بيۋدجەتتەن 84،7 ملرد تەڭگە ءبولىندى.
قازاقستان ۇكىمەتى جارتى ميلليوننان استام قازاقستاندىققا الەۋمەتتىك كومەك بەردى، دەپ حابارلايدى Almaty-akshamy.kz.
«2022 جىلعى 1 ماۋسىمداعى جاعداي بويىنشا، 113،9 مىڭ وتباسىنداعى 585،3 مىڭ ادامعا اتاۋلى الەۋمەتتىك كومەك تاعايىندالدى. بيىل وسى ماقساتتارعا بيۋدجەتتەن 84،7 ملرد تەڭگە ءبولىندى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
ااك وتباسىنىڭ ءاربىر مۇشەسىنە جان باسىنا شاققانداعى ورتاشا تابىسى وڭىرلىك ەڭ تومەنگى كۇنكورىس دەڭگەيىنىڭ 70%-ىنان تومەن ازاماتتارعا تاعايىندالادى.
بۇدان باسقا، ااك كورسەتۋدىڭ جاڭا تەتىگىن ىسكە اسىرۋ شەڭبەرىندە ەلىمىزدىڭ بارلىق وڭىرىندە تابىسى از وتباسىلاردىڭ مەكتەپ جاسىنا دەيىنگى بالالارىن كەپىلدىك بەرىلگەن الەۋمەتتىك توپتامامەن (بۇدان ءارى – الەۋمەتتىك توپتاما) قامتاماسىز ەتۋ بويىنشا جۇمىس جۇرگىزىلۋدە.
2022 جىلعى 1 ماۋسىمدا ااك الۋشىلار قاتارىنداعى 1 جاستان 6 جاسقا دەيىنگى 150،2 مىڭ بالا ازىق-تۇلىك جانە تۇرمىستىق حيميا جيىنتىعى تۇرىندە الەۋمەتتىك توپتاما تاعايىندالدى.
ەستەرىڭىزگە سالا كەتەيىك، بيىل قاڭتار ايىنداعى تج رەجيمىنە بايلانىستى 2021 جىلدىڭ 4 توقسانىندا ااك العان ازاماتتارعا تولەمدەر 2022 جىلدىڭ 1 توقسانىنا اۆتوماتتى تۇردە ۇزارتىلدى. بۇل رەتتە جاڭا الۋشىلارعا ەلەكتروندىق ۇكىمەت پورتالى ارقىلى اتاۋلى الەۋمەتتىك كومەك تاعايىنداۋعا ءوتىنىش بەرۋ مۇمكىندىگى بەرىلدى.
قازىرگى ۋاقىتتا قازاقستاندىقتار ااك تاعايىنداۋعا ءوتىنىشتى تۇرعىلىقتى جەرى بويىنشا جۇمىسپەن قامتۋ ورتالىعىندا، سونداي-اق egov.kz ەلەكتروندىق ۇكىمەت پورتالى ارقىلى بەرە الادى.