اقتاۋداعى ۇشاق اپاتىنان امان قالعان رەسەي ازاماتى سۋبحونكۋل راحيموۆ ۇشاق ىشىندە تۇسىرگەن كوپتەگەن بەينەماتەريالداردىڭ اۆتورى بولىپ تابىلادى. سۋبحونكۋل اپات كەزىندە باستان وتكەرگەن قورقىنىشتى ساتتەرى تۋرالى orda.kz باسىلىمىنا ايتىپ بەردى، دەپ حابارلايدى aqshamnews.kz
— سۋبحونكۋل، سالەمەتسىز بە. ءسىز وتە اۋىر وقيعانى باستان وتكەردىڭىز. ءقازىر ءوزىڭىزدى قالاي سەزىنىپ جاتىرسىز؟ قايداسىز؟
— سالەمەتسىز بە. قازىرگى ۋاقىتتا ماسكەۋدەگى سكليفوسوۆسكيي اتىنداعى اۋرۋحانادا جاتىرمىن. ءوزىمدى اسا جاقسى سەزىنىپ تۇرعانىم جوق، باسىم قاتتى اۋىرىپ تۇر، ءبىراق جاقىندا جاقسارىپ كەتەمىن دەپ ۇمىتتەنەمىن. جالپى، ءال-حامدۋليللاھ، ءبارى جاقسى.
— ءسىز رەسەي ازاماتىسىز، ءبىراق تاجىكستاندا دۇنيەگە كەلگەنسىز، سولاي ما؟
— ءيا، سولاي. مەن تاجىكستاندا دۇنيەگە كەلدىم، ءبىراق رەسەي ازاماتىمىن.
— ۇشاق اپاتىنان كەيىن قانداي جاراقات الدىڭىز؟
— مەنىڭ جولىم بولدى، ەشقانداي جاراقات المادىم. ۇشاقتان ءوز كۇشىممەن شىعا الدىم.
— ۇشاقتا ءسىزدىڭ ورنىڭىز قايدا بولدى؟
— مەنىڭ ورنىم 38س ەدى، ءبىراق ەرەجەنى بۇزىپ، باسقا قاتارعا اۋىستىم. سول جەردە بوس ورىن بولدى، ءارى سولاي ىڭعايلىراق بولادى دەپ ويلادىم. ءبىراق وقيعادان ءبىراز بۇرىن اۋىسقان ەدىم.
— ءوزىڭىز شەشىم قابىلداپ، باسقا ورىنعا اۋىستىڭىز با؟ نەگە؟
— ءيا، ويتكەنى مەنىڭ جانىمداعى وتتەگى ماسكاسى قاجەتتى مولشەردە وتتەگى بەرمەدى. باسقا جەردە وتتەگى جاقسىراق بولادى دەپ ويلادىم. ونىڭ ۇستىنە، ۇشاقتىڭ ارتقى ورىندارى بوس تۇردى.
— ۇشاق قۇلاپ بارا جاتقاندا وقيعالار قالاي ءوربىدى؟ ءسىز بۇل ءساتتى قالاي ەدىڭىز؟
— ءبارى وتە تەز بولدى. الدىمەن قاتتى جارىلىس ەستىلدى، سوسىن بورتتاعى ادامدار ازەربايجان تىلىندە سويلەۋدى باستادى، ءبىراق مەن بۇل ءتىلدى تۇسىنبەيمىن. ەكيپاجداعى ءبىر ايەل بىزگە ىمداپ، نە ىستەۋ كەرەكتىگىن كورسەتىپ، تىنىشتاندىرۋعا تىرىستى. ۇشاق تۇراقسىز بولدى، مەن ونى اۋادا بولشەكتەنىپ كەتەتىندەي كوردىم. ءبىراق كەيىننەن ءبىرشاما تەڭسەلىپ، تۇزەلگەندەي بولدى.
— ۇشاق سالونى تولىقتاي گەرمەتيكالىق كۇيىن جوعالتتى ما؟
— تولىقتاي گەرمەتيكالىق كۇيىن جوعالتتى دەپ ايتا المايمىن. جارىلىس بولعان كەزدە، ۇشاق بولشەكتەنىپ كەتەدى دەپ ويلادىم. شىنى مەن مەتالل بولشەكتەرى ۇشىپ ءجۇردى. ءبىراق ءبىراز ۋاقىتتان كەيىن ۇشاق تومەندەپ بارىپ، تۇراقتالىپ قالدى. ول ساتتە ۇشاق امان قالادى دەگەن ءۇمىت پايدا بولدى.
— ۇشاق قۇلاماس بۇرىن سالونىندا نە بولدى؟
— جارىلىستان كەيىن ۇشاق تومەندەپ، سوسىن ءسال كوتەرىلدى. ءبىراق ول باسقا ۇشاق سەكىلدى بولدى، ءوزىن وزگەشە ۇستادى. ءبىز بيىكتىكتى ساقتاپ ۇشۋعا تىرىستىق، ءبىراق تۇراقسىزدىق بايقالدى. تەڭىزدىڭ ۇستىنەن وتكەندە، ۇشاق قايتادان باقىلاۋدى جوعالتا باستاعانداي بولدى. بۇل ماس جۇرگىزۋشىمەن كولىك جۇرگىزىپ كەلە جاتقانداي اسەر قالدىردى. سول كەزدە ءبارىنىڭ وتە قيىن بولاتىنىن ءتۇسىندىم.
— ەكيپاج قانداي نۇسقاۋلار بەردى؟
— بورتسەرىك قايتا-قايتا "برەيس" دەگەن كوماندانى قايتالادى. بۇل — اپاتتى جاعدايدا قابىلدانۋى ءتيىس قالىپ. ءبىز تەك نۇسقاۋلارعا باعىنىپ، امان قالۋعا ۇمىتتەنۋدەن باسقا امال قالماعان ەدى.
— ۇشاق قۇلاعاننان كەيىن نە بولدى؟
— جەرگە قونعانىمىزدى تۇسىنگەندە، ادامدار بىرتىندەپ ەسىن جيا باستادى. كەي جەردەن ىڭىرسىعان دىبىستار ەستىلدى. ءوزىم بەلدىكتى شەشىپ، ۇشاقتان شىقتىم. كەيبىر ادامدار ەس-تۇسسىز جاتتى، كەيبىرەۋىن قىسىپ قالعان. وكىنىشكە قاراي، قازا تاپقاندار دا بولدى.
— اپاتتىڭ سەبەبى نەدە دەپ ويلايسىز؟
— مۇنى تەك رەسمي تۇلعالار انىقتاپ ايتۋى كەرەك. قازاقستان تاراپىنا العىسىم شەكسىز — ولار وتە جەدەل ارەكەت ەتتى. ەسىمدى جيعانىمنان كەيىن بەس مينۋت وتپەي قۇتقارۋشىلار كەلىپ جەتتى. بۇل — وتە جەدەل كومەك.