ءبىلىم بەرۋ سەكتورىندا جەڭىلدىكتەر قاراستىرۋدى ۇسىنادى.
قازاقستاندىق اسكەريلەر مەرزىمدى قىزمەتتەگى ساربازداردى الەۋمەتتىك قولداۋ شارالارىن قابىلدايدى، دەپ حابارلايدى Almaty-akshamy.kz.
«قازاقستاننىڭ قارۋلى كۇشتەرىندە 2022 جىلعى كوكتەمگى اسكەرگە شاقىرۋ ناۋقانىن وتكىزۋگە دايىندىق جالعاسۋدا. قورعانىس مينيسترلىگى قازاقستان پرەزيدەنتى قاسىم-جومارت توقايەۆتىڭ جاستاردىڭ اسكەري قىزمەت دەگەن ىنتاسىن ارتتىرۋ جونىندەگى تاپسىرماسىن ىسكە اسىرۋ شەڭبەرىندە ءبىرقاتار ۇسىنىستار ازىرلەدى»،- دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
قورعانىس ۆەدومستۆوسى قولدانىستاعى زاڭناماعا وزگەرىستەر ەنگىزۋ مۇمكىندىگىن قاراستىرۋدى ۇسىنادى. مامانداردىڭ ايتۋىنشا، اتالمىش وزگەرىستەر اسكەرگە شاقىرۋ جاسىنداعى جاستار مەن ولاردىڭ وتباسى مۇشەلەرىن الەۋمەتتىك قولداۋعا ارنالعان.
«اتاپ ايتقاندا، اسكەري قىزمەتشىلەردىڭ مەرزىمدى اسكەري بورىشىن وتەۋ كەزەڭىندە ولاردىڭ وتباسى مۇشەلەرىنە كوممۋنالدىق قىزمەتتەرگە اقى تولەۋدە جەڭىلدىكتەر بەرۋ ۇسىنىلادى. قورعانىس مينيسترلىگى ۇسىنىپ وتىرعان مەرزىمدى اسكەري قىزمەت كەزەڭىندە نەسيەنى كەيىنگە قالدىرۋ جاس قازاقستاندىقتار ءۇشىن قوسىمشا قولداۋ بولماق. اسكەري ۆەدومستۆو باسقا دا، ونىڭ ىشىندە ءبىلىم بەرۋ سەكتورىندا جەڭىلدىكتەر قاراستىرۋدى ۇسىنادى»، - دەلىنگەن حابارلامادا.
سونىمەن قاتار مامانداردىڭ ايتۋىنشا، قازىرگى ۋاقىتتا قارۋلى كۇشتەردە مەملەكەت باسشىسىنىڭ 2021 جىلعى 1 قىركۇيەكتەگى قازاقستان حالقىنا جولداۋىندا ايتىلعان، ساربازدار بورىشىن وتەگەن كەزەڭدە ەكونوميكانىڭ ناقتى سەكتورىندا سۇرانىسقا يە جۇمىسشى ماماندىقتاردى الۋ جونىندەگى تاپسىرماسى دا ىسكە اسىرىلۋدا.