«باي-قۋاتتى بولايىق!»

الماتىدا وسىنداي اتاۋمەن نۇرتىلەۋ يمانعالي ۇلىنىڭ 70 جىلدىعىنا ارنالعان كورمەلەر تىزبەگىنىڭ اشىلۋى وتەدى.

اشىلۋ سالتاناتىنا الماتى قالاسى اكىمدىگىنىڭ وكىلدەرى، قازاق تەليەۆيزياسىنىڭ مايتالماندارى، ب ا ق جانە مۋزەي دوستارى قاتىسادى، دەپ حابارلايدى Almaty-akshamy.kz.

العاشقى كورمە نۇر-سۇلتان قالاسىندا  مامىر ايىندا قازاقستان رەسپۋبليكاسىنىڭ ۇلتتىق مۋزەيىنىڭ ۇيىمداستىرۋىمەن وتكەن.

نۇرتىلەۋ يمانعالي ۇلى 1952 جىلى 14 مامىردا الماتى وبلىسى، اقسۋ اۋدانى، قاراسۋ اۋىلىندا دۇنيەگە كەلگەن. قازاق ۋنيۆەرسيتەتىنىڭ جۋرناليستيكا فاكۋلتەتىنىڭ تۇلەگى. 1974 جىلدان باستاپ قازاق تەليەۆيزياسىنىڭ «جاستار» رەداكسياسىندا ءتىلشى، رەداكتور، باس رەداكتور، ساياسي شولۋشى، «حابار» اگەنتتىگىندە مودەراتور-جۇرگىزۋشى بولىپ قىزمەت ەتتى.  2003-2006 جىلدارى ق ر ۇكىمەت كەڭسەسىنىڭ الەۋمەتتىك-مادەني دامۋ ءبولىمىنىڭ سەكتور مەڭگەرۋشىسى، ق ر پرەزيدەنت اكىمشىلىگىندە باس مامان قىزمەتتەرىن اتقاردى.

2006-2008 جىلدارى رەسپۋبليكالىق «قازاقستان» تەلەراديو كورپوراسياسىندا باسقارما ءتوراعاسى بولىپ ەڭبەك ەتتى.

نۇرتىلەۋ يمانعالي ۇلى سانالى عۇمىرىنىڭ جارتى عاسىرىن تەليەۆيزياعا ارناعان. قازاق تەليەۆيزياسىندا  4500-دان استام حاباردىڭ اۆتورى. «قۇرداستار»، «جاستار داۋىسى»،  «اراي»، «التىباقان»، «بەتپە-بەت»، «قولتاڭبا» ت.ب. اۆتورلىق باعدارلامالارىن جاسادى.

نۇرتىلەۋ يمانعالي ۇلى - قازاقستاننىڭ قۇرمەتتى ءجۋرناليسى، ق ر جازۋشىلار وداعىنىڭ مۇشەسى، الماتى وبلىسى جانە اقسۋ اۋدانىنىڭ قۇرمەتتى ازاماتى، قازاقستان رەسپۋبليكاسىنىڭ  ەڭبەك سىڭىرگەن قايراتكەرى. 2018 جىلى «پاراسات» وردەنىمەن ماراپاتتالدى.

كورمەدە نۇرتىلەۋ يمانعالي ۇلىنىڭ جەكە زاتتارى، قۇجاتتارى، كىتاپتارى مەن ماراپاتتارى قويىلعان.  

جىل بويىنا «باي-قۋاتتى بولايىق» اتتى كورمەلەر تىزبەگى قازاقستاننىڭ باسقا قالالارىندا دا جالعاسىن تاپپاق.