بيىل بارلىعى 20 مىڭ ادامعا گرانت بەرۋ جوسپارلانىپ وتىر
ق ر ەڭبەك جانە حالىقتى الەۋمەتتىك قورعاۋ مينيسترلىگى جاستار پراكتيكاسىنا جانە «العاشقى جۇمىس ورنى» جوباسىنا قاتىسۋ مەرزىمىن 12 جانە 18 ايعا دەيىن ۇلعايتۋدى جوسپارلاپ وتىر، دەپ حابارلايدى Almaty-akshamy.kz
2016 جىلعى بۇيرىققا ەنگىزىلەتىن وزگەرىستەر اياسىندا جاستارعا جانە حالىقتىڭ الەۋمەتتىك وسال توپتارىنا بەرىلەتىن بيزنەستى دامىتۋعا ارنالعان گرانت كولەمىن بيىل 400 اەك-كە، ياعني، 1،2 ملن تەڭگەگە ۇلعايتۋ كوزدەلگەن. گرانت جاستار مەن حالىقتىڭ الەۋمەتتىك وسال توپتارىن ءوز ءىسىن اشۋ ءۇشىن باستاپقى قۇرالدارمەن قامتاماسىز ەتەدى. بيىل بارلىعى 20 مىڭ ادامعا گرانت بەرۋ جوسپارلانىپ وتىر.
قاعيداعا ەنگىزىلگەن وزگەرىستەرمەن جاستار پراكتيكاسىنا جانە «العاشقى جۇمىس ورنى» جوباسىنا قاتىساتىن جاس مامانداردىڭ جالاقى مولشەرىن 30 اەك-كە دەيىن ۇلعايتۋ، سونداي-اق جاستار پراكتيكاسىنا جانە «العاشقى جۇمىس ورنى» جوباسىنا قاتىسۋ مەرزىمىن تيىسىنشە 12 جانە 18 ايعا دەيىن ۇزارتۋ جوسپارلانۋدا.
بۇل وزگەرىستەر جاستاردىڭ العان ماماندىعى بويىنشا جۇمىس ورنىنا ءساتتى بەيىمدەلۋىنە جانە بەكىتىلۋىنە ىقپال ەتەدى. بيىل جاستار پراكتيكاسىنا كەمىندە 22 مىڭ ادامدى جىبەرۋ، سونداي-اق «العاشقى جۇمىس ورنى» جوباسىنا كەمىندە 3 مىڭ جاستىڭ قاتىسۋىن ۇيىمداستىرۋ جوسپارلانعان.