الماتى جاستار قالاسى، مۇندا 14 پەن 35 جاس ارالىعىنداعى 695،6 مىڭ جاس تۇرادى. جاستار كۇنى 1999 جىلدان بەرى 12 تامىزدا بۇكىل الەمدە تويلانادى. بۇل جاستارعا، ولاردىڭ جەتىستىكتەرى مەن الەۋەتىنە ارنالعان ەرەكشە كۇن.
كوك-توبەدە حالىقارالىق جاستار كۇنىنە وراي الماتى قالاسى جاستار ساياساتى باسقارماسىنىڭ قولداۋىمەن جانە جاستار ساياساتىن دامىتۋ مەملەكەتتىك قورىنىڭ ۇيىمداستىرۋىمەن، «جاستارمەن بىرگە» ۇلتتىق جاستار ونكۇندىگىن وتكىزۋ اياسىندا «JAS FEST 2024» open air فەستيۆالى ءوتتى، دەپ حابارلايدى aqshamnews.kz
ءىس-شاراعا 3000-نان استام ادام، ونىڭ ىشىندە كوميۋنيتي ورتالىقتار مەن ۇەۇ وكىلدەرى، ەرىكتىلەر مەن قالا بەلسەندىلەرى قاتىستى.
ءىس-شارانىڭ نەگىزگى ماقساتى – حالىقارالىق جاستار كۇنىن مەرەكەلەۋ اياسىندا، قالا جاستارىنىڭ باسىن قوسىپ ادەمى كەش وتكىزۋ دەيدى ۇيىمداستىرۋشىلار.
الماتى قالاسى جاستار ساياساتى باسقارماسى جاستاردى قولداۋعا ءتۇرلى جوبالاردى جۇزەگە اسىرىپ كەلەدى. ماسەلەن، بيىل 3-12 تامىز ارالىعىنداعى «جاستارمەن بىرگە» ۇلتتىق ونكۇندىك اياسىندا الماتىدا جاستارعا 60-تان استام ءارتۇرلى فورماتتاعى ءىس-شارالار ۇيىمداستىرىلدى.
«بۇگىن وسى فەستيۆالگە دوستارىممەن كەلىپ ەرەكشە سەزىمگە بولەندىم. جاستار كۇنىن قالادا وسىلاي اتاپ ءوتىپ جاتقانى ەرەكشە قۋانتادى. شەبەرلىك ساباقتار مەن مەرەكەلىك كونسەرت قاتتى ۇنادى. JAS FEST سەكىلدى فەستيۆالدار قالادا ءجيى ءوتىپ تۇرسا ەكەن.» – دەدى قالا تۇرعىنى اياۋلىم شاپەنوۆا.
فەستيۆال اياسىندا كونسەرتتىك باعدارلاما، شەبەرلىك ساباقتار جانە قالامىزدىڭ دەمالىس ورتالىقتارىنىڭ جارمەڭكەسى ۇيىمداستىرىلدى.
«بۇنداي شاراعا كەلۋىمنىڭ باستى ماقساتى تەك كونسەرت كورۋ ەمەس، سونداي-اق جاڭا دوستار تاۋىپ ورتامىزدى كەڭەيتۋ. ۇيىمداستىرۋشىلارعا ۇلكەن العىسىمدى ايتامىن. كەلەسى جىلى بولسا، تاعى دا كەلەر ەدىم» - دەدى جاس الماتىلىق قۋات ايتقالييەۆ.