جارىق فەستيۆالى ءوتىپ جاتىر

بەرليننىڭ باستى تاريحي ورىندارى مەن ساۋلەت نىساندارى كوزدىڭ جاۋىن الاتىنداي اسەم كۇيگە ەندى.

ويتكەنى ءقازىر شاھاردا ءداستۇرلى جارىق فەستيۆالى ءوتىپ جاتىر. الەمنىڭ تۇكپىر-تۇكپىرىنەن جينالعان شەبەرلەر قالاداعى قامالدار مەن ۇكىمەت ۇيلەرىنىڭ قاسبەتىن شاممەن بەزەندىرىپ، 3 د كارتينالارمەن كومكەرگەن، - دەپ حابارلايدى اlmaty-akshamy.kz 24.kz ارناسىنا سىلتەمە جاساپ.

بۇل كۇندەرى بەرلين ادام تانىماستاي وزگەردى. ادەتتە سۇرعىلت بولىپ تۇراتىن عيماراتتاردىڭ قابىرعاسى جارقىراپ، جايناپ شىعا كەلگەن. شارلوتتەنبۋرگ قامالى، بەرلين مۇناراسى سىندى كورنەكى ورىنداردىڭ بارىنەن 3د كارتينالارىن كورۋگە بولادى.

"ماعان گۋمبولدت ۋنيۆەرسيتەتىنىڭ جانىنداعى ينستاللياسيا قاتتى ۇنادى. بۇدان باسقا ديزاينەرلەر بۇكىل الاڭدى بەزەندىرىپ تاستاعان. قاي جەرگە قاراساڭ دا جارقىراپ تۇر. جالپى بۇل فەستيۆالدى جىلدا ارنايى كەلىپ كورەمىن. تۋريستەر سانى دا كوبەيىپ كەلەدى"، - دەيدى جەرگىلىكتى تۇرعىن كريستوفەر.

براندەنبۋرگ قاقپاسىنىڭ ماڭىندا دا ەرەكشە مۇسىندەر پايدا بولدى. وندا فرانسۋز، بولگار، جاپون جانە ۋكراينالىق شەبەرلەردىڭ تۋىندىلارى قويىلعان.

"بەرليندە جارىق فەستيۆالىن وتكىزۋ - عالامات يدەيا. ءبىز قالانىڭ 4 كورنەكى ورنىنداعى شوۋلارعا كوزايىم بولدىق. اسىرەسە براندەنبۋرگ قاقپاسىنداعى مۇسىندەر قاتتى ۇنادى. كەرەمەت. بۇيىرسا، كەلەسى جىلى دا كەلمەكپىز"، - دەيدى ول.

جالپى شاھاردا 42 جەردە 85 شوۋ ءوتىپ جاتىر. "جارىق فەستيۆالى ادامدارعا كەرەمەت كوڭىل كۇي سىيلاپ قانا قويماي، ەنەرگيانى ۇنەمدەۋگە دە كومەكتەسەدى"، - دەيدى ۇيىمداستىرۋشىلار. ويتكەنى مۇندا تەك ءديودتى شامدار عانا قولدانىلادى. تارتىمدى ءىس-شارا 10 كۇنگە سوزىلماق.