ساياسي ناۋقاننان قالىس قالماي، تاڭداۋىن جاساۋعا كەلگەندەردىڭ قاتارىندا سپورتشىلارىمىز دا بار. الماتى قالاسى ءماسليحاتىنىڭ دەپۋتاتى، «قازاقستان 100 جاڭا ەسىم» جوباسىنىڭ جەڭىمپازى، پاراليمپياداشى سەرىك ەسماتوۆ №85 مەكتەپتە ورنالاسقان №447 سايلاۋ ۋچاسكەسىنە كەلىپ، رەفەرەندۋمعا داۋىس بەردى.
– بۇگىن ەلىمىزدە تاريحي وقيعا – رەسپۋبليكالىق رەفەرەندۋم ءوتىپ جاتىر. ءبىز ءۇشىن بۇل ءوز ۇستانىمىمىزدى ءبىلدىرۋ مەن ازاماتتىق پارىزىمىزدى ورىنداۋ ءتاسىلى. تاڭەرتەڭنەن باستاپ مەن ءوزىمنىڭ تۇركسىب اۋدانىنداعى سايلاۋ ۋچاسكەمدە ءجۇرمىن. تاۋەلسىز قازاقستاننىڭ دامۋى رەسپۋبليكامىزدىڭ بەلسەندى ازاماتتارىنان باستاۋ الاتىنى بەلگىلى. مىنە، سونىڭ دالەلى بولسا كەرەك، اۋدان تۇرعىندارى ساياسي ناۋقاننىڭ ماڭىزدىلىعىن شىن سەزىنىپ، ءوز تاڭداۋلارىن جاساپ جاتىر. اسىرەسە جاستار جاعى وتە بەلسەندى. جاستار – قوعامنىڭ قوزعاۋشى كۇشى عانا ەمەس، ەلدىڭ تىرەگى، مەملەكەتتىڭ ەڭ بەلسەندى بولىگى. سوندىقتان مەن جاستاردىڭ وكىلى جانە ءماسليحات دەپۋتاتى رەتىندە تاڭداۋىمدى جاساپ، رەفەرەندۋمدا ءوز داۋىسىمدى بەردىم. ءوز باسىم، سايلاۋشىلاردىڭ جايدارى كوڭىل-كۇيلەرىنە قاراپ جارقىن بولاشاقتى سەزىنە ءتۇستىم.