جۇمىسشى ماماندىقتار جىلى – ەڭبەك نارىعىنداعى وزەكتى ماسەلەلەردى شەشۋگە باعىتتالعان ءىرى باستاما. تۇركىستان وبلىسىندا وسى باعىتتا جۇيەلى جۇمىستار اتقارىلىپ، ناقتى ناتيجەلەرگە قول جەتكىزىلۋدە. وبلىس اكىمى نۇرالحان كوشەروۆتىڭ توراعالىعىمەن وتكەن جيىندا وسى ماسەلە كەڭىنەن تالقىلاندى.
باستامانىڭ نەگىزگى ماقساتى – جاستاردىڭ تەحنيكالىق جانە وندىرىستىك ماماندىقتارعا قىزىعۋشىلىعىن ارتتىرۋ، جۇمىسسىزدىق دەڭگەيىن تومەندەتۋ جانە ەڭبەككە قۇرمەت سەزىمىن قالىپتاستىرۋ. سونىمەن قاتار جاڭا جۇمىس ورىندارىن اشۋ، شەتەلدىك ينۆەستورلارمەن بىرلەسكەن كاسىپورىندارعا وتاندىق كادرلار دايارلاۋ، كاسىبي ءبىلىمنىڭ قولجەتىمدىلىگىن قامتاماسىز ەتۋ كوزدەلگەن.
بۇگىندە وبلىستاعى 50 تەحنيكالىق جانە كاسىبي ءبىلىم بەرۋ ۇيىمىندا 47 مىڭنان استام ستۋدەنت 84 ماماندىق بويىنشا وقىپ جاتىر. جاڭا وقۋ جىلىندا 15،5 مىڭ گرانت ءبولىنىپ، سونىڭ ىشىندە 8 880 گرانت جۇمىسشى ماماندىقتارىنا بەرىلدى. دۋالدى جۇيەمەن 31 مىڭنان استام ستۋدەنت ءبىلىم الۋدا. وتكەن جىلى كوللەدج تۇلەكتەرىنىڭ 75 پايىزدان استامى جۇمىسقا ورنالاسقان.
جىل باسىنان بەرى ايماقتا 64 بوس جۇمىس ورىندارى جارمەڭكەسى ۇيىمداستىرىلىپ، 7 مىڭعا جۋىق ۆاكانسيا ۇسىنىلدى. سونىمەن قاتار 10 مىڭنان استام وقۋشى مەن ستۋدەنت 37 كاسىپورىندا بولىپ، ءوندىرىستىڭ جۇمىس بارىسىمەن تانىستى. كوللەدجدەردە ستارتاپ جوبالار قولعا الىنىپ، حالىقارالىق اككرەديتاسيا جۇرگىزىلۋدە.
جالپى 2025 جىلى «ايماقتىق كارتا» اياسىندا 130 مىڭنان استام جۇمىس ورنى اشۋ جوسپارلانعان. قىركۇيەك ايىنا دەيىن ونىڭ 100 مىڭنان استامى ىسكە اسىرىلىپ، 32 مىڭنان استامى جۇمىسشى ماماندىقتارىنا ارنالدى.
تۇركىستان وبلىسىندا جۇرگىزىلىپ جاتقان بۇل جۇمىستار ەڭبەك نارىعىنداعى سۇرانىسقا جاۋاپ بەرىپ قانا قويماي، جاستاردىڭ كاسىبي بىلىكتىلىگىن ارتتىرىپ، ايماقتىڭ تۇراقتى دامۋىنا ىقپال ەتۋدە.