قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى.
جىلدىڭ باسىنان بەرى 10،5 مىڭعا جۋىق ەتنيكالىق قازاق قانداس مارتەبەسىن الدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
"2023 جىلعى 1 شىلدەدەگى جاعداي بويىنشا 10 488 ەتنيكالىق قازاق تاريحي وتانىمەن تابىسىپ، قانداس مارتەبەسىن العان. جالپى 1991 جىلدان بەرى رەسپۋبليكاعا 1 ملن 117،6 مىڭ ەتنيكالىق قازاق ورالدى"، - دەلىنگەن حابارلامادا.
جىل باسىنان قازاقستانعا ورالعان قانداستاردىڭ جارتىسى وزبەكستاننان (56%)، 19،3%ء-ى – قىتايدان، 9،7%ء-ى – رەسەيدەن، 7،8%ء-ى – موڭعوليادان، 4،6%ء-ى – تۇرىكمەنستاننان جانە 2،6%ء-ى باسقا ەلدەردەن كەلگەن.
ەڭبەككە قابىلەتتى جاستاعى ەتنيكالىق قازاقتاردىڭ سانى 65،6%ء-تى، ەڭبەككە قابىلەتتى جاستان كىشى 25،8%ء-تى جانە زەينەتكەرلەر 8،6%ء-تى قۇرايدى. ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 16،7%ء-ى – جوعارى ءبىلىمدى، 37،1%ء-ى – ورتا كاسىبي ءبىلىمدى، 38،8%ء-ى – جالپى ورتا ءبىلىمدى.
سونداي-اق، مينيسترلىكتىڭ اقپاراتىنشا، قانداستاردى قونىستاندىرۋ ءۇشىن ەڭبەك كۇشى تاپشى وڭىرلەر انىقتالدى. ولار: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.
قونىستاندىرۋ وڭىرلەرىندە بيىل قانداستاردى قابىلداۋ كۆوتاسى 1 925 ادامدى قۇرايدى. 2023 جىلعى 1 شىلدەدەگى جاعداي بويىنشا بۇل وڭىرلەرگە 1 032 قانداس قونىس اۋداردى.
وسى وڭىرلەرگە بارعان قانداستارعا سۋبسيديا تۇرىندە مەملەكەتتىك قولداۋ كورسەتىلەدى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (241،5 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (51،7-دەن 103،5 مىڭ تەڭگەگە دەيىن) مولشەرىندە.
"جىل باسىنان بەرى 565 قانداسقا ءتۇرلى قولداۋ شارالارى كورسەتىلدى. اتاپ ايتقاندا، 293 ادام تۇراقتى جۇمىسقا ورنالاستىرىلدى، 565 ادام ءبىرجولعى سۋبسيديا الدى، ال 257 قانداسقا تۇرعىن ءۇي شىعىندارى سۋبسيديالاندى"، - دەيدى ۆەدومستۆوداعىلار.
بۇعان قوسا ازاماتتاردى سولتۇستىك وڭىرلەرگە كوشىرۋگە اتسالىساتىن جۇمىس بەرۋشىلەردى قولداۋ بويىنشا ينستيتۋسيونالدىق شارالار قابىلداندى. باسپانا ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%ء-ى نەمەسە ءبىر وتباسىنا 4 ملن تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.
ەسكە سالساق، وسى جىلى پيلوتتىق رەجيمدە قازاقستان ەلشىلىكتەرى ارقىلى "ءبىر تەرەزە" قاعيداتى بويىنشا قانداس مارتەبەسىن بەرۋ تەتىگى ىسكە اسىرىلدى.
پيلوتتىق جوبا اياسىندا ەلىمىزگە بارۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا رەسپۋبليكانىڭ شەت ەلدەردەگى مەكەمەلەرى ارقىلى ەتنيكالىق قازاقتاردان جاڭا فورماتتا 1 984 ءوتىنىش (656 وتباسى) قابىلدانعان.