جاساندى ينتەللەكتىڭ باقىلاۋسىز دامۋى اقش مەكتەپتەرىندە بۋللينگتى كۇشەيتتى.
ونىڭ ىشىندە جاساندى زەردەنىڭ كومەگىمەن وقۋشى قىزداردىڭ جالاڭاش سۋرەتىن جاساپ، الەۋمەتتىك جەلى ارقىلى تاراتۋدىڭ بىرنەشە فاكتىسى تىركەلدى. ارنايى زاڭ بەكىتپەسە، مۇنداي جاعداي كوبەيە تۇسپەك، - دەيدى ماماندار.
ەلدىڭ جاعاسىن ۇستاتقان وقيعانىڭ ءبىرى نيۋ دجەرسي شتاتىنداعى مىنا مەكتەپتە بولعان. 14 جاسار بىرنەشە قىزدىڭ جالاڭاش سۋرەتتەرى سناپچات الەۋمەتتىك جەلىسى ارقىلى تاراپ كەتەدى. تەكسەرىس جالعان پورنوگرافيالىق سۋرەتتى سىنىپتاس بوزبالانىڭ جاساندى ينتەللەكت قوسىمشاسىن پايدالانىپ جاساعانىن انىقتايدى.
«ءبىز بۇعان قاتتى اشۋلاندىق. قىزداردىڭ كوبى جىلاپ تا الدى. مۇنداي سۇمدىق جاعدايعا تاپ بولامىز دەپ كىم ويلاعان. جاساندى ينتەللەكتىنىڭ سەبەبىنەن كەز كەلگەنىمىز زارداپ شەگۋىمىز مۇمكىن»، - دەيدى وقۋشى فرەنچەسكو ماني.
جالعان سۋرەتتەر تامىز ايىندا تاراعان. ءبىراق، ول تۋرالى كوپشىلىككە ەندى عانا ءمالىم بولىپ وتىر. ارادا تولىق ەكى اي وتسە دە بۇزاقىلىق جاساعان بالاعا ەشقانداي شارا قولدانىلماعان. ءقازىر تەرگەۋ ءجۇرىپ جاتىر. الايدا، زارداپ شەككەن وتباسىلار ونى مەكتەپتەن شىعارۋدى جانە جازاعا تارتۋدى تالاپ ەتۋدە.
«ماعان مەكتەپ وكىلدەرى حابارلاسىپ، بىرنەشە وقۋشى قىزدىڭ تۇرلەرىن پايدالانۋ ارقىلى جالعان جالاڭاش سۋرەتتەر سناپچاتتاعى توپتاردا تارالىپ جاتقانىن حابارلادى. العاش ەستىگەندە شوك بولدىم. ەندى ەشبىر اتا-انا مۇنداي جاعدايعا دايىن بولماسى انىق. كەيىن مەكتەپتىڭ قارەكەتسىز وتىرعانىنا قاراپ، كوڭىلىم ءتۇستى»، - دەيدى اتا-انا دوروتا ماني.
ءدال وسىنداي جاعداي ۆاشينگتون شتاتىندا دا بولدى. سيەتل قالاسىندا ورتا مەكتەپتە وقيتىن قىزداردىڭ جاڭالاڭاش بەينەلەرىن جاساعان ءجاسوسپىرىمنىڭ ۇستىنەن تەرگەۋ باستالدى. جالپى، تاۋەلسىز زەرتتەۋشىلەردىڭ حابارلاۋىنشا جىل باسىنان بەرى ەلدە 143 مىڭنان استام ديپ فەيك ۆيدەو مەن سۋرەت عالامتورعا جۇكتەلگەن.