وڭتۇستىك كورەيادا وسىنداي وزگەرىتەر ورىن الۋى مۇمكىن.
جەرگىلىكتى اۆتووندىرۋشىلەردىڭ ءبىرى ءداستۇرلى قوزعالتقىشى بار مودەلدەردى ساتۋدى توقتاتادى، دەپ حابارلايدى Almaty-akshamy.kz 24.kz-كە سىلتەمە جاساپ.
بۇل شارالار حالىقتىڭ ەلەكترموبيلدەرگە كوشۋىن جىلدامداتپاق. ءقازىر تۇرعىندار اراسىندا ەكولوگيالىق تازا ماشينالاردىڭ ۇلەسى تىم از. سوندىقتان بيىلىك وسىنداي قادامدارعا بارۋعا ءماجبۇر.
سەۋلدەن 80 شاقىرىم جەردە ورنالاسقان اسان قالاسىندا 198 مىڭعا جۋىق كولىك تىركەلگەن. ونىڭ 3400ء-ى عانا ەلەكتر قوزعالتقىشىمەن جابدىقتالعان، بۇل 2 پايىزعا دا جەتپەيدى. سوندىقتان بولار ەلەكتر قۋاتىمەن جۇرەتىن كولىكتەرگە ارنالعان قۋاتتاۋ بەكەتتەرى بوس تۇرادى. ستانسيا تاۋلىك بويى جۇمىس ىستەيدى جانە مۇندا ماشينانى تەگىن قۋاتتاۋعا مۇمكىندىك بار. ەلەكتر كولىكتەردى زەرتتەيتىن كيم حەن يل 10 جىل بويى بەنزينمەن جۇرەتىن كولىكتى تىزگىندەيدى. كەلەر جىلى ول ەلەكتروموبيلگە كوشۋدى جوسپارلاپ وتىر.
«2025 جىلى ەلەكتر كولىكتەرىنىڭ سانى كۇرت وسەدى. سوندا زاريادتاۋ بەكەتتەرى جەتپەۋى مۇمكىن، ال ءقازىر تاپشىلىق جوق. ەلەكتر كولىكتەرگە اقىلى جولدا جۇرۋگە 50% جەڭىلدىك بار. قۋاتتاۋ ادەتتەگى قوزعالتقىشقا قاراعاندا 2 ەسە ارزان. سونىمەن قاتار، ەلەكتر كولىكتى ساتىپ العاندا مەملەكەت 7 جارىم مىڭ دوللاردان استام سۋبسيديا بەرەدى»، - دەيدى ساراپشى كيم حەن يل.
ەلەكتر كولىكتىڭ ەڭ ۇلكەن كەمشىلىگى - ءورت قاۋىپسىزدىگى. ستاتيستيكاعا سايكەس، ەلەكتر ماشينادا ءورت ءجيى تىركەلمەسە دە، قىزىل جالىندى ءسوندىرۋ وتە قيىن.
«وڭتۇستىك كورەياداعى ەرەجەگە سايكەس، كوپقاباتتى ءۇي سالۋ كەزىندە اۆتوتۇراقتاردىڭ 50 پايىزى ەلەكتروموبيلدەرگە ارنالعان بولۋى كەرەك. بۇل ادەتتە جەراستى تۇراعى. ءبىراق، ەگەر ءورت بولسا، ەلەكتروموبيل تەز جانىپ، ءورت كورشى كولىكتەرگە، سودان كەيىن تۇرعىنداردىڭ پاتەرلەرىنە تارالۋى مۇمكىن. سوندىقتان ەلەكتروموبيلدەردى كوشە تۇراقتارىنا نەمەسە عيماراتتاردىڭ شاتىرىنا قويعان دۇرىس»، -دەيدى كورەيا ءورتتى زەرتتەۋ قاۋىمداستىعىنىڭ پرەزيدەنتى كيم گۆان سون.
ەلەكتركولىكتەردىڭ وزگە دە كەمشىلىكتەرىنە توقتالاتىن بولساق، ونى قۋاتتاۋ جارتى ساعاتقا سوزىلۋى مۇمكىن. ال تولىق قۋاتتالعان كەزدە ەلەكتروموبيل ەڭ كوپ دەگەندە 500 شاقىرىم جۇرە الادى. سۋىق مەزگىلدە باتارەيا تەز تاۋسىلادى. سونىمەن قاتار، ونىڭ قىزمەت ەتۋ مەرزىمى 7 جىل، سودان كەيىن جاڭا باتارەيا ساتىپ الۋى كەرەك. ال ونىڭ باعاسى – جاڭا ەلەكتركولىك باعاسىنىڭ شامامەن 40%-ىنا تەڭ. ەلەكتروموبيلدەردىڭ بارلىق كەمشىلىگىنە قاراماستان، وڭتۇستىككورەيالىق جۇرگىزۋشىلەر مۇنداي كولىكتەرگە كوشۋگە ءماجبۇر بولادى. ويتكەنى جانار-جاعارماي وندىرۋگە قاجەتتى شيكىزاتتىڭ ءجۇز پايىزىن سىرتتان اكەلۋگە تۋرا كەلەدى. سونىمەن قاتار، اتموسفەراعا تارالاتىن قالدىقتاردى ازايتۋ بويىنشا حالىقارالىق مىندەتتەمەلەردى ورىنداۋ قاجەت. 2035 جىلدان باستاپ وڭتۇستىك كورەيا ىشتەن جاناتىن قوزعالتقىشى بار كولىكتەردى تىركەۋگە تىيىم سالۋدى جوسپارلاپ وتىر. ال ءىرى جەرگىلىكتى اۆتووندىرۋشىلەردىڭ ءبىرى 2040 جىلدان باستاپ بەنزين مەن ديزەلدى قوزعالتقىشتارى بار مودەلدەردى ساتۋدى توقتاتادى. بۇل الداعى 15 جىلدا كولىكتەردىڭ دەنى ەلەكتر قۋاتىنا تولىقتاي كوشەدى دەگەن ءسوز.