ۇلتتىق ۇلاننىڭ 5574 اسكەري ءبولىمىنىڭ جاۋىنگەرلىك جانە ادىستەمەلىك دايىندىق ورتالىعىندا «جاس بۇركىت» سپورتتىق-اسكەري پاتريوتتىق كلۋبىنىڭ وقۋشىلارى اراسىندا العاش رەت دالالىق اسكەري وقۋ-جاتىعۋى وتۋدە.
جيىنعا الماتى قالاسىنداعى مەكتەپتەردەن «جاس بۇركىت» سپورتتىق-اسكەري پاتريوتتىق كلۋبىنا مۇشە 50-دەن اسا بالا مەن ءجاسوسپىرىم قاتىسۋدا.
اسكەري ءىس-شارانىڭ ماقساتى – ءوسىپ كەلە جاتقان جاس بۋىن مەن اسكەرگە دەيىنگى جاستارعا وتانىمىزدىڭ تاريحىن وقىتۋ نەگىزىندە، قازاقستاندىق پاتريوتيزم رۋحىندا تاربيەلەۋ، اسكەري قىزمەتتىڭ بەدەلىن جانە قازاقستان رەسپۋبليكاسى ۇلتتىق ۇلانىنىڭ مارتەبەسىن ارتتىرۋ، اسكەري ءىستى مەڭگەرۋ جانە جاستاردى اسكەري قىزمەتكە فيزيكالىق دايىنداۋ. سونداي-اق، بالالاردىڭ، جاسوسپىرىمدەردىڭ جانە اسكەرگە دەيىنگى جاستاردىڭ مورالدىق بىرلىگىن، اسكەري-پاتريوتتىق، سپورتتىق جانە اسكەري-تەحنيكالىق دايىندىقتارىن شىڭداۋ.
بولاشاق ساربازدار ءۇش توپقا ءبولىنىپ، ءبىر اپتادان بەرى كۇن تارتىبىنە سايكەس ساپتىق دايىندىق، العاشقى مەديسينالىق كومەك، توپوگرافيا، الپينيزم، سۋدا ءجۇزۋ جانە سپورتتىق دايىندىق پاندەرىنەن بىلىمدەرىن شىڭداپ، اسكەري ءومىردىڭ قىر-سىرىمەن تانىسۋدا. قۋانارلىعى، الماتىلىق جاسوسپىرىمدەر بۇل وقۋ-جاتتىعۋ ءىس-شاراسىنا اسا قىزىعۋشىلىقپەن قاتىسىپ، بەلسەندىلىك تانىتۋدا. اسكەري ومىرگە ءبىر تابان جاقىن بولعاندارىنا ءماز بولعان بالالار وسىنداي مۇمكىندىك جاساعان ۇلكەندەرگە العىس ايتۋدا.