوڭىل ءبولىندى.
«ينكليۋزيۆتى قوعام ەرەكشە قاجەتتىلىكتەرى بار جانە مۇمكىندىكتەرى شەكتەۋلى ادامدار ءۇشىن تاۋەلسىز ءومىر سالتىن جۇرگىزۋگە جانە الەۋمەتتىك كاسىپكەرلىكتى دامىتۋ ەسەبىنەن ءومىردىڭ بارلىق سالالارىنا، ەكونوميكالىق تاۋەلسىزدىككە بەلسەندى قاتىسۋعا جاعداي جاسالاتىن قوعام رەتىندە قاراستىرىلۋى ءتيىس. ينكليۋزيۆتى قوعامدى قالىپتاستىرۋ، اسىرەسە جاستار اراسىندا جاپپاي ينكليۋزيۆتى سانانى قالىپتاستىرۋعا بايلانىستى كوپتەگەن ماسەلەلەردى شەشۋدىڭ ىرگەتاسى بولىپ تابىلادى. بۇل ءۇشىن جۇرتشىلىقتى جانە جاستاردى تۋىنداعان پروبلەمالاردى شەشۋگە ەمەس، العىشارتتار مەن سەبەپتەر جاساۋعا بەلسەندىرەك تارتۋ قاجەت. بۇل – سالاۋاتتى ءومىر سالتىنان باستاپ، ءبىلىم الۋ، كاسىپ پەن داعدىلاردى يگەرۋ»، - دەدى ۆيسە-پرەمەر.