دەنساۋلىق ساقتاۋ مينيسترلىگى ماربۋرگ ۆيرۋسىنىڭ تارالۋىنا بايلانىستى ەپيدەميولوگيالىق باقىلاۋدى كۇشەيتتى
ق ر باس مەملەكەتتىك سانيتاريالىق دارىگەرى سارحات بەيسەنوۆانىڭ ايتۋىنشا، دەنساۋلىق ساقتاۋ مينيسترلىگى دۇنيەجۇزىلىك دەنساۋلىق ساقتاۋ ۇيىمىنىڭ جاڭا ءقاۋىپتى ينفەكسيا — ماربۋرگ ۆيرۋسىنىڭ ءورشۋى تۋرالى ەسكەرتۋىنە بايلانىستى باقىلاۋ شارالارىن كۇشەيتۋدە.
ماربۋرگ ۆيرۋسى — ادامدار مەن پريماتتارعا اسەر ەتەتىن سيرەك كەزدەسەتىن، اۋىر ۆيرۋستىق گەمورراگيالىق قىزبا. بۇل ۆيرۋس جارقاناتتاردا كەزدەسىپ، ولاردان ادامدارعا بەرىلۋى مۇمكىن.
ماربۋرگ قىزباسىنىڭ تابيعي وشاقتارى
بۇل اۋرۋ وڭتۇستىك، باتىس جانە ورتالىق افريكا ەلدەرىندە، اتاپ ايتقاندا، وڭتۇستىك افريكا رەسپۋبليكاسى، گابون، سۋدان، كونگو دەموكراتيالىق رەسپۋبليكاسى، ليبەريا، گۆينەيا، زيمبابۆە، كەنيادا كەزدەسەدى. اۋرۋدىڭ بەلگىلەرى ۆيرۋستى جۇقتىرعاننان كەيىن 2-21 كۇن ىشىندە پايدا بولادى.
دەنساۋلىق ساقتاۋ مينيسترلىگى پروفيلاكتيكا شارالارىن ساقتاۋدى ۇسىنادى
حالىقتىڭ جوعارى كوشى-قونىن ەسكەرە وتىرىپ، قازاقستان دەنساۋلىق ساقتاۋ مينيسترلىگى قازاقستاندىقتارعا ەندەميالىق ايماقتارعا بارعان كەزدە كەلەسى ساقتىق شارالارىن ورىنداۋدى ۇسىنادى:
1. جۇقتىرعان ادامدارمەن بايلانىستا بولۋدان اۋلاق بولۋ.
2. افريكا دجۋنگليىندە كەزدەسەتىن جابايى جانۋارلاردان ساق بولۋ.
3. جەرگىلىكتى جانۋارلاردىڭ ناشار قۋىرىلعان ەتىن تۇتىنباۋ.
4. ۆيرۋستىڭ اسيمپتوماتيكالىق تاسىمالداۋشىسى بولىپ تابىلاتىن مىسىرلىق جارقاناتتار مەكەندەيتىن ۇڭگىرلەر مەن شاحتالارعا بارماۋ.
5. اۋرۋ بەلگىلەرى پايدا بولعان كەزدە دەرەۋ مەديسينالىق كومەككە جۇگىنۋ.
6. جەكە گيگيەنا ەرەجەلەرىن قاتاڭ ساقتاۋ.
ماربۋرگ ۆيرۋسى نەگە ءقاۋىپتى؟
ماربۋرگ ۆيرۋسىنا قارسى ارنايى ەم نەمەسە ۆاكسينا جوق. تەك سيمپتوماتيكالىق ەمدەۋ عانا جۇرگىزىلەدى.
بۇل ۆيرۋس ادامعا تىكەلەي بايلانىس ارقىلى بەرىلەدى. ۆيرۋستى زاقىمدالعان تەرى نەمەسە شىرىشتى قابىق ارقىلى جۇقتىرۋعا بولادى. سونداي-اق ۆيرۋسپەن زاقىمدالعان زاتتارعا تيگەندە، ناۋقاستىڭ توسەك-ورنى نەمەسە كيىمىن ۇستاعان كەزدە جۇقتىرۋ ءقاۋپى بار.
اۋرۋدىڭ نەگىزگى بەلگىلەرى: قىزبا، تاماق اۋرۋى، بورتپە، ءىشتىڭ اۋىرۋى، مۇرىن مەن كوزدەن قان اعۋ.
ماربۋرگ ۆيرۋسىنىڭ تارالۋ قاۋپىنە بايلانىستى شەكتەۋ شارالارى قابىلدانادى ما؟
سارحات بەيسەنوۆا دەنساۋلىق ساقتاۋ مينيسترلىگى ماربۋرگ ۆيرۋسىنىڭ ەپيدەميولوگيالىق جاعدايىن مۇقيات قاداعالايتىنىن اتاپ ءوتتى. اۋرۋدىڭ رەسپۋبليكاعا اكەلىنۋىنە جانە تارالۋىنا جول بەرمەۋ ماقساتىندا حالىقارالىق اۋەجايلاردا جانە مەملەكەتتىك شەكارادا بارلىق كەلەتىن جولاۋشىلاردىڭ بايلانىسسىز تەرمومەترياسى جۇرگىزىلىپ، سانيتاريالىق-كارانتيندىك باقىلاۋ جۇزەگە اسىرىلۋدا.