جاھاندى دۇرلىكتىرگەن جاڭا تەحنولوگيالار تۋرالى ءبىز نە بىلەمىز؟
بۇگىندە جاساندى ينتەللەكت (AI) كۇندەلىكتى ومىرىمىزگە كىرە باستادى. بۇل قىزىقتى قۇبىلىس بىزگە اينالامىزداعى وزگەرىپ بارا جاتقان الەمدى، العا دامىپ كەتكەن جاڭا تەحنولوگيالاردى تۇسىنۋگە كومەكتەسەدى. ەندەشە، جاساندى ينتەللەكت (AI) ۇعىمى نەنى بىلدىرەدى؟ تانىمال AI مودەلى – ChatGPT دەگەنىمىز نە؟ جاڭا تەحنولوگيالارعا قاتىستى وسى جانە باسقا دا باعدارلارعا شولۋ جاساپ كورەيىك.
- جاساندى ينتەللەكت دەگەنىمىز نە؟
- AI – ينفورماتيكانىڭ ءبىر سالاسى، ياعني ۇيرەتىلگەن، وقىتىلعان ماشينا. بۇل ينتەللەكت تالاپ ەتەتىن تاپسىرمالاردى ورىنداي الاتىن روبوتتى جاساۋعا باعىتتالعان جاڭا سالا: كومپيۋتەرلەرگە قابىلداۋعا، پايىمداۋعا، ۇيرەنۋگە جانە شەشىم قابىلداۋعا مۇمكىندىك بەرەتىن الگوريتمدەر مەن مودەلدەردى ازىرلەۋدى قامتيدى.
- جاساندى ينتەللەكت بۇگىندە دەنساۋلىق ساقتاۋ، قارجى، كولىك جانە ويىن-ساۋىق سياقتى ءارتۇرلى سالالاردا جۇمىس ىستەي باستادى.
- ول Siri نەمەسە Alexa، اليسا سياقتى داۋىستىق كومەكشىلەرگە اقپارات تاۋىپ بەرەدى، بەلگىلى ءبىر ماسەلەنى شەشۋگە سىزگە ۇسىنىس ايتادى، اۆتونومدى كولىكتەردىڭ ءجۇرۋىن قاداعالايدى جانە ت.ب. كوپ مۇمكىندىكتەرى بار.
- جاساندى ينتەللەكتتىڭ ۇلكەن كولەمدەگى دەرەكتەردى وڭدەۋ جانە ۇلگىلەردى تانۋ قابىلەتى وعان بولجام جاساۋعا، شەشىم قابىلداۋعا كومەكتەسۋگە جانە تاپسىرمالاردى اۆتوماتتاندىرۋعا مۇمكىندىك بەرەدى.
- ChatGPT مودەلى
- OpenAI دەگەن كومپانيا ازىرلەگەن. بىرنەشە ميلليارد اقش دوللارى ينۆەستيسيا رەتىندە قۇيىلىپ، بىرنەشە جىل بويى جان-جاقتى زەرتتەلگەن جاساندى ينتەللەكتتىڭ ءتىل ۇلگىسى.
- ول ءسىزدىڭ سۇراقتارىڭىزعا ادام سياقتى جاۋاپ بەرۋ ءۇشىن، ءتۇسىنۋ ءۇشىن جانە بەرىلگەن تاپسىرمانى ورىنداۋ ءۇشىن كوپتەگەن ماتىندىك دەرەكتەرگە ۇيرەتىلگەن روبوت.
- ChatGPT سىزبەن چات ارقىلى سويلەسە الادى، سۇراقتارعا جاۋاپ بەرەدى، اقپارات بەرەدى جانە ءسىز تاپ بولعان ماسەلەگە وراي كومەك ۇسىنا الادى.
- ChatGPT قالاي جۇمىس ىستەيدى؟
- ChatGPT تەرەڭ وقىتۋ دەپ اتالاتىن ءادىستى، اسىرەسە ترانسفورماتور دەپ اتالاتىن مودەلدى پايدالانادى.
- ءماتىندى كىشىرەك بولىكتەرگە بولەدى، ولاردىڭ قارىم-قاتىناسىن تالدايدى جانە دايەكتى جانە كونتەكستىك سايكەس جاۋاپتاردى سارالايدى.
- ءماتىننىڭ ۇلكەن جيناعىنان گرامماتيكانى، فاكتىلەردى جانە ءتىپتى كەيبىر دارەجەدەگى پايىمداۋدى تۇسىنۋگە باعدارلايدى.
- ارتىقشىلىقتارى مەن شەكتەۋلەرى:
- AI ادام مۇمكىندىكتەرىن كەڭەيتۋگە، قايتالاناتىن تاپسىرمالاردى اۆتوماتتاندىرۋعا جانە تيىمدىلىكتى ارتتىرۋعا مۇمكىندىك بەرەدى.
- ChatGPT پايدالى اقپاراتتار مەن ۇسىنىستار بەرىپ، وقۋ رەسۋرسى رەتىندە ارەكەت ەتە الادى.
دەگەنمەن، ايتىپ وتىرعان جاساندى سانادا دا شەكتەۋلەر بار، ول كەي اقپاراتتىڭ شىن نە وتىرىك ەكەنىن اجىراتا المايدى، ادام سياقتى تۇسىنىك پەن ەموسيا بىلدىرە المايدى. كەيبىر تاپسىرمالاردى مۇلدە قاتە ورىنداۋى مۇمكىن. فەيك اقپاراتتىڭ، فوتولار مەن ۆيدەولاردىڭ كوپ تاراۋىنا سەبەپشى بولىپ قالاتىنى دا سوندىقتان.
- ەتيكالىق ماسەلە دە ماڭىزدى
- AI-عا حاكىم ابايدىڭ بۇكىل شىعارماسىن، ونىڭ ويىن، فيلوسوفياسىن ۇيرەتىپ قويسا، ول ەرتەڭ تۋرا اباي سياقتى شىعارما جازىپ، تولعاتىپ، وي ايتىپ وتىرۋى مۇمكىن. بۇل جەردە ەتيكالىق ماسەلە تۋىندايدى. سوندىقتان ماشينانى وقىتۋدا ونى پايدالانۋدى قامتاماسىز ەتۋ، اۆتورلىق قۇقىق پەن ەتيكا ماسەلەسى وتە ماڭىزدى.
- جاساندى سانا ءسىزدى زەرتتەپ، ءسىزدىڭ بۇكىل اقپاراتىڭىزدى كوممەرسيالىق ماقساتتا پايدالانۋى مۇمكىن. سول ارقىلى پايدالانۋشىنىڭ جەكە ومىرىنە قول سۇعۋى مۇمكىن. سوندىقتان ءقازىر الەمدە بۇل ماسەلە دە وتە قاتتى تالقىعا ءتۇسىپ جاتىر.
- AIء-دى ۇزدىكسىز باقىلاۋدا ۇستاپ، جۇمىسىن باعالاي ءبىلۋ ماڭىزدى، ويتكەنى ونىڭ ادامزاتقا قىزمەتىندە قاۋىپسىزدىك ماسەلەسى دە تۋىنداۋى مۇمكىن. بىلايشا ايتقاندا، ەرتەڭ جاساندى سانا دامىپ كەتسە ول ءوزىن-وزى وقىتىپ، ءوز الدىنا دامىعان وركەنيەت قۇرىپ، ادامزاتتىق دامۋدىڭ جولىنان باس تارتۋى مۇمكىن. ياعني ول ادامزاتقا ءقاۋىپ ءتوندىرۋى بەك ىقتيمال. ءقازىر عالىمداردى الاڭداتىپ وتىرعان وسى ماسەلە.
تاعى ءبىر ايتا كەتەرلىك ماسەلە، ChatGPT مىقتى اقىندارشا ولەڭ شىعارىپ، ءتىسقاققان جازۋشى سياقتى پروزالىق، فانتاستيكالىق شىعارمالاردى دا جازىپ، سۋرەتتىك كەسكىندەمەلەردى دە سالا الادى، بالالارعا ەرتەگى قۇراستىرىپ، كومپانياڭىزدىڭ جارنامالىق ءماتىنىن دە كەرەمەتتەي سيپاتتاپ بەرە الادى. وكىنىشكە وراي، قازاق تىلىندە ءالى دە جەتىك اقپارات بەرە المايدى. نەگىزگى ءتىلى – اعىلشىن.
ءتۇيىن:
توقسان اۋىز ءسوزدىڭ توبىقتاي ءتۇيىنى، جاساندى ينتەللەكت پەن ChatGPT زاماناۋي الەمگە قىزىقتى مۇمكىندىكتەر مەن جاڭا سالالار، دامۋدىڭ جاڭا كەزەڭىن ۇسىنىپ وتىر. AI نەگىزدەرىن جانە ChatGPT سياقتى مودەلدەردىڭ مۇمكىندىكتەرىن ءتۇسىنۋ ارقىلى ءبىز ولاردىڭ شەكتەۋلەرىن بىلە وتىرىپ، ارتىقشىلىقتارىن پايدالانا الامىز. بۇل تەحنولوگيا دامي بەرەدى، ونى پايدالانۋداعى جاۋاپكەرشىلىك پەن ەتيكا ماسەلەسى ماڭىزدى بولىپ قالا بەرەدى. جاساندى ينتەللەكتتى ءبىزدىڭ بولاشاعىمىزدى دامىتاتىن، وركەنيەتتى قوعامدى قالىپتاستىراتىن قۋاتتى قۇرال رەتىندە مويىنداي وتىرىپ، ونىڭ مۇمكىندىكتەرىن زەرتتەپ-زەردەلەۋدى جالعاستىرىپ، جاڭاشا جۇمىس ىستەپ، تىڭ تەحنولوگيالاردى ۇيرەنۋمەن اينالىسا بەرۋ كەرەك. جاساندى سانا جانە ChatGPTء-تى ودان ءارى زەرتتەۋ ادامزات ءۇشىن ءتىپتى دە كوپ مۇمكىندىكتەردى اشادى.
ChatGPT سايتىنا تىركەلۋ ءۇشىن Gmail پوشتانى پايدالانعان ابزال. قازىرگى ۋاقىتتا ChatGPTء-دىڭ «GPT – 3.5» نۇسقاسى تەگىن جۇمىس ىستەپ تۇر. ەگەر ايىنا 20$ قاراجات تولەپ «ChatGPT Plus» جازىلىمىن الساڭىز، GPT-4 نۇسقاسىنا قول جەتكىزە الاسىز. ChatGPT Plus كوپتەگەن ارتىقشىلىقتارعا يە. ول تىكەلەي ينتەرنەتكە قوسىلىپ اقپارات ىزدەي الادى، كوپتەگەن پلاگيندەر ارقىلى ونلاين سەرۆيستەرمەن جۇمىس ىستەپ، سىزگە كومەكشى بولا الادى. پايدالى سىلتەمە: https://chat.openai.com/.