وتكەن جىلى بالالار جىلى اياسىندا قازاقستان رەسپۋبليكاسى پرەزيدەنتىنىڭ ءارحيۆى «مەنىڭ وتباسىمنىڭ تاريحى ارحيۆ قۇجاتتارىندا» مەكتەپتىك وقۋ-زەرتتەۋ جۇمىستارىنىڭ بايقاۋىن وتكىزۋگە باستاماشى بولعان ەدى. بايقاۋدى قورىتىندىلاۋ «اشىق قوعامعا – اشىق ارحيۆ» اتتى ءى حالىقارالىق ارحيۆشىلەر كونگرەسى اياسىندا ۇيىمداستىرىلدى (2022 ج. 19–21 قازان).
بيىل دا ءداستۇردى جالعاستىرا وتىرىپ، ارحيۆ الماتى قالاسى ءبىلىم باسقارماسىمەن بىرلەسىپ، قالاداعى جالپى ءبىلىم بەرەتىن مەكتەپتەردىڭ وقۋشىلارى اراسىندا «مەنىڭ وتباسىمنىڭ تاريحى ارحيۆ قۇجاتتارىندا» اتتى ءىى بايقاۋىن جاريالادى. ءىس-شارانىڭ ماقساتى – جالپى ءبىلىم بەرەتىن وقۋ ورىندارى وقۋشىلارىنىڭ ينتەللەكتۋالدىق جانە تۇلعالىق دامۋى، ولاردىڭ تاريحتى وقىتۋ سالاسىنداعى عىلىمي-زەرتتەۋ جۇمىستارىنىڭ ادىستەرى مەن تاسىلدەرىن مەڭگەرۋى، جاستاردى قازاقستاننىڭ تاريحي-مادەني مۇراسىن، ۇلتتىق تاريحقا قاتىستى دەرەكتى دەرەككوزدەردى، تۋعان جەر، وتباسى تۋرالى دەرەكتى دەرەككوزدەردى زەرتتەۋ مەن ساقتاۋعا تارتۋ بولىپ تابىلادى.
27 ناۋرىزدا قازاقستان رەسپۋبليكاسى پرەزيدەنتىنىڭ ارحيۆىندە زەرتتەۋشى ر.ر. شاياحمەتوۆپەن كەزدەسۋ ۇيىمداستىرىلىپ، وعان الماتى قالاسىنىڭ جالپى ءبىلىم بەرەتىن مەكتەپتەرىنىڭ مۇعالىمدەرى مەن وقۋشىلارى شاقىرىلدى. رينات راۆيل ۇلى شاياحمەتوۆ – قازاقستان كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى قىزمەتىن اتقارعان (1946–1954) جۇماباي شاياحمەتوۆتىڭ نەمەرەسى. ول سونىمەن قاتار 2022 جىلى قازاقستان رەسپۋبليكاسى پرەزيدەنتىنىڭ ءارحيۆى تاراپىنان دايىندالىپ، جاريالانعان «جۋماباي شاياحمەتوۆ. دوكۋمەنتى ي ماتەريالى» قۇجاتتىق جيناعىنىڭ قۇراستىرۋشىلارىنىڭ ءبىرى. رينات راۆيل ۇلى عىلىمي-زەرتتەۋ جۇمىسىندا وتباسىلىق ءارحيۆتىڭ الاتىن ورنى ەرەكشە ەكەنىن ايتا كەلە، ءوزىنىڭ وتاندىق جانە شەتەلدىك ارحيۆتەردەگى كوپ جىلدىق تاجىريبەسى، زەرتتەۋ جۇمىسىنىڭ ادىس-تاسىلدەرى تۋرالى ايتىپ ءوتتى.
جاس زەرتتەۋشىلەر قۇجاتتارمەن جۇمىس بارىسىندا تۋىندايتىن ماسەلەلەر بويىنشا سۇراقتار قويىپ، ولاردى تالقىلادى، سونىمەن قاتار بايقاۋعا قاتىسۋدان العان اسەرلەرىمەن ءبولىستى.
«مەنىڭ وتباسىمنىڭ تاريحى ارحيۆ قۇجاتتارىندا» بايقاۋى وقۋشىلاردىڭ عىلىمي جوبالاردى دايىنداۋدا تاجىريبەسى مەن قۇزىرەتتىلىگىن ارتتىرۋعا مۇمكىندىك بەرەدى جانە مۇنداي كەزدەسۋلەر ولاردىڭ ءوي-ورىسىن كەڭەيتىپ، جاڭا ىزدەنىستەر مەن يدەيالارعا شابىتتاندىرادى.
بوتاگوز بەيسەنبەك قىزى،
ق ر پرەزيدەنت ءارحيۆىنىڭ وقۋ-ادىستەمەلىك
ورتالىعىنىڭ ساراپشىسى