الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى №11 مەكەمەسىنىڭ اۋماعىندا №2 كاسىپتىك-تەحنيكالىق مەكتەبى جۇمىس ىستەيدى. بۇل ءبىلىم وشاعىندا سوتتالىپ، جازاسىن وتەپ جاتقان جاسوسپىرىمدەر كاسىپتىك ءبىلىم الادى.
ءيا، قازىرگى كۇنى باس بوستاندىعىنان ايىرىلعان جاستار وسى مەكتەپ عيماراتىندا «ەلەكتردانەكەرلەۋشى»، «مەتالل بويىنشا توكار»، «مەحانيكالىق جيناۋ جۇمىستارىنىڭ سلەسارى» ماماندىقتارىن مەڭگەرىپ ءجۇر. №2 كاسىپتىك-تەحنيكالىق مەكتەبى بىلتىردان بەرى الماتى جولاۋشىلار كولىگى جانە تەحنولوگيالار كوللەدجىنىڭ قۇرامىنا كىردى.
№11 مەكەمەسىندە جازاسىن وتەپ جاتقان جاسوسپىرىمدەر جوعارىدا اتالعان توپتاردا جارتى جىل بويى، ءار اپتانىڭ التى كۇنىندە وقيدى. ءبىر كۇندىك ساباقتارىنىڭ ۇزاقتىعى – ءۇش ساعات. وندىرىستىك تاجىريبە كاسىپتىك-تەحنيكالىق مەكتەپتىڭ سەحتارىندا وتەدى. تاجىريبە اياقتالىپ، ەمتيحاندار تاپسىرىلعان سوڭ، سوتتالعان بالالارعا مەملەكەتتىك ۇلگىدە ماماندىعىن مەڭگەرگەنى تۋرالى كۋالىك بەرىلەدى.
– بارشامىزعا بەلگىلى، بيىل – جۇمىسشى ماماندىقتار جىلى. ءبىزدىڭ تۇزەۋ مەكەمەسىندە تاربيەلەنىپ جاتقان جاسوسپىرىمدەر باس بوستاندىعىنان ايىرىلعانىمەن، ءبىلىم الۋ قۇقىعىنان ايىرىلعان جوق. ولار دا بارلىق يگىلىكتى يگەرۋگە قۇقىلى. بۇگىن ءبىز «مەحانيكالىق-قۇراستىرۋ جۇمىستارىنىڭ سلەسارى» بويىنشا ءبىلىم العان جەتى جازاسىن وتەۋشى جاسوسپىرىمگە سەرتيفيكات تابىستادىق. ادەتتە سوتتى بولعان ادامنىڭ بوستاندىققا شىققان سوڭ قوعامعا بەيىمدەلۋى قيىن. ال بىزدەن ءبىلىم العان جاستار وسى كاسىپتىك كۋالىكتەرىنىڭ ارقاسىندا ەرتەڭ جۇمىسقا ورنالاسىپ، قوعامعا ءساتتى كىرىگە الادى دەپ سەنەمىن، – دەيدى №11 مەكەمە باستىعى، ادىلەت پودپولكوۆنيگى ا.سۇلەيمەنوۆ.
ماماندىق يەلەنگەن جاسوسپىرىمدەردىڭ قۋانىشىنا ورتاقتاسۋعا كەلگەن الماتى جولاۋشىلار كولىگى جانە تەحنولوگيالار كوللەدجىنىڭ ديرەكتورى س.سۇلەيمەنوۆتىڭ ايتۋىنشا، كۇز ايىنان باستاپ جازاسىن وتەۋشى جاسوسپىرىمدەرگە ستيپەنديا تاعايىندالادى. دەمەك، ولار كوللەدج ستۋدەنتتەرى سياقتى تەڭ دارەجەدە ءبىلىم الىپ، بولاشاقتا ديپلوم يەلەنەدى.