قورعانىس مينيسترلىگى وتكىزەتىن اسكەري-پاتريوتتىق جۇمىس شەڭبەرىندە بىتىمگەرلىك وپەراسيالار ورتالىعىنىڭ اسكەري قىزمەتشىلەرى مەن ازاماتتىق پەرسونالىنىڭ بالالارى ءۇشىن ءبىر اپتالىق دەمالىس بالالار لاگەرىندە ۇيىمداستىرىلدى.
ءبىرىنشى كۇنى بالالار بىتىمگەرلىك وپەراسيالار ورتالىعىنىڭ اسكەري قىزمەتشىلەرى دايىنداعان قىزىققى تولى باعدارلاماسىنى تاماشالاۋعا «بىتىمگەر» وقۋ-جاتتىعۋ ورتالىعىنا باردى، دەپ حابارلايدى Almaty-akshamy.kz.
بالالارعا اسكەري تەحنيكا مەن قارۋ-جاراق ۇلگىلەرى، سونداي-اق بايلانىس قۇرالدارى كورسەتىلدى. كەيىن جاسوسپىرىمدەر جاتتىعۋ گراناتالارىن لاقتىرۋ، اتىس قارۋىن بولشەكتەۋ جانە قۇراستىرۋ بويىنشا ارميا نورماتيۆتەرىن ورىنداۋ كەزىندە جىلدامدىقپەن، كۇشپەن جانە شەبەرلىكپەن باسەكەگە ءوزارا ءتۇستى. سوڭىندا بالالارعا پنيەۆماتيكالىق مىلتىقتاردان اتۋ مۇمكىندىگى بەرىلدى.
وڭتۇستىك كۇنىنىڭ ىستىعىنا قاراماستان، بولاشاق ەل قورعاۋشىلارى جاۋىنگەرلىك دايىندىق باعدارلاماسىندا قاراستىرىلعان بارلىق جاتتىعۋلاردى ۇلكەن قۇلشىنىسپەن جانە مۇقيات ورىندادى.
– كەرەمەت ءوتتى! ەندى ءبىز ءىس جۇزىندە اسكەري قىزمەتشى بولۋدىڭ وڭاي ەمەس ەكەنىن بىلەمىز، – دەيدى بىتىمگەرلىك وپەراسيالار ورتالىعىنىڭ اسكەري قىزمەتشىسىنىڭ ۇلى ءىلياس تاجىبايەۆ. – اكەمنىڭ جۇمىسى قيىن، جاۋاپتى جانە وتە قىزىقتى ەكەنىن ۇقتىم!
بەلسەندى سايىستان كەيىن بىتىمگەرلەر بالالاردى ناعىز سارباز بوتقاسىنىڭ ءدامىن تاتقىزىپ كوردى.
– بۇل بالالارىمىزعا اكەلەرىنىڭ نە ىستەپ جاتقانىن بىلۋگە جانە كورۋگە تاماشا مۇمكىندىك بولدى، – دەيدى اتا-انالاردىڭ ءبىرى ايجامال بازار. – بىتىمگەرلىك وپەراسيالار ورتالىعىنعا بارعان بالالارىمىز تاماشا اسەر الدى، سىزدەرگە ريزامىز.
كەلەسى كۇندەرى بالالاردى مادەني-دەمالىس، سپورتتىق ءىس-شارالار مەن جورىقتاردى قامتيتىن قىزىقتى باعدارلاما كۇتىپ تۇر. بالالار دەلفينارييگە، حايۋاناتتار باعىنا، «مەدەۋ» مۇز ايدىنىنا بارادى، اسپالى جولمەن جۇرەدى. سونداي-اق، قورعانىس مينيسترلىگى ۇلتتىق اسكەري-پاتريوتتىق ورتالىعىنىڭ مۋزەيىنە جانە «داڭق مەموريالى» كەشەنىنە ەكسكۋرسيالار جوسپارلانعان.
ودان بولەك تاۋ دايىندىعى ورتالىعىنا بارۋ دا جوسپاردا بار، مۇندا تاجىريبەلى نۇسقاۋشىلار بالالارعا تاۋ جاعدايىندا ءومىر ءسۇرۋ ەرەكشەلىكتەرىن ايتىپ، كورسەتىپ، ولارعا وزدەرىن ناعىز اسكەري الپينيستەر سياقتى سەزىنۋگە مۇمكىندىك بەرەدى.
– بىتىمگەرلىك وپەراسيالار ورتالىعى اسكەري قىزمەتشىلەرىنىڭ بالالارى ءۇشىن الداعى اپتا ۇمىتىلماس بولىپ قانا قويماي، فيزيكالىق تۇرعىدان شىنىعىپ، شىمىر بولۋعا، پايدالى ءبىلىم، پراكتيكالىق داعدىلار الۋعا جانە ارينە، جاڭا دوستار تابۋعا مۇمكىندىك بەرەتىنىنە سەنىمدىمىن، – دەپ اياقتادى ءسوزىن ورتالىقتىڭ اعا وفيسەرى ءانۋار ارىنعازييەۆ.