وقۋ-اعارتۋ مينيسترلىگى مەن Freedom Holding Corp. ءبىلىم بەرۋ رەسۋرستارىن دامىتۋ بويىنشا ىنتىماقتاستىق قارىم-قاتىناس ورناتۋ ماقساتىندا مەموراندۋمعا قول قويدى، دەپ حابارلايدى ۆەدومستۆونىڭ باسپا ءسوز قىزمەتى.
بۇل قۇجات مەملەكەت باسشىسىنىڭ مەكتەپكە دەيىنگى، ورتا، تەحنيكالىق جانە كاسىبي ءبىلىم بەرۋ ۇيىمدارىنىڭ قاجەتتى فۋنكسيونالدارى ەنگىزىلگەن ءبىرىڭعاي ونلاين ءبىلىم بەرۋ پلاتفورماسىن ازىرلەۋ تۋرالى تاپسىرماسى اياسىندا جۇزەگە اسىرىلۋدا.
وقۋ-اعارتۋ ۆيسە-مينيسترى اراي ورازوۆا اتاپ وتكەندەي، قازىرگى ۋاقىتتا ءبىلىم بەرۋدىڭ بارلىق دەڭگەيىندە پروسەستەردى اۆتوماتتاندىرۋعا مۇمكىندىك بەرەتىن ءبىرىڭعاي سيفرلىق ەكوجۇيە قۇرۋ قاجەتتىلىگى بايقالادى. بۇل ماقساتقا جەتۋ ءۇشىن مينيسترلىك Freedom Holding Corp.ء-تىڭ قولداۋىمەن ءبىلىم بەرۋ ونىمدەرىنىڭ ماركەتپلەيسىن ازىرلەۋ جۇمىستارىن جۇرگىزۋدە. مۇندا جاساندى ينتەللەكت قۇرالدارى ارقىلى ءاربىر بالانىڭ تالانتىن اشۋعا ارنالعان مۇمكىندىكتەر ۇسىنىلادى. بۇل بالالارعا ەرتە جاستان باستاپ ءوز تالانتتارىن دامىتىپ، ماماندىق تاڭداۋعا كومەكتەسەدى، ەلىمىزدىڭ ادامي كاپيتالىن دامىتۋعا جانە ءمۇعالىم، بالا مەن اتا-انا اراسىنداعى كوممۋنيكاسيانى جاقسارتۋعا مۇمكىندىك بەرەدى.
تاراپتار ۇلتتىق ءبىرىڭعاي ءبىلىم بەرۋ پلاتفورماسى ارقىلى ءاربىر ءبىلىم الۋشى ءۇشىن ونلاين وقۋدى قولجەتىمدى جانە ساپالى ەتۋدىڭ ماڭىزدىلىعىن تالقىلادى. سونىمەن قاتار، ءبىلىم بەرۋ ۇيىمدارىندا پلاتفورمانى ىلگەرىلەتۋ مەن دامىتۋ، بىرلەسكەن جوبالاردى جۇزەگە اسىرۋ، ستەيكحولدەرلەرمەن سەمينارلار مەن كونفەرەنسيالار وتكىزۋ تۋرالى كەلىسىمگە كەلدى.
بۇل ىنتىماقتاستىق ءبىلىم بەرۋ سالاسىنداعى پروسەستەردى سيفرلاندىرۋ ارقىلى وقۋشىلاردىڭ ءبىلىم الۋ ساپاسىن ارتتىرۋعا، ولاردىڭ تالانتتارىن ەرتە جاستان دامىتۋعا جانە ءبىلىم بەرۋ ۇيىمدارىنىڭ جۇمىسىن ءتيىمدى ەتۋگە باعىتتالعان.