اسكەري-دالالىق تاكتيكالىق ويىندار
وڭىرلەردە «ايبىن» حالىقارالىق اسكەري-پاتريوتتىق جاستار جيىنىنا قاتىسۋ ءۇشىن ىرىكتەۋ تۋرلارى ءوتىپ جاتىر، دەپ حابارلايدى Almaty-akshamy.kz.
جاسوسپىرىمدەر مەن وقۋشىلار 17-23 ماۋسىم ارالىعىندا قاراعاندى وبلىسىنىڭ «سپاسسك» وقۋ-جاتتىعۋ ورتالىعىندا جىل سايىن وتەتىن اسكەري-پاتريوتتىق جيىندا ءوز كلۋبتارىنىڭ نامىسىن قورعاۋ ءۇشىن سىنالادى.
اسكەري-سپورتتىق جانە اسكەري-قولدانبالى سپورت تۇرلەرىنىڭ جارىستارىنا دەنە شىنىقتىرۋ جاتتىعۋلارى، اسكەريلەندىرىلگەن ەستافەتا، اك-74ء-تى تولىق ەمەس بولشەكتەۋ جانە قۇراستىرۋ، پنيەۆماتيكالىق مىلتىقتان اتۋ، گازتۇمىلدىرىق پەن جالپى اسكەري قورعانىس جيىنتىعىن كيۋ نورماتيۆتەرىن ورىنداۋ كىرەدى.
جيىن بارىسىندا «ايبىن دارىنى» زياتكەرلىك جانە «كۇشىمىز بىرلىكتە» اسكەري-دالالىق تاكتيكالىق ويىندارى، سونداي-اق «ايبىن جۇلدىزى» شىعارماشىلىق جانە «Smart Sarbaz – 2023» ونەرتاپقىشتار بايقاۋلارى وتپەك.
قازىرگى كەزدە جيىنعا جيىرما وڭىردەن كەلگەن اسكەري-پاتريوتتىق كلۋبتار، ونىڭ ىشىندە ارميا گەنەرالى ساعادات نۇرماعامبەتوۆ اتىنداعى ق ر قورعانىس مينيسترلىگى اسكەري كوللەدجىنىڭ، شىمكەنت پەن قاراعاندىدان كەلگەن «جاس ۇلان» رەسپۋبليكالىق مەكتەپتەرىنىڭ، سەمەي مەن پاۆلوداردان كەلگەن وبلىستىق اسكەري مەكتەپ-ينتەرناتتاردىڭ، قارۋلى كۇشتەردىڭ، باسقا اسكەرلەر مەن اسكەري قۇرالىمداردىڭ اسكەري بولىمدەرى مەن مەكەمەلەرى جانىنان قۇرىلعان اسكەري-پاتريوتتىق كلۋبتاردىڭ تاربيەلەنۋشىلەرى قاتىسۋعا دايىندىق جۇرگىزىپ جاتىر. ءازىربايجان مەن وزبەكستان كوماندالارى دا قاتىسادى دەپ كۇتىلۋدە.
«ايبىن» جاستار جيىنى قازاقستان اسكەرىنىڭ ءيميدجىن ارتتىرۋعا، اسكەري-قولدانبالى جانە تەحنيكالىق سپورت تۇرلەرىن تانىمال ەتۋگە، اسكەري قىزمەت وتكەرۋ كەزىندە قاجەتتى داعدىلاردى قازىردەن قالىپتاستىرۋعا ىقپال ەتەدى.