ەرتەرەكتە ادامدار اسپانداعى قالىقتاعان قۇستارعا قاراپ ۇشۋدى ارماندادى. ءعىلىم-بىلىمنىڭ قارقىندى دامۋىمەن ادامزات ۇشاق قۇراستىرىپ، اسپاندى باعىندىردى، بۇل ارمانىن ورىندادى. ودان كەيىن اراداعى الىس قاشىقتىققا قاراماي حات الماسىپ، ءبىر-بىرىن كورۋدى ارمان ەتتى. تەحنولوگيالىق جەتىستىكتەر مەن عالامتوردىڭ ارقاسىندا ادامدار الەمنىڭ ەكى شەتىندە وتىرىپ ۆيدەو، اۋديو، جازبا بايلانىستا وتىرا الاتىن مۇمكىندىككە يە بولدى، بۇل ارمانىنا دا قول جەتكىزدى. ال ءححى عاسىردىڭ باسىنان باستاپ ادامدار وزدەرىنىڭ ومىرلەرىن جەڭىلدەتىپ، بارلىعىن ءوزى ىستەي الاتىن روبوتتار مەن جاساندى ينتەللەكت تۋرالى ويلاي باستادى. ەندى مىنە، ادامزاتتىڭ كەزەكتى ارمانى ءبىزدىڭ كوزىمىزشە ورىندالىپ، كۇندەلىكتى ءومىردىڭ ءبىر بولشەگىنە اينالىپ بارا جاتىر.
جالپى جاساندى ينتەللەكتىنىڭ فەنومەنى كوپشىلىككە سوڭعى 2 جىلدا ايقىن بەلگىلى بولا باستاعانىمەن، بۇل عىلىمي جەتىستىك كوپ جىلداردان بەرى ومىرىمىزگە ەنىپ كەلەدى. وسىدان 26 جىل بۇرىن IBM كورپوراسياسى قۇراستىرعان Deep Blue كومپيۋتەرى سول كەزدەگى شاحماتتان الەم چەمپيونى گارري كاسپاروۆتى ەكى رەت جەڭىپ، جاساندى ينتەللەكتىنىڭ كۇشىن كورسەتكەن.
ال ءقازىر ادامزاتقا ءجي-دىڭ (جاساندى ينتەللەكت) شىنايى كۇشىن العاشقى بولىپ پاش ەتكەن جوبالاردىڭ ءبىرى – ChatGPT بولدى. سۇراعانىڭا قاراي ستۋدەنت بولىپ ديپلوم جازىپ نە تاجىريبەلى كاسىپكەر قۇساپ بيزنەس-جوبا قۇراستىراتىن، دەرەگىن بەرسەڭ كوپشىلىك الدىنداعى سوزىڭە دەيىن جازىپ بەرەتىن بۇل جي تۋرالى بۇگىندە حالىق حاباردار. دەگەنمەن، ودان بولەك الدەكىمدەرگە جاڭا مۇمكىندىك بەرىپ، الدەكىمدەردىڭ كاسىبىن الماستىرۋعا كۇشى جەتەتىن وزگە نەيروجەلىلەر جوق ەمەس. ولاردىڭ قاتارىندا HeyGen Labs جاساندى ينتەللەكتىسىن اتاپ ءوتۋ قاجەت. بۇل جي سوڭعى ايلاردا الەمدىك تانىمالدىلىققا يە بولدى. Heygen Labs كومەگىمەن بەينەجازباداعى اۋديو ءتىلىن باسقا تىلدەرگە اۆتوماتتى تۇردە اۋدارۋعا بولادى. مۇنداي تەحنولوگيا بۇعان دەيىن دە بولعانى بەلگىلى. ءبىراق بۇل نەيروندىق جەلىنىڭ ەرەكشەلىگى – ول بەينەجازباداعى ادامنىڭ داۋىس تەمبرىن تولىقتاي ساقتايدى. سونداي-اق، وزگە تىلدەگى سوزدەرگە قاراي سپيكەردىڭ ەرىندەرىن بەيىمدەيدى. ياعني ايتىلعان جي ارقىلى كەز كەلگەن ادامدى داۋسىن وزگەرتپەي، الەمنىڭ بار تىلىندە سويلەتۋگە بولادى جانە ول ءۇشىن ەشقانداي كۇش سالۋدىڭ قاجەتى جوق. ءبارىن نەيروجەلى ىستەپ بەرەدى.
يننوۆاسيالىق جاڭالىقتاردىڭ جەلى قايدا سوعاتىنىن الدىن الا بولجاپ، ءبىلىپ وتىراتىن Google كومپانياسى دا ءوز جاساندى ينتەللەكتىسىن دامىتىپ كەلەدى. Google اسسيستەنت اتالعان نەيروجەلى ايگىلى Apple كومپانياسىنىڭ Siri مەن ياندەكستىڭ «اليساسىنا» ۇقساس. دەسە دە، كومپانيانىڭ باس ديرەكتورى سۋندار پيچاي جاڭالىقتار كورسەتىلەتىن پرەزەنتاسيالاردىڭ بىرىندە Google اسسيستەنتتىڭ وزگە باسەكەلەستەرىنەن ناقتى ايىرماشىلىعىن كورسەتتى. ايتىلعان نەيروجەلى قولدانۋشى تاراپىنان بەرىلگەن الدىن الا تاپسىرماعا قاراي ءارتۇرلى مەكەمەلەرگە قوڭىراۋ شالىپ، سول ادامنىڭ اتىنان سويلەسە الادى. مىسالى، Google پرەزەنتاسياسىندا نەيروجەلى شاشتارازعا تىكەلەي قوڭىراۋ شالىپ، ناقتى ءبىر ادامدى ءوز شاشتارازىنا الدىن الا جازىپ قويدى. ايتا كەتكەن ءجون، اڭگىمە بارىسىندا Google اسسيستەنت تەك جاتتاندى ءسوز ايتۋمەن شەكتەلگەن جوق. كەرىسىنشە، تىركەۋ بولىمىندەگى ادامنىڭ سۇراقتارىنا ەستى جاۋاپ بەرىپ، نەيروجەلىنى قولدانۋشى ادامعا ىڭعايلى ۋاقىتتى تاڭداي الدى. ءجي-دىڭ بۇل قىزمەتى ChatGPT مەن Heygen Labs سىندى ءدال ءقازىر قولجەتىمدى بولماعانىمەن، جاقىن ۋاقىتتا قولدانىسقا بەرىلۋى مۇمكىن.
ەل اۋزىندا جۇرگەن جاساندى ينتەللەكتىلەردىڭ قاتارىندا Midjourney مەن Musicfy بار. ءجي-دىڭ ءبىرىنشىسى، جازىلعان ماتىنگە قاراي سۋرەت جاسايتىن بولسا، ەكىنشى نەيروجەلى ادامعا مۋزىكا جازۋدا كومەكتەسەدى. ياعني Musicfy قولدانۋشىنىڭ ۆوكالىن پايدالانا وتىرىپ، وزدىگىنەن ءان جازا الادى نەمەسە نەيروجەلىگە جۇكتەلگەن داۋىس ىرعاعىن وڭدەپ، دايىن مۋزىكا شىعارىپ بەرەدى. ال Midjourney ماتىندەگى ءاربىر ناقتى سۇرانىسقا قاراي تۇرمەدەگى اقش پرەزيدەنتىنىڭ سۋرەتىنەن باستاپ، سۇراعان ادامنىڭ فانتازياسىنا قاراي كەز كەلگەن سۋرەت دايىنداپ بەرۋگە ءازىر. ءبىراق العاشىندا تەگىن بولعان بۇل جي-لەردى قولدانۋ قازىرگى ۋاقىتتا اقىلى. وسىعان قاراي الداعى جىلدارى جاساندى ينتەللەكت ءىرى اقشا مەن بيزنەس كوزىنە اينالادى دەگەن بولجام جاساي الامىز.
ايتىلعان نەيروجەلىلەر ۇيالى تەلەفونداعى قوسىمشا نە كومپيۋتەردەگى باعدارلاما رەتىندە بولسا، تەمىرگە جان بىتىرەتىن روبوتتاردىڭ ىشىندە ورناتىلعان جاساندى ينتەللەكتىلەر دە قارقىندى دامىپ كەلەدى. ونىڭ جارقىن مىسالىن يزرايلدىك Travel كومپانياسى كورسەتتى. يزرايلدىك كومپانيا چيليدەگى Unifrutti كومپانياسىمەن بىرگە جاساندى ينتەللەكتىسى بار روبوت-پلاتفورما ارقىلى الما جينادى. ۇشاتىن دروندار قوزعالمالى پلاتفورماعا سىم ارقىلى بايلانىسقان، ال بۇل قۇرىلىمنىڭ بارلىعىن جي باسقارادى. دروندار جەمىس اعاشتارىنىڭ اراسىنان ۇشىپ، تەك پىسكەن المالاردى ادامنىڭ كومەگىنسىز جيناپ شىقتى. جوبا ازىرلەۋشىلەرى جاساندى ينتەللەكتىسى بار روبوتتاردى فەرمەرلىكتىڭ بولاشاعى سانايدى.
ءتۇيىن:
بيىل 28 ناۋرىز كۇنى Future of life ۇيىمىنىڭ سايتىندا Tesla، SpaceX جانە Twitter باسشىسى يلون ماسك، Apple كومپانياسىنىڭ نەگىزىن قالاۋشىلاردىڭ ءبىرى ستيۆ ۆوزنياك جانە Pinterest نەگىزىن قالاۋشىلاردىڭ ءبىرى ەۆان شارپ جي جاساۋشىلارعا اشىق حات جولدادى. سونداي-اق، قۇجاتقا جاساندى ينتەللەكت سالاسىندا جۇمىس ىستەيتىن 1 مىڭنان استام ساراپشى قول قويدى. اشىق حاتتا قۋاتتى نەيروجەلىلەردى دامىتۋدى كەم دەگەندە التى ايعا توقتاتۋ قاجەتتىلىگى تۋرالى ايتىلعان.
«ءبىز جاساندى ينتەللەكتتى زەرتتەيتىن بارلىق زەرتحانالاردى GPT-4-تەن قۋاتتىراق بارلىق جۇيەلەردى دامىتۋدى كەم دەگەندە التى ايعا دەرەۋ توقتاتۋعا شاقىرامىز. بۇل شىنايى ورىندالۋى كەرەك»، – دەپ اتاپ ءوتتى حات اۆتورلارى.
ءيا، «ادامزاتتى مارسقا جىبەرەمىن» دەيتىن يلون ماسك سىندى الەمدەگى ەڭ وزىق كومپانيا باسشىلارىنىڭ بۇلاي دابىل قاعۋى بوستان بوس بولماس. امەريكالىق Goldman Sachs بانكىنىڭ دەرەگىنشە، نەيروجەلىلەردى ەنگىزۋگە بايلانىستى بۇكىل الەم بويىنشا 300 ميلليونعا جۋىق ادام جۇمىسسىز قالۋى مۇمكىن. بۇل ونسىز دا كۇيبەلەڭ كۇيدە تۇرعان جەر شارىن ودان ءارى توزدىرارى انىق. دەگەنمەن، اتا-بابامىز «جاقسى ءسوز جارىم ىرىس» دەمەكشى، نەيروجەلىلەر ادامزاتقا يگىلىك الىپ كەلەر دەپ سەنەمىز.