ءىشى قۋىس جاڭا شينالار ەشقاشان جارىلمايدى، تەسىلمەيدى. ولار عارىشتىق تەحنولوگيالاردى قولدانىپ جاسالعان. شينانىڭ ءون بويىنا نيكەل-تيتان قورىتپاسىنان جاسالعان سەرىپپە ورناتىلعان، ول تيتان سياقتى بەرىك، رەزەڭكە سياقتى سوزىلادى.
مارستا، ايدا جۇرەتىن روۆەرلەردە قولدانىلاتىن تەحنولوگيامەن جاسالعان شينالار ەندى جاپپاي قولدانىسقا ەنگىزىلىپ، ساتىلا باستادى. بۇل تۋرالى Almaty-akshamy.kz NewAtlas سايتىنا سىلتەمە جاساپ حابارلادى.
فوتو Smart Tire Company سايتىنان الىندى
قۇراما شتاتتاردىڭ وگايو شتاتىندا ورنالاسقان Smart Tire كومپانياسى ەكى جىل بۇرىن ىشىنە اۋا ۇرلەنبەيتىن ۆەلوسيپەد شينالارىن جاساۋدى قولعا العان بولاتىن. ەندى وسى Metl شينالارىن ساتىپ الۋعا بولادى.
ەشقاشان جارىلمايتىن شينالار NASA عارىش اگەنتتىگىمەن بىرلەسىپ جاسالدى. عارىش اگەنتتىگى پلانەتاارالىق روۆەرلەردىڭ شينالارىندا ءدال وسىنداي تەحنولوگيانى قولدانادى. ويتكەنى، ايدىڭ نەمەسە مارستىڭ بەتىندە جۇرگەن جول تالعامايتىن كولىك قۇرالدارىنىڭ جارىلعان شيناسىن اۋىستىرۋعا عارىشكەرلەر جىبەرۋ ءتيىمسىز بولار ەدى.
فوتو Smart Tire Company سايتىنان الىندى
ال جاڭا Metl شينالارىنىڭ ءىشى قۋىس، سوندىقتان وعان اۋانى جوعارى قىسىممەن ۇرلەۋدىڭ قاجەتى جوق. Metl شيناسىنىڭ نەگىزىندە شينانىڭ بۇكىل پەريمەترى بويىنشا وتەتىن Slinky سەرىپپەسى بار.
سەرىپپە NiTinol دەپ اتالاتىن نيكەل-تيتان قورىتپاسىنان جاسالعان، ول تيتان سياقتى بەرىك، ءبىراق رەزەڭكە سياقتى سوزىلادى.
ايتا كەتۋ كەرەك، NiTinol قىسىمعا ۇشىراعان كەزدە دەفورماسيالانادى، ءبىراق كەيىن باستاپقى قالپىنا كەلەدى. ياعني، Metl شيناسى قىسىلادى، قايتا سەرپىلىپ ورنىنا كەلەدى، پنيەۆماتيكالىق شيناعا ۇقساس جاتىق، جۇمساق ءجۇرۋدى قامتاماسىز ەتەدى.
Getty Images سايتىنان الىندى. اۆتورى: Erik Isakson
شينانىڭ ءون بويىنا ورناتىلعان سەرىپپە ءمولدىر ءبۇيىر قابىرعالارى مەن اۋىستىرىلاتىن پروتەكتوردان تۇراتىن پوليرەزەڭكە ماتەريالمەن قاپتالعان. كومپانيانىڭ مالىمەتىنشە، بۇل شينالاردا كادىمگى اۋامەن تولتىرىلعان شيناعا قاراعاندا ەكى ەسە از رەزەڭكە قولدانىلادى.
وعان قوسا، شينادا تەك سىرتقى پروتەكتوردى عانا 8000 – 12000 شاقىرىم جۇرگەن سوڭ اۋىستىرۋ قاجەت، ال نەگىزگى دوڭعالاق ۆەلوسيپەدتىڭ قىزمەت ەتۋ مەرزىمىنە تولىق جەتەدى. تەك سىرتقى پروەكتور عانا اۋىستىرىلاتىن بولسا، وندا از رەزەڭكە جۇمسالاتىن پروتەكتور دا ارزان بولماقشى.
تەحنولوگيانى كوممەرسيالاندىرۋ ءۇشىن Smart Tire ءارتۇرلى ولشەمدەردەگى تاسجولدا، قيىرشىق تاستا جۇرۋگە ارنالعان شينالار ۇسىنادى. ولاردىڭ سالماعى پنيەۆماتيكالىق شينالاردان تومەن.
بىرەر جىلدىق تەحنولوگيالىق جەتىلدىرۋدەن كەيىن مۇنداي شينالار اۆتوموبيلدەردە قولدانىلۋى مۇمكىن دەگەن پىكىرلەر دە ايتىلۋدا. بۇل شينالار نارىعىنا ۇلكەن وزگەرىستەر اكەلەتىن وقيعا بولار ەدى.