الماتىدا بالالار حور ۇجىمدارى اراسىنداعى ۇزدىكتەر انىقتالدى
2024 جىلدىڭ 12 جەلتوقسانىندا ناۋرىزباي اۋدانىنداعى وقۋشىلاردىڭ يننوۆاسيالىق شىعارماشىلىق ورتالىعىندا «ءبىرتۇتاس تاربيە» باعدارلاماسى اياسىندا الماتى قالاسى ءبىلىم باسقارماسىنىڭ مەملەكەتتىك تاپسىرىسى بويىنشا ۇيىمداستىرىلعان «ماڭگىلىك ەل اۋەندەرى» اتتى ءى قالالىق بالالار حور ۇجىمدارى اراسىنداعى بايقاۋدىڭ گالا-كونسەرتى جانە جەڭىمپازداردى ماراپاتتاۋ ءراسىمى ءوتتى، دەپ حابارلايدى aqshamnews.kz
بايقاۋ ەكى كەزەڭنەن تۇردى. ءبىرىنشى كەزەڭدە الماتى قالاسىنىڭ بارلىق 8 اۋدانىندا ىرىكتەۋ تۋرلارى ۇيىمداستىرىلدى. بۇل كەزەڭگە 200-دەن استام مەكتەپتەن 10 مىڭعا جۋىق جاس ونەرپاز قاتىستى. ىرىكتەۋ تۋرلارىندا جەڭىمپاز اتانعان ەكى حور ۇجىمى بايقاۋدىڭ قالالىق كەزەڭىندە ب ا ق سىنادى.
حور ۇيىرمەسىنە قاتىسۋ بالالاردىڭ مۋزىكالىق قابىلەتتەرىن دامىتۋعا ەرەكشە ىقپال ەتەدى. ءاربىر حور مۇشەسى ءوز ورىنداۋىنا جاۋاپكەرشىلىكپەن قاراپ، انشىلىك شەبەرلىكتەرىن شىڭدايدى. بۇل ولاردىڭ مۋزىكاعا دەگەن قىزىعۋشىلىعىن ارتتىرىپ، ورىنداۋ شەبەرلىكتەرىن جەتىلدىرەدى. حور ونەرى بالالاردىڭ شىعارماشىلىق قابىلەتتەرىن اشىپ، مۋزىكالىق وي-ورىستەرىن كەڭەيتەدى.
بۇل بايقاۋدىڭ نەگىزگى ماقساتى – وقۋشىلاردىڭ مۋزىكالىق قابىلەتتەرىن دامىتۋ، حور ونەرىنە دەگەن قىزىعۋشىلىعىن ارتتىرۋ، جاس تالانتتارعا قولداۋ كورسەتۋ. بايقاۋ جاستاردىڭ شىعارماشىلىق الەۋەتىن كوتەرۋ ارقىلى ولاردىڭ قوعامدا بەلسەندى، جاۋاپتى جانە ەڭبەكقور ازامات بولىپ قالىپتاسۋىنا ىقپال ەتۋدى كوزدەيدى.
بايقاۋدىڭ ءادىلقازىلار القاسىنىڭ قۇرامىنا قازاقستاننىڭ جانە شەت ەلدەردىڭ تانىمال مادەنيەت جانە ونەر قايراتكەرلەرى ەندى: دەمەۋوۆ بەيمبەت كەنەسباي ۇلى، چالوۆا وكسانا ۆيكتوروۆنا، رومانوۆ سەرگەي يۆانوۆيچ، جارمەنوۆا لەيليا باحيتۋللايەۆنا، ماحانوۆ عاني امانكەلدى ۇلى.
قالالىق كەزەڭگە الماتى قالاسىنىڭ 8 اۋدانىنان 16 حور ۇجىمى قاتىستى. ولاردىڭ قاتارىندا المالى اۋدانىنىڭ №79 مەكتەپ-گيمنازياسىنىڭ «بايتەرەك» حور ۇجىمى، №90 مەكتەپ-ليسەيىنىڭ «ەلىم-اي» حور ۇجىمى، مەدەۋ اۋدانىنىڭ №56 مەكتەپ-گيمنازياسىنىڭ «مەچتا» حور ۇجىمى، جەتىسۋ اۋدانىنىڭ №148 مەكتەپ-گيمنازياسىنىڭ «جۇلدىزدار» حور ۇجىمى، تۇركسىب اۋدانىنىڭ №198 مەكتەپ-گيمنازياسىنىڭ «جاس تالانت» حور ۇجىمى، اۋەزوۆ اۋدانىنىڭ №130 مەكتەپ-گيمنازياسىنىڭ «بالداۋرەن» حور ۇجىمى، الاتاۋ اۋدانىنىڭ №184 جالپى ءبىلىم بەرەتىن مەكتەبىنىڭ «بالاۋسا» حور ۇجىمى، بوستاندىق اۋدانىنىڭ №140 مەكتەپ-گيمنازياسىنىڭ حور ۇجىمى، ناۋرىزباي اۋدانىنىڭ №200 مەكتەپ-گيمنازياسىنىڭ «جاس داۋىس» حور ۇجىمى جانە تاعى باسقالار بار.
بايقاۋ قورىتىندىسى بويىنشا باس جۇلدەنى №83 مەكتەپ-گيمنازياسىنىڭ «كوكەك» حور ۇجىمى جەڭىپ الدى. ءبىرىنشى ورىندى №79 مەكتەپ-گيمنازياسىنىڭ «بايتەرەك» حور ۇجىمى يەلەنسە، ەكىنشى ورىندى №207 مەكتەپ-ليسەيىنىڭ «اق كوگەرشىن» حور ۇجىمى جانە №57 مەكتەپتىڭ «جەتىسۋ جاۋھارلارى» حور ۇجىمى ءوزارا ءبولىستى. ال ءۇشىنشى ورىندى №140 مەكتەپ-گيمنازياسىنىڭ حور ۇجىمى مەن №210 مەكتەپ-ليسەيىنىڭ «اۋەن» حور ۇجىمى الدى.
جالپى جۇلدە قورى 12 618 000 تەڭگەنى قۇرادى. باس جۇلدە يەگەرىنە 3 000 000 تەڭگەلىك دىبىستىق اكۋستيكالىق جيىنتىق تابىستالسا، ءبىرىنشى ورىنعا 1 936 000 تەڭگەلىك، ەكىنشى ورىنعا 1 500 000 تەڭگەلىك، ءۇشىنشى ورىنعا 1 000 000 تەڭگەلىك دىبىستىق اكۋستيكالىق جيىنتىقتار سىيعا بەرىلدى. بارلىق قاتىسۋشىلارعا Shure راديوميكروفوندارى تابىستالدى.
بۇل بايقاۋ جاس ونەرپازدارعا ۇلكەن سەرپىن بەرىپ، ولاردىڭ حور ونەرىنە دەگەن قىزىعۋشىلىعىن ارتتىرۋعا زور ىقپال ەتتى. بايقاۋ بالالاردىڭ شىعارماشىلىق الەۋەتىن اشىپ، جاڭا بيىكتەرگە جەتەلەيتىن مىقتى ىنتالاندىرۋ بولدى.