قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا اكادەمياسىندا «جاس شەكاراشى» بالالار اسكەري-پاتريوتتىق كلۋبىنىڭ سالتاناتتى تۇردە اشىلۋ ءراسىمى ءوتتى، دەپ حابارلايدى اlmaty-akshamy.kz ق ر ۇقك شەكارا اكادەمياسىنىڭ باسپا ءسوز قىزمەتىنە سىلتەمە جاساپ.
وعان SOS الماتى «بالالار قالاشىعىنىڭ» تاربيەلەنۋشىلەرى مەن شەكارا اكادەمياسىندا قىزمەت اتقاراتىن اسكەري قىزمەتشىلەردىڭ بالالارى قابىلداندى. اتالمىش شارانى تاربيەلىك، الەۋمەتتىك-قۇقىقتىق جانە يدەولوگيالىق جۇمىستار باسقارماسى ۇيىمداستىردى.
بۇل جولى اتا-انالار بالالارىنا شەكاراشىنىڭ كيىمىن تىكتىرىپتى. ۇستەرىندەگى كيىمدەرى وزدەرىنە قۇيىپ قويعانداي شاپ-شاق. باستارىندا جاسىل قالپاق. ءتىپتى كەيبىرەۋى كانىگى شەكاراشىلار سياقتى كىشكەنتاي بەرسى (اياق كيىم) كيىپ الىپتى. بۇگىنگى كورگەن قىزىقتارىنا كوڭىلى تولىپ، ءجۇزى بال-بۇل جايناپ تۇرعان جاس شەكاراشى تۋكەشوۆ بەكارىس قانات ۇلى اكەسى سەكىلدى شەكاراشى بولعاندى قالاپ، كوپ ويلانباستان «جاس شەكاراشى» بالالار اسكەري-پاتريوتتىق كلۋبى اشىلادى دەگەن اقپاراتتى ەستي سالا، وسىندا كەلۋدى ءجون كورگەن. ەندى ول اسكەري ءبولىمنىڭ ساپتىق الاڭىندا كلۋبقا قابىلدانعان بالالارمەن بىرگە ءبىر سىزىقتىڭ بويىندا ساپ تۇزەپ تۇر.
شاراعا جاس شەكاراشىلار مەن ولاردىڭ اتا-انالارىنان بولەك، شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى الماتى قالالىق فيليالىنىڭ ءتوراعاسى، زاپاستاعى گەنەرال-مايور م.ماجيتوۆ جانە وسى بىرلەستىكتىڭ مۇشەلەرى، وتستاۆكاداعى پولكوۆنيكتەر ۆ.دىبوۆ، ق.ەرتىشپايەۆتار قوناق رەتىندە شاقىرىلىپتى. ءوز كەزەگىندە مارات ءالىمجان ۇلى ءسوز سويلەپ، قاستەرلى شەكاراشى ماماندىعىنىڭ قىر-سىرىنا توقتالىپ، بۇگىنگى كىشكەنتاي شەكاراشىلاردىڭ الداعى قىزمەتىنە ساتتىلىك تىلەدى.
سودان كەيىن ءراسىم بويىنشا اكادەميا باستىعى پولكوۆنيك پ.پوليۆانوۆ پەن شاقىرىلعان قوناقتار «جاس شەكاراشى» بالالار اسكەري-پاتريوتتىق كلۋبىنا قابىلدانعان بالالارعا ارنايى دايىندالعان ەمبلەما شيەۆرونى مەن ماقتاۋ گرامموتالارىن سالتاناتتى تۇردە تابىس ەتتى.
شارا بارىسىندا اكادەميا باستىعى پولكوۆنيك پ.پوليۆانوۆ وتاننىڭ وتباسىنان باستالاتىنىن، وتان قورعاۋدىڭ ارلى ءىس ەكەنىن ايتا كەلىپ، بارلىق بالالاردى كلۋبقا قابىلدانعانۋىمەن شىن جۇرەكتەن قۇتتىقتادى.
پولكوۆنيك د.بەلگوجايەۆتىڭ ايتۋىنشا، اتالمىش كلۋب جۇمىسىن ايىنا ەكى رەت تاڭعى توعىزدان تۇسكى ون ەكىگە دەيىن جۇرگىزەتىن بولادى. بالالارعا ساباقتى اكادەمياداعى اسكەري قىزمەتشىلەر وتكىزەدى. كلۋب جەتەكشىسى بولىپ مايور اسقاروۆ جەڭىس تاعايىندالدى. ال ونىڭ كومەكشىسى بولىپ 3 سىنىپتى سەرجانت ەيزجانوۆ ەرلان بەكىتىلدى.