كۋالىك تابىستاۋ ءراسىمى ءوتتى.
رەسپۋبليكا كۇنىنە وراي «Alatay Aqparat» مەدياحولدينگى قۇرامىنداعى «Almaty aqshamy» جانە «ۆەچەرنيي Almaty» گازەتتەرى مەن سايتتارىنىڭ جۋرناليستەرى قازاقستان رەسپۋبليكاسى جۋرناليستەر وداعىنا مۇشەلىككە ءوتتى، دەپ حابارلايدى Almaty-akshamy.kz
سالتاناتتى شاراعا قازاقستان جۋرناليستەر وداعىنىڭ ءتوراعاسى، جۋرناليستيكا سالاسىنىڭ مەترى، قوعام قايراتكەرى سەيىتقازى ماتايەۆ قاتىستى. وداق ءتوراعاسى تاراپىنان جاس تىلشىلەر مەن بۇرىننان باسپا ءسوز سالاسىندا قىزمەت ەتىپ جۇرگەن ماماندارعا كۋالىك تابىستاۋ ءراسىمى ءوتتى.
جيىنعا «Alatay Aqparat» مەدياحولدينگىنىڭ باس ديرەكتورى تولەمىس كۇلمۇحامەدوۆ، «Almaty aqshamy» گازەتىنىڭ باس رەداكتورى تورەحان دانيار، «ۆەچەرنيي Almaty» گازەتىنىڭ باس رەداكتورى ەۆگەنيي راحيمجانوۆ پەن ۇجىم مۇشەلەرى قاتىستى. جيىن بارىسىندا جۋرناليست حالىق پەن بيلىك اراسىنداعى التىن كوپىر ەكەندىگى، ەلىمىزدەگى قوزعاۋشى كۇش ءارى «ءتورتىنشى بيلىككە» اينالىپ كەلە جاتقاندىعى ايتىلدى. مۇشەلىككە وتكەن جانداردىڭ كاسىبي شەبەرلىگى ءاردايىم جوعارى بولۋى كەرەكتىگى جونىندە ىزگى تىلەكتەر ايتىلدى.
سونىمەن بىرگە، جيىن بارىسىندا 60 جاسقا تولۋىنا وراي «Almaty aqshamy» گازەتىنىڭ باس رەداكتورى تورەحان دانيارعا الماتى قالاسى اكىمىنىڭ قۇتتىقتاۋ حاتى تابىستالدى. سونداي-اق، «ۆەچەرنيي Almaty» گازەتىنىڭ ءتىلشىسى اقەركە مىرزاعالييەۆاعا الماتى قالاسى اكىمىنىڭ ورىنباسارى ارمان قىرىقبايەۆتىڭ العىس حاتى بەرىلدى.