ءبىز ءۇشىن ەڭ ماڭىزدىسى – ءار ازاماتتىڭ تاۋەلسىزدىك يگىلىگىن سەزىنە الۋى. ونىڭ باستى كورىنىسى – ەلدەگى بەيبىت ءومىر، قوعامداعى تۇراقتىلىق پەن تىنىشتىق. سونداي-اق، حالىقتىڭ تۇرمىس ساپاسىنىڭ جاقسارۋى جانە جاستاردىڭ بولاشاققا نىق سەنىممەن قاراۋى.بارلىق باستامامىز وسىعان باعىتتالۋدا.ءبىز تۇعىرى مىعىم ەل بولۋ جولىندا كەدەرگىلەردى ەڭسەرىپ، قيىندىقتاردى جەڭىپ كەلەمىز. مۇنىڭ بارىنە بەرەكەلى بىرلىك پەن ەسەلى ەڭبەك ارقىلى جەتتىك.
قاسىم-جومارت توقايەۆ.
2009 جىلدىڭ باستى وقيعالارى
- نۇرسۇلتان نازاربايەۆتىڭ «داعدارىستان - جاڭارۋ مەن دامۋعا» اتتى قازاقستان حالقىنا جولداۋى
- «نۇر وتاننىڭ» 10 جىلدىق مەرەيتويى
- 2009-2014 جىلدارعا ارنالعان داعدارىسقا قارسى باعدارلاما
- سەمەي يادرولىق پوليگونىندا سىناقتاردىڭ جويىلعانىنا - 20 جىل!
- دۇنيەجۇزىلىك جانە ءداستۇرلى دىندەر باسشىلارىنىڭ ءىىى سەزى.
- قازاقستان،رەسەي،بەلارۋس مەملەكەتتەرىنىڭ كەدەن وداعىنىڭ قۇرىلۋى
- ۇدەمەلى يندۋستريالىق-يننوۆاسيالىق دامۋ اياسىندا قازاقستان رەسپۋبليكاسىنىڭ 2020 جىلعا دەيىنگى دامۋ ستراتەگياسىنىڭ قابىلدانۋى.
بۇل جىلى مەملەكەتتىڭ الەۋمەتتىك-ەكونوميكالىق ساياساتىنىڭ نەگىزگى باعدارى حالىقتىڭ الەۋمەتتىك قامسىزداندىرىلۋىن قامتاماسىز ەتۋگە، داعدارىس كەزەڭىن ەڭسەرۋ ءۇشىن ۇلتتىق ەكونوميكانىڭ قۋاتىن ارتتىرۋعا باعىتتالدى. الەۋمەتتىك-ەكونوميكالىق تۇراقتاندىرۋ مەن داعدارىستان كەيىنگى دامۋدىڭ ءتيىمدى جولدارىن قاراستىرۋ ماسەلەلەرى ۇكىمەتتىك جيىنداردىڭ تۇراقتى تاقىرىبىنا اينالدى. پرەزيدەنتتىڭ ءداستۇرلى جولداۋى دا وسى قىرىنان ەرەكشەلەندى. بازالىق ينفراقۇرىلىمدى دامىتۋعا، ەكونوميكانى مودەرنيزاسيالاۋعا، قولعا الىنعان ينۆەستيسيالىق جوبالاردى قارجىلاندىرۋ مەن جۇزەگە اسىرۋعا، جەرگىلىكتى اۆتوكولىك جولدارى قۇرىلىستارىن جۇرگىزۋگە، قايتا جاڭعىرتۋعا، جوندەۋگە، الەۋمەتتىك ينفراقۇرىلىمدى جاڭارتۋعا، ونىڭ ىشىندە، مەكتەپتەر مەن اۋرۋحانالارعا ەرەكشە كوڭىل بولۋگە، ناقتى ەلدى-مەكەندەردە جەرگىلىكتى ماڭىزدى نىسانداردى دامىتۋعا، ايماقتىق جۇمىسپەن قامتۋ مەن كادرلاردى قايتا دايارلاۋعا، جۇمىس ورىندارىن كوپتەپ اشۋعا جانە ت.ب ايىرىقشا باسىمدىق بەرىلدى. ەلباسى بۇل رەتتە ۇكىمەتتىڭ 2009-2011 جىلدارعا ارنالعان داعدارىسقا قارسى باعدارلاماسىنىڭ بەس باعىتى – قارجى سەكتورىن، قۇرىلىس سالاسىن، شاعىن جانە ورتا بيزنەستى، اگروونەركاسىپتىك كەشەندى، يننوۆاسيالىق-يندۋستريالدىق دامۋدى قولداۋعا ەرەكشە ماڭىز بەردى. 2010 جىلعا ارنالعان ۇدەمەلى يندۋستريالدى-يننوۆاسيالىق دامۋ باعدارلاماسى قۇنى 42 ملرد.دوللار بولاتىن 83 ءىرى جوبانى بىرىكتىردى.مۇنىڭ ءوزى ەل ەكونوميكاسىن يننوۆاسيالىق باعىتقا جۇمىلدىرۋ ارقىلى جاڭا كەدەندىك وداقتاعى قازاقستاننىڭ باسەكەگە قابىلەتتىلىگىن ارتتىرۋ ماقساتىن كوزدەدى.تۇرعىنداردى الەۋمەتتىك قورعاۋ سالاسىندا جول قۇرىلىستارىن جۇرگىزۋدى،الەۋمەتتىك نىسانداردى سالۋدى، تۇرعىن ۇي-كوممۋنالدىق شارۋاشىلىقتىڭ ينفراقۇرىلىمدارىن دامىتۋدى كوزدەگەن «جول كارتاسى» باعدارلاماسى ايتارلىقتاي تابىستى بولدى. 400 مىڭداي جاڭا جۇمىس ورىندارى اشىلدى. شاعىن جانە ورتا بيزنەستى مەملەكەتتىك قولداۋ ناتيجەسىندە وسى سالاداعى باعدارلامالاردى نەسيەلەۋگە 340 ملرد.تەڭگە ءبولىندى.سول ارقىلى جۇمىسسىزدىق 6،5 پايىزعا تومەندەدى.
ءبىزدىڭ دايەكتەمە: 2009 جىلى مەملەكەت باسشىسىنىڭ قاتىسۋىمەن وتكەن «جاڭا يندۋستريالاندىرۋ – جاڭا مۇمكىندىكتەر» اتتى جالپىۇلتتىق ينتەراكتيۆتى تەلەكوپىردە وڭىرلەردە يندۋستريالدىق-يننوۆاسيالىق دامۋ باعدارلاماسى اياسىندا جۇزەگە اسىرىلاتىن جوبالار تانىستىرىلدى.
جالپى سوماسى 114 ملرد. تەڭگەنى قۇرايتىن 16 يندۋستريالدىق جوبا ىسكە قوسىلدى. مۇنىڭ ءوزى ءتورت مىڭداي جاڭا جۇمىس ورنىن اشۋعا مۇمكىندىك بەرەدى. جاھاندىق ەكونوميكاداعى داعدارىستى كەزەڭگە قاراماستان قازاقستاننىڭ ينۆەستيسيالىق تارتىمدىلىعى جوعارى ناتيجەلەرمەن ەرەكشەلەندى. قۇنى 3 ملرد.دوللار بولاتىن 170 وندىرىستىك جانە ينفراقۇرىلىمدىق نىسان پايدالانۋعا بەرىلدى،بۇل كاسىپورىنداردا 9 مىڭ جۇمىس ورىندارى اشىلدى. ستراتەگيالىق ماڭىزدى نىساندار: «تۇركمەنستان-وزبەكستان-قازاقستان-قىتاي» گاز قۇبىرى (قازاقستاندىق بولىگى 1300 شاقىرىم)، «سولتۇستىك-وڭتۇستىك» ءجوعارىۆولتتى ەلەكتر تاراتۋ جەلىسى (1100 شاقىرىم)، استانا قالاسىنداعى لوكوموتيۆ قۇراستىرۋ زاۋىتى، قۇمكولدەگى گاز وڭدەۋ زاۋىتى،»استانا-بۋراباي» اۆتوبانى ىسكە قوسىلدى.
جالپى، 2009 جىل قازاق ەلى ءۇشىن ينۆەستيسيالىق تابىس جىلى بولدى دەۋگە بولادى. ەلباسىنىڭ تىكەلەي ارالاسۋىمەن جانە ونىڭ حالىقارالىق بەدەلىنىڭ ارقاسىندا فرانسيا، وڭتۇستىك كورەيا، يتاليا، جۇڭگو،تۇركيا، بەلارۋس مەملەكەتتەرىمەن 25 ملرد. دوللاردىڭ بىرلەسكەن جوبالارىن يگەرۋ تۋرالى ۋاعدالاستىقتارعا قول جەتكىزىلدى.
24-26 قاڭتار
ەلباسى مەملەكەتتىك ساپارمەن ءۇندىستان رەسپۋبليكاسىنا باردى. نۇرسۇلتان نازاربايەۆ پەن ءۇندىستان پرەزيدەنتى پراتيبحا ديەۆيسينگح پاتيل ەكىجاقتى ماڭىزدى ماسەلەلەلەر توڭىرەگىندە پىكىر الماستى. دەليدە وتكەن بيزنەس-فورۋمدا قازاق باسشىسى ءۇندىستاندىق كاسىپكەرلەردى قازاقستانعا ينۆەستيسيا قۇيۋعا شاقىردى.
28-29 قاڭتار
مەملەكەت باسشىسى شۆەيساريا كونفەدەراسياسىنىڭ داۆوس قالاسىندا وتكەن ءداستۇرلى دۇنيەجۇزىلىك ەكونوميكالىق فورۋمعا قاتىستى. القالى جيىن اياسىندا نۇرسۇلتان نازاربايەۆ ءبىرقاتار مەملەكەتتەر باسشىلارىمەن، قارجىلىق ۇيىمدار جەتەكشىلەرىمەن ماڭىزدى كەلىسسوزدەر جۇرگىزدى.
3 اقپان
جۇمىس ساپارىمەن گەرمانيا فەدەراتيۆتىك رەسپۋبليكاسىنا بارعان نۇرسۇلتان نازاربايەۆ گفر-دىڭ فەدەرالدى پرەزيدەنتى حورست كەلەرمەن جانە ەل كانسلەرى انگەلا مەركەلمەن كەزدەستى. وسى ساپار اياسىندا قازاقستاننىڭ گەرمانياداعى جىلى اشىلدى. ەلباسى بەرليندە وتكەن ەكى ەل كاسىپكەرلەرىنىڭ بيزنەس-فورۋمىندا ءسوز سويلەدى.
4 - 5 اقپان
ماسكەۋدە ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) ءسامميتى جانە ەۋرازيالىق ەكونوميكالىق قوعامداستىقتىڭ مەملەكەتارالىق كەڭەسىنىڭ كەزەكتەن تىس باسقوسۋى ءوتتى. ماسكەۋ ساپارى اياسىندا نۇرسۇلتان نازاربايەۆ پەن رەسەي پرەزيدەنتى دميتريي مەدۆەديەۆتىڭ كەزدەسۋى بولدى. مەملەكەتتەرارالىق ءبىرقاتار ماڭىزدى قۇجاتتارعا قول قويىلدى.
25 اقپان
قازاقستاندا ەكىنشى ۇلتتىق حالىق ساناعى باستالىپ، 6-ناۋرىز كۇنى ستاتيستيكا اگەنتتىگى ونىڭ جالپىلاما قورىتىندىسىن جاريالادى. بۇل كۇنى تاڭعى ساعات 8.00-دە ەلىمىز بويىنشا ءبىر ۋاقىتتا 50 مىڭعا جۋىق ەسەپشىلەر ساناققا كىرىستى. ساناقتىڭ رەسمي دەرەگى بويىنشا قازاقستانداعى مەملەكەت قۇراۋشى ۇلتتىڭ سانى تۇڭعىش رەت 63 پايىزدان استى. قورىتىندى قۇجاتقا سايكەس ساناقتان 15 ميلليون 555000 ادام وتكەن.
6 ناۋرىز
ەلباسى قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسىندا ءسوز سويلەپ، ءوزىنىڭ «داعدارىستان جاڭارۋ مەن دامۋعا» اتتى قازاقستان حالقىنا جولداۋىن جاريا ەتتى.
تاريحي دەرەك
«ءقادىرلى قازاقستاندىقتار! ءقازىر بۇكىل الەم جۇرتشىلىعى ەكونوميكالىق داعدارىستىڭ قيىندىقتارىن باستان وتكەرۋدە.جاھاندىق داعدارىس داۋىلى الپاۋىت مەملەكەتتەردى دە شايقالتا باستاعانىن ءبارىڭىز كورىپ، ءبىلىپ وتىرسىزدار. داعدارىس سالقىنى ءبىزدى دە اينالىپ وتكەن جوق...مەملەكەت داعدارىستىڭ الدىن الۋدىڭ بارلىق شارالارىن جاساۋدا. ۇلتتىق قوردان بولىنگەن اۋقىمدى قاراجات ءقازىر وتاندىق ەكونوميكانىڭ كىدىرىسسىز جۇمىس ىستەۋىنە قىزمەت ەتە باستادى.الەۋمەتتىك كەپىلدىكتەر تولىعىمەن ساقتالىپ وتىر.ولاي بولسا، بۇل داعدارىستان دا ءبىزدىڭ امان-ەسەن وتەتىنىمىز ايدان انىق. داعدارىستار وتەدى، كەتەدى. ال، مەملەكەت تاۋەلسىزدىگى، ۇلت مۇراتى، ۇرپاق بولاشاعى سياقتى قۇندىلىقتار ماڭگى قالادى. الدىمىزدا ءبىزدى ۇلكەن بەلەس كۇتىپ تۇر. ول – قازاقستان تاۋەلسىزدىگىنىڭ جيىرما جىلدىعى...تاۋەلسىزدىك – اتا-بابالارىمىزدىڭ جۇزدەگەن جىلدارمەن ولشەنەتىن ارمان-اڭسارىنىڭ جۇزەگە اسقان اقيقاتى. سول سەبەپتى تاۋەلسىزدىكتىڭ ءاربىر جىلىنىڭ ءبىز ءۇشىن ءمانى بولەك، ماڭىزى ايرىقشا. حالقىمىزدىڭ باسىنا تۇسكەن قانداي دا ءبىر سىناققا قاراماستان ءبىز تاۋەلسىزدىگىمىزدى نىعايتۋ جولىنداعى جاسامپاز ىستەرىمىزدى جالعاستىرا بەرمەكپىز....قيىندىق اتاۋلىنى جەڭەتىن ءبىر-اق كۇش بار، ول – بىرلىك. ەلىڭدى، جەرىڭدى قورعاۋ ءۇشىن بىرلىك قانشالىقتى قاجەت بولسا، تاۋەلسىزدىك جەمىستەرىن، بۇگىنگى قول جەتكەن تابىستارىمىزدى ساقتاپ قالۋ ءۇشىن ول سونداي قاجەت.
(ەلباسى ن.ءا.نازاربايەۆتىڭ
قازاقستان حالقىنا جولداۋىنان. 2009 جىلعى 6 ناۋرىز.).
11 ناۋرىز
ەلوردادا ءىى استانا ەكونوميكالىق فورۋمى ءوز جۇمىسىن باستادى. فورۋم اياسىندا مەملەكەت باسشىسى ساۋد ارابياسى كورولدىگىنىڭ ەكونوميكا جانە جوسپارلاۋ ءمينيسترى حالەد بەن مۋحاممەد ال-كسەبيمەن، بۇۇ باس حاتشىسىنىڭ ورىنباسارى، بۇۇ ەۋروپالىق ەكونوميكالىق ۇيىمىنىڭ اتقارۋشى حاتشىسى يا.كۋبيشپەن ەكىجاقتى كەزدەسۋلەر وتكىزدى.
16-17 ناۋرىز
نۇرسۇلتان نازاربايەۆ رەسمي ساپارمەن بىرىككەن اراب امىرلىكتەرىندە بولدى. ەلباسى ءباا پرەزيدەنتى شەيح حاليفا بەن زايد ال-ناحايانمەن كەزدەسىپ، ەكى ەل اراسىنداعى ىنتىماقتاستىقتى كوزدەيتىن ماڭىزدى ءتورت قۇجاتقا (قازاقستان مەن ءباا اراسىنداعى ازاماتتىق جانە كوممەرسيالىق ىستەر بويىنشا قۇقىقتىق كومەك تۋرالى كەلىسىم، قازاقستان مەن ءباا اراسىنداعى قىلمىسكەرلەردى ۇستاپ بەرۋ تۋرالى كەلىسىم، قازاقستان مەن ءباا اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى كەلىسىم، قازاقستان سىرتقى ىستەر مينيسترلىگى مەن ءباا سىرتقى ىستەر مينيسترلىگى اراسىنداعى ساياسي كونسۋلتاسيالار جونىندەگى ءوزارا تۇسىنىستىك تۋرالى مەموراندۋم) قول قويىلدى.
16-18 ءساۋىر
مەملەكەت باسشىسى مەملەكەتتىك ساپارمەن جۇڭگو حالىق رەسپۋبليكاسىنا باردى. قحر ءتوراعاسى حۋ سزينتاومەن، قحر مەملەكەتتىك كەڭەسىنىڭ پرەمەرى ۆەن سزياباومەن كەزدەسۋلەردە ەكىجاقتى مەملەكەتتىك قارىم-قاتىناستىڭ ماڭىزدى ۋاعدالاستىقتارىنا قول جەتكىزىلدى. وسى ساپارى اياسىندا نۇرسۇلتان نازاربايەۆ «داعدارىستان كەيىنگى باسقارۋ» تاقىرىبىمەن حاينان پروۆينسياسىنىڭ سانيا قالاسىندا وتكەن ءداستۇرلى جىل سايىنعى بواو-ازيا ەكونوميكالىق فورۋمىنا قاتىستى.
28 ءساۋىر
الماتىدا حالىقارالىق ارالدى قۇتقارۋ قورىنىڭ قۇرىلتايشى مەملەكەتتەر باسشىلارىنىڭ ءسامميتى ءوتتى. وعان نۇرسۇلتان نازاربايەۆ ءتوراعالىق ەتتى. ارال تەڭىزى باسسەينىنە كومەك كورسەتۋدىڭ 3ء-شى باعدارلاماسى جاسالاتىن بولىپ كەلىسىلدى. مەملەكەت باسشىسى قازاقستان تارابى سولتۇستىك ارالدى سۋمەن كوبىرەك قامتاماسىز ەتۋگە جانە سىرداريا وزەنىنىڭ وتكىزۋ قابىلەتىن كۇشەيتۋگە باعىتتالعان «سىرداريا وزەنىنىڭ ارناسىن جانە ارال تەڭىزىنىڭ سولتۇستىك بولىگىن رەتتەۋ» جوباسىنىڭ ءبىرىنشى كەزەڭىن اياقتاعانىن حابارلادى. سامميت اياسىندا قازاقستان مەن وزبەكستان پرەزيدەنتتەرى ن.نازاربايەۆ پەن ي.كاريموۆ ەكىجاقتى كەزدەسۋ وتكىزىپ، مەملەكەتارالىق ىنتىماقتاستىقتىڭ ماڭىزدى ماسەلەلەرىن تالقىلادى.
13 مامىر
قازاقستانعا كورەيا رەسپۋبليكاسىنىڭ پرەزيدەنتى لي مەن باك رەسمي ساپارمەن كەلدى. ەكى مەملەكەت باسشىلارىنىڭ مازمۇندى كەلىسسوزدەرىنەن كەيىن بىرلەسكەن مالىمدەمە قابىلدانىپ، ءبىرقاتار ماڭىزدى قۇجاتتارعا قول قويىلدى.
18 ماۋسىم
سەمەيدە يادرولىق پوليگونداعى سىناقتاردىڭ توقتاتىلۋىنىڭ 20 جىلدىعىنا ارنالعان سالتاناتتى شارا ءوتتى. (سۋرەتتە: سىناق پوليگونىنىڭ ماڭگىگە جابىلۋىنىڭ سوڭعى ءساتى).
1 شىلدە
نۇر-سۇلتانداعى بەيبىتشىلىك جانە كەلىسىم سارايىندا، ن.ءا.نازاربايەۆتىڭ قاتىسۋىمەن الەمدىك جانە ءداستۇرلى دىندەر كوشباسشىلارىنىڭ ءىىى سەزى اشىلدى. وعان الەمنىڭ ءار قيىرىنان 400-دەي دەلەگات قاتىستى.
2 تامىز
مەملەكەت باسشىسى «جەتىگەن – قورعاس» تەمىر جول جەلىسى قۇرىلىسىنىڭ اشىلۋ سالتاناتىنا قاتىستى.
30 تامىز
قازاقستان تاريحىندا العاش رەت كونستيتۋسيا كۇنىنە وراي نۇر-سۇلتانداعى «قازاق ەلى» مونۋمەنتى الاڭىندا اسكەري شەرۋ ءوتتى. شەرۋدە ەلباسى، قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازاربايەۆ ءسوز سويلەدى.
12 قىركۇيەك
اقتاۋدا قازاقستان، رەسەي، ازەربايجان، تۇرىكمەنستان مەملەكەتتەرى باسشىلارىنىڭ بەيرەسمي كەزدەسۋى بولىپ ءوتتى. ەكونوميكالىق بايلانىستى نىعايتۋدىڭ، مەملەكەتتەر قاۋىپسىزدىگىن قامتاماسىز ەتۋدىڭ ماڭىزدى ماسەلەلەرى قارالدى.
26 قازان
نۇر-سۇلتانداعى بەيبىتشىلىك پەن كەلىسىم سارايىندا قازاقستان حالقى اسسامبلەياسىنىڭ XV سەسسياسى ءوتتى. «ۇلتتىق بىرلىك – ءبىزدىڭ ستراتەگيالىق تاڭداۋىمىز» تاقىرىبىمەن وتكەن سەسسياعا نۇرسۇلتان نازاربايەۆ ءتوراعالىق ەتتى.
27 قاراشا
مەملەكەت باسشىسى مينسكىدە وتكەن كەدەندىك وداققا قاتىسۋشى مەملەكەتتەر - قازاقستان، رەسەي، بەلارۋس ەلدەرى پرەزيدەنتتەرىنىڭ ءۇشجاقتى كەزدەسۋىنە قاتىستى. كەدەن وداعىن قۇرۋ تۋرالى قۇجاتقا قول قويىلدى. وسى قۇجاتقا سايكەس، 2010 جىلعى شىلدەنىڭ 1-ىنەن باستاپ ءۇش مەملەكەتتىڭ – قازاقستان، بەلارۋس پەن رەسەيدىڭ ءبىرتۇتاس كەدەن اۋماعى جۇمىس ىستەي باستادى.
4 جەلتوقسان
گرەكيا استاناسى افينىدا وتكەن ەقىۇ سىرتقى ىستەر مينيسترلەرى كەڭەسىنىڭ 17ء-شى وتىرىسىندا قازاقستان ەۋروپاداعى قاۋىپسىزدىك جانە ىنتىماقتاستىق ۇيىمىنا ءتوراعالىق ەتۋ تىزگىنىن رەسمي تۇردە قابىلداپ الدى.
12 جەلتوقسان
نۇر–سۇلتاندا ەلباسى نۇرسۇلتان نازاربايەۆتىڭ جانە قحر ءتوراعاسى حۋ سزينتاونىڭ قاتىسۋىمەن «تۇرىكمەنستان - وزبەكستان - قازاقستان - جۇڭگو» گاز قۇبىرىنىڭ قازاقستاندىق ۋچاسكەسىن پايدالانۋعا بەرۋ ءراسىمى ءوتتى. «الەمدە قانداي جاعداي بولماسىن، قازاقستان مەن جۇڭگو اراسىنداعى قاتىناس ىزگىلىكتى جانە دوستىق جاعدايىندا قالا بەرەدى. بۇگىن قازاقستان مەن جۇڭگو اراسىنداعى ەنەرگەتيكالىق ارىپتەستىكتىڭ اسا ماڭىزدى جوباسى جۇزەگە اسىپ وتىر. جۇڭگو سىزدەردىڭ ەلمەن ىنتىماعىن ودان ءارى ارتتىرۋعا مۇددەلى ءارى دايىن»، - دەدى قحر ءتوراعاسى حۋ سزينتاو.
جىل ءتۇيىنى
«... ءبىز الەمدىك قوعامداستىق ماقۇلداعان، كەيىننەن مويىنداعان ءوز جولىمىزعا، قازاقستاندىق جولعا تۇستىك. مىنە، 18 جىلدان بەرى كۇن سايىن جانە ساعات سايىن ءبىز جاڭا قازاقستاندى – ءوز ماقساتتارىمىز بەن ۇمىتتەرىمىزدىڭ مەملەكەتىن قۇرۋدا، ءوز جوسپارىمىزدى ىسكە اسىرىپ كەلەمىز، – دەپ اتاپ ءوتتى ن.نازاربايەۆ. – وتكەن جىلدار ىشىندە قازاقستاندىق مەملەكەتتىلىك نىعايدى، حالىقتىڭ بىرلىگى ساقتالدى. قارقىندى جاڭعىرۋ ستراتەگياسى جۇزەگە اسىرىلدى، زاماناۋي نارىقتىق ەكونوميكا قالىپتاستى. ءبىز ينتەگراسياعا شاقىرعان كوپۆەكتورلى سىرتقى ساياساتتىڭ نەگىزىن قالادىق – بۇل ءسوزدىڭ كەڭ كولەمدەگى ماعىناسىنا كەلسەك، بۇل ءبىزدىڭ باستى مەملەكەتتىك باسىمدىعىمىز بولدى. تاۋەلسىزدىك جىلدارىندا قول جەتكىزىلگەن وسىنداي بارلىق جەتىستىكتەرىمىزدىڭ ناتيجەسىندە قازاقستان ەقىۇ-نا ءتوراعا بولعالى وتىر. بۇل – ءبىزدىڭ تاعى ءبىر ورتاق ەڭبەگىمىزدىڭ جوعارى باعالانۋى...»
(ەلباسى نۇرسۇلتان نازاربايەۆتىڭ قازاقستان رەسپۋبليكاسىنىڭ تاۋەلسىزدىگىنىڭ جاريالانعانىنا 18 جىل تولۋىنا وراي وتكەن سالتاناتتى جيىندا سويلەگەن سوزىنەن).
ستاتيستيكا:
2009 جىلى ەلباسىنىڭ تىكەلەي قاتىسۋىمەن 500-دەن اسا حاتتامالىق ءىس-شارالار وتكەن. پرەزيدەنت رەسپۋبليكا وڭىرلەرىنە 24 رەت، شەت ەلدەرگە 14، كوپجاقتى سامميتكە 11، حالىقارالىق فورۋمدارعا 5 رەت رەسمي ساپارمەن بارعان. ءبىر جىل ىشىندە بارلىعى 120 زاڭ قابىلدانىپ، 192 جارلىققا قول قويىلدى.