جاڭا الەۋمەتتىك تولەمدەردى ەنگىزۋ، جۇمىسپەن قامتۋدى بەلسەندى تۇردە قولداۋ جانە قىزمەتكەرلەر قۇقىعىن نىعايتۋ ەڭبەك جانە حالىقتى الەۋمەتتىك قورعاۋ مينيسترلىگى قىزمەتىنىڭ 2024 جىلدىڭ ءبىرىنشى جارتىجىلدىعىنداعى نەگىزگى باعىتتارىنا اينالدى. الەۋمەتتىك باعدارلامالاردى باسقارۋ مەن باقىلاۋدا يننوۆاسيالىق تاسىلدەردى جۇزەگە اسىرۋعا ەرەكشە كوڭىل ءبولىندى، دەپ حابارلايدى aqshamnews.kz Primeminister.kz سايتىنا سىلتەمە جاساپ.
ەڭبەك نارىعىن دامىتۋ جانە الەۋمەتتىك قورعاۋ
2024 جىلدىڭ ءبىرىنشى جارتىجىلدىعىندا ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىڭ حالىق الدىنداعى بارلىق الەۋمەتتىك مىندەتتەمەلەرىنىڭ ۋاقتىلى ورىندالۋىن قامتاماسىز ەتتى.
بيىلعى 1 قاڭتاردان باستاپ بازالىق زەينەتاقى مەن بارلىق مەملەكەتتىك جاردەماقىلار ينفلياسيا دەڭگەيىنە يندەكستەلدى، ال ورتاق زەينەتاقى ينفلياسيا دەڭگەيىنەن 2%-عا جوعارى بولدى. قازاقستاندىق جاس بۋىن اراسىندا بولاشاق زەينەتاقىنىڭ بارابار دەڭگەيىن قامتاماسىز ەتۋ ءۇشىن جۇمىس بەرۋشىلەر تاراپىنان مىندەتتى زەينەتاقى جارنالارىن كەزەڭ-كەزەڭىمەن ەنگىزۋ باستالدى.
زياندى ەڭبەك جاعدايىندا ۇزاق ۋاقىت بويى جۇمىس ىستەيتىن ادامداردى الەۋمەتتىك قورعاۋ دەڭگەيىن ارتتىرۋ ماقساتىندا 2024 جىلدىڭ 1 قاڭتارىنان باستاپ ارنايى الەۋمەتتىك تولەم ەنگىزىلگەن بولاتىن. الەۋمەتتىك ساقتاندىرۋ جۇيەسىنە قاتىساتىن 1 ملن-نان استام جۇمىس ىستەيتىن ازامات مەملەكەتتىك الەۋمەتتىك ساقتاندىرۋ قورىنان 5 الەۋمەتتىك تاۋەكەل بويىنشا 453 ملرد تەڭگە كولەمىندە تولەمدەر الدى.
رەسپۋبليكالىق بيۋدجەت قاراجاتى ەسەبىنەن بازالىق جانە ورتاق زەينەتاقىنى قوسا العاندا، الەۋمەتتىك تولەمدەردىڭ 42 ءتۇرى تولەنەدى. بيىلعى 6 ايدا 4،3 ملن ادامعا: ونىڭ ىشىندە 2،4 ملن زەينەتكەر مەن 1،9 ملن مەملەكەتتىك جاردەماقى الۋشىعا زەينەتاقى جانە جاردەماقى تولەۋگە 2،6 ترلن تەڭگە ءبولىندى. 2024 جىلعى 1 شىلدەدەگى جاعداي بويىنشا ومىرلىك قيىن جاعدايعا تاپ بولعان 67 مىڭ وتباسىنىڭ 355 مىڭنان استام ادامىنا اتاۋلى الەۋمەتتىك كومەك تاعايىندالدى.
جۇمىسپەن قامتۋدى قولداۋ شارالارى
315 مىڭنان استام قازاقستاندىق جۇمىسپەن قامتۋدى بەلسەندى قولداۋ شارالارىمەن قامتىلعان. 231 مىڭعا جۋىق ادام جۇمىسقا ورنالاستىرىلسا، ونىڭ 98 مىڭعا جۋىعى تۇراقتى جۇمىس ورنىنا يە بولدى. ەڭبەك نارىعىندا سۇرانىسقا يە داعدىلار بويىنشا 36 مىڭنان استام جۇمىسسىز ازامات ونلاين ءبىلىم السا، ونىڭ 33 مىڭعا جۋىعى وقۋىن اياقتادى. «باستاۋ بيزنەس» جوباسى اياسىندا 38 مىڭنان استام ادام كاسىپكەرلىك نەگىزدەرىنە وقىتىلدى، 24 مىڭنان استامى وقۋىن اياقتاپ، سەرتيفيكاتتار الدى. 110 مىڭنان استام قازاقستاندىق قىزمەت سالاسىن تاڭداۋ بويىنشا الەۋمەتتىك كاسىپتىك باعدارلاۋدان ءوتتى. سونىمەن قاتار جاڭا بيزنەس-باستامالاردى ىسكە اسىرۋ ءۇشىن حالىقتىڭ الەۋمەتتىك وسال ساناتتارىنا جاتاتىن ازاماتتارعا 400 اەك مولشەرىندە 4 مىڭنان استام گرانت بەرىلدى.
مينيسترلىك 2029 جىلعا دەيىنگى ەڭبەك نارىعىن دامىتۋ تۇجىرىمداماسىن ىسكە اسىرۋ بويىنشا جۇيەلى جۇمىس جۇرگىزىپ كەلەدى. وڭىرلەر مەن سالالارداعى ساپالى جۇمىس ورىندارىن باقىلاۋ جۇيەسى ازىرلەنىپ، قولدانىلۋدا. رەسپۋبليكادا ساپالى جۇمىس ورىندارىنىڭ سانى 2،3 ملن-عا جەتتى، ونىڭ ىشىندە 200 مىڭعا جۋىق جاڭا جۇمىس ورنى اشىلدى.
ەڭبەك قۇقىعىن قورعاۋ، زاڭناماداعى وزگەرىستەر جانە باقىلاۋدى كۇشەيتۋ
جىل باسىنان بەرى مەملەكەتتىك ەڭبەك ينسپەكتورلارى 28،7 مىڭنان استام قىزمەتكەردىڭ قۇقىعىن قورعادى. اتاپ ايتقاندا، 9،5 مىڭ قىزمەتكەرگە 2 ملرد تەڭگەدەن استام سوماعا جالاقى بويىنشا بەرەشەك تولەندى. جۇرگىزىلگەن تەكسەرۋلەر ناتيجەسىندە 19 مىڭنان استام قىزمەتكەردىڭ ەڭبەك قۇقىعى قورعالدى.
پلاتفورمالىق جۇمىسپەن قامتۋدى رەگلامەنتتەيتىن جانە اتالعان سالادا جۇمىس ىستەيتىن قازاقستاندىقتاردىڭ ەڭبەك قۇقىعى مەن الەۋمەتتىك كەپىلدىكتەرىن قورعاۋدى قامتاماسىز ەتەتىن زاڭناماعا تۇزەتۋلەر قابىلداندى. مەملەكەت باسشىسى مەملەكەتتىك ەڭبەك ينسپەكسياسىن جەرگىلىكتى اتقارۋشى ورگانداردان ەڭبەك جانە حالىقتى الەۋمەتتىك قورعاۋ مينيسترلىگىنىڭ قاراماعىنا بەرۋدى كوزدەيتىن زاڭعا قول قويدى.
وسىعان بايلانىستى مەملەكەتتىك ەڭبەك ينسپەكسياسى كوميتەتى مەن ونىڭ اۋماقتىق بولىمشەلەرى اشىلادى، وڭىرلەردەگى ينسپەكتورلار سانى ارتادى. بۇل ەڭبەك زاڭناماسىنىڭ ساقتالۋىنا باقىلاۋدى كۇشەيتۋگە، قىزمەتكەرلەردىڭ قۇقىعى مەن مۇددەسىن قورعاۋعا، ەلىمىزدىڭ كاسىپورىندارىنداعى ءقاۋىپسىز ەڭبەك جاعدايىن قامتاماسىز ەتۋگە، سونداي-اق ەڭبەك داۋى مەن جانجالىنىڭ تۋىنداۋ ءقاۋپىن ازايتۋعا مۇمكىندىك بەرەدى.
2030 جىلعا دەيىنگى ءقاۋىپسىز ەڭبەك تۇجىرىمداماسى بەلسەندى تۇردە ىسكە اسىرىلۋدا. كاسىپورىنداردىڭ سيفرلىق كارتاسى جاسالدى، ول ناقتى ۋاقىت رەجيمىندە ەڭبەك جاعدايلارىن باقىلاۋعا مۇمكىندىك بەرەدى. بولاشاقتا بارلىق بيزنەس-پروسەستەر: جۇمىس ورنىن باعالاۋ، جەكە قورعانىس قۇرالدارىن جانە باسقا كەپىلدىكتەر ۇسىنۋ، بارلىق دەڭگەيدە ەڭبەكتى قورعاۋ بويىنشا ءبىلىمىن تەكسەرۋ اۆتوماتتاندىرىلادى.¶
كوشى-قون ساياساتىنىڭ 2027 جىلعا دەيىنگى تۇجىرىمداماسىن ىسكە اسىرۋ شەڭبەرىندە باسقا ەلدەردە جۇمىس ىستەۋگە نيەت بىلدىرگەن قازاقستاندىقتار ءۇشىن جۇيەلى تۇردە وقۋ ورتالىقتارى اشىلىپ كەلەدى. مينيسترلىك شەتەلدەگى ازاماتتارىمىزدىڭ ەڭبەك قۇقىقتارىن قورعاۋ ماقساتىندا ءبىرقاتار مەملەكەتتەرمەن ەكىجاقتى كەلىسىمدەردى پىسىقتادى. 2024 جىلدىڭ 1 شىلدەسىنە دەيىن 8،8 مىڭعا جۋىق ەتنيكالىق قازاق تاريحي وتانىنا ورالىپ، قانداس مارتەبەسىن الدى.
جۇمىس كۇشىنىڭ ۇتقىرلىعىن ارتتىرۋ اياسىندا جۇمىس كۇشى ارتىق وڭىرلەردەن 4،8 مىڭنان استام ادام ەڭبەك تاپشىلىعى بار وڭىرلەرگە ءوز ەركىمەن قونىس اۋداردى. قونىس اۋدارۋشىلاردىڭ بارلىعىنا مەملەكەتتىك قولداۋ شارالارى كورسەتىلدى.
سونىمەن قاتار «ادام ساۋداسىنا قارسى ءىس-قيمىل تۋرالى» جاڭا زاڭ قابىلداندى. ونىڭ شەڭبەرىندە ادام ساۋداسى قۇرباندارىن الەۋمەتتىك قورعاۋدى قامتاماسىز ەتۋ جانە ءتيىستى نورماتيۆتىك قۇقىقتىق اكتىلەردى بەكىتۋ فۋنكسيالارى ەڭبەك جانە حالىقتى الەۋمەتتىك قورعاۋ مينيسترلىگىنە جۇكتەلگەن. مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ بويىنشا اۋقىمدى جۇمىس جۇرگىزىلدى. جىل باسىنان بەرى الەۋمەتتىك قىزمەتتەر پورتالى ارقىلى 514 مىڭنان استام قىزمەت كورسەتىلدى، ونىڭ ىشىندە 448 مىڭعا جۋىق تەحنيكالىق وڭالتۋ قۇرالدارى بەرىلدى.
مۇگەدەكتىك توبىن بەلگىلەۋ بويىنشا مەديسينالىق-الەۋمەتتىك ساراپتاما جۇرگىزۋدىڭ سىرتتاي فورماتى ارقىلى پيلوتتىق جوبانى ىسكە اسىرۋ شەڭبەرىندە ەلىمىزدىڭ بارلىق وڭىرلەرىنەن 45،5 مىڭنان استام ءوتىنىم قارالدى.
حالىقتىڭ الەۋمەتتىك وسال ساناتتارىنىڭ قۇقىقتارى جونىندەگى ۋاكىلدىڭ قۇزىرەتى زاڭنامالىق تۇرعىدان بەكىتىلدى.
ارناۋلى الەۋمەتتىك قىزمەت كورسەتەتىن سۋبەكتىلەردى ليسەنزيالاۋدى كوزدەيتىن زاڭناماعا تۇزەتۋلەر قابىلداندى. پروسەستى رەتتەيتىن نورماتيۆتىك-قۇقىقتىق اكتىلەر، سونداي-اق الەۋمەتتىك قىزمەتكەرلەر ءۇشىن كاسىبي ستاندارتتار ازىرلەندى. بۇل كورسەتىلەتىن قىزمەتتەردىڭ ساپاسىن جاقسارتۋعا جانە ولاردى ۇسىناتىن سۋبەكتىلەردىڭ قىزمەتىنە باقىلاۋدى كۇشەيتۋگە مۇمكىندىك بەرەدى.
مەملەكەتتىك الەۋمەتتىك قورعاۋ ينسپەكتورلارى مۇگەدەكتىگى بار ازاماتتاردى الەۋمەتتىك قورعاۋ، ارناۋلى الەۋمەتتىك قىزمەت كورسەتۋ جانە الەۋمەتتىك قامسىزداندىرۋ سالاسىندا باقىلاۋدى قامتاماسىز ەتۋ بويىنشا 1،7 مىڭنان استام تەكسەرۋ جۇرگىزدى. ەلىمىزدىڭ بارلىق وڭىرلەرىندە جەرگىلىكتى اتقارۋشى ورگاندار الەۋمەتتىك ماڭىزى بار نىساندار مەن ينفراقۇرىلىمدى مۇگەدەكتىگى بار ادامدار ءۇشىن بەيىمدەۋ بويىنشا اۋقىمدى جۇمىس جۇرگىزۋدە.