ق ر پرەزيدەنتى جانىنداعى ۇلتتىق عىلىم اكادەمياسى ەلىمىزدە العاش رەت جاس زەرتتەۋشىلەر فورۋمىن وتكىزدى.
بۇل فورۋم – عىلىمعا، زەرتتەۋ مەن يننوۆاسيالىق قىزمەتكە قىزىعۋشىلىق تانىتقان مەكتەپ وقۋشىلارىن بىرىكتىرەتىن بىرەگەي الاڭ. ءىس-شارانىڭ ماقساتى – وقۋشىلار اراسىندا عىلىمي ويلاۋدى دامىتۋ، شىعارماشىلىق باستامالاردى قولداۋ جانە عىلىمي ءبىلىمدى كەڭىنەن ناسيحاتتاۋ.
ءىس-شاراعا وقۋ-اعارتۋ ءمينيسترى بەيسەمبايەۆ عاني بەكتاي ۇلى، ۇلتتىق عىلىم اكادەمياسىنىڭ اكادەميكتەرى، اكىمشىلىكتەردەگى ءبىلىم باسقارمالارىنىڭ باسشىلارى، جەتەكشى جاس عالىمدار، سونداي-اق ەلىمىزدىڭ ءار وڭىرىنەن 400-دەن استام رەسپۋبليكالىق جانە حالىقارالىق كونكۋرستاردىڭ جەڭىمپازدارى مەن جۇلدەگەرلەرى اتانعان دارىندى مەكتەپ وقۋشىلارى جانە ولاردىڭ عىلىمي جەتەكشىلەرى قاتىستى.
فورۋم وقۋشىلاردىڭ عىلىمي-زەرتتەۋ جوبالارى مەن ازىرلەمەلەرىن تانىستىرۋعا ارنالعان اشىق الاڭعا اينالدى. مۇندا ولاردىڭ دايىندىق دەڭگەيى باعالانىپ، جەتەكشى عالىمدار مەن ساراپشىلار تاراپىنان كاسىبي پىكىرلەر ۇسىنىلدى. سونىمەن قاتار، STEM ءبىلىمىن دامىتۋ، حالىقارالىق تاجىريبەنى ورتا ءبىلىم جۇيەسىنە ەنگىزۋ جانە قازاقستانداعى مەكتەپ عىلىمىنىڭ بولاشاعى سياقتى وزەكتى ماسەلەلەر كەڭىنەن تالقىلاندى.
فورۋم باعدارلاماسىندا «مەكتەپ وقۋشىلارىنىڭ عىلىمي جانە يننوۆاسيالىق جوبالارى مەن ازىرلەمەلەرىنىڭ كورمەسى»، «زياتكەر» اتتى ينتەللەكتۋالدىق كوماندالىق سايىس، «اكادەميك ق.ي. ساتبايەۆ، ارحەولوگيا جانە قازاقستان عىلىمى تاريحى مۋزەيلەرىنە ەكسكۋرسيا»، «وتاندىق جانە شەتەلدەگى جەتەكشى جاس عالىمدار مەن اكادەميكتەردىڭ باياندامالارى مەن ماستەر كلاسستار»، «جاس زەرتتەۋشىلەردىڭ باياندامالارى مەن ءوز جوبالارىن تانىستىرۋى»، «جاس زەرتتەۋشىلەر فورۋمى اياسىنداعى بايقاۋلار جەڭىمپازدارىن ماراپاتتاۋ ءراسىمى»، «قوجا – جاڭا ساياحات» ءفيلمىنىڭ كورسەتىلىمى قامتىلعان.
فورۋم ناتيجەسى بويىنشا ق ر پرەزيدەنتىنىڭ جانىنداعى ق ر ۇلتتىق عىلىم اكادەمياسىندا جاس زەرتتەۋشىلەر اكادەمياسى قۇرىلۋ قاراستىرىلدى.
«قازاقتا «اسىل تاستان، اقىل جاستان» دەگەن اتالى ءسوز بار. ياعني، ءبىزدىڭ عىلىمىزدىڭ بولاشاعى جاستاردىڭ قولىندا. ولاي بولسا قابىلەتتى جاس تالانتتاردى تاۋىپ، ولاردى زامان تالابىنا ساي تاربيەلەپ، ءبىلىم دەڭگەيىن شىڭداۋ ءبىزدىڭ قاسيەتتى مىندەتىمىز بولماق»، – دەدى ق ر پرەزيدەنتىنىڭ جانىنداعى ق ر ۇلتتىق عىلىم اكادەمياسىنىنىڭ پرەزيدەنتى ا.كۇرىشبايەۆ.
و.جولدىباي