استانادا 7-8 سىنىپ وقۋشىلارى اراسىندا جاراتىلىستانۋ-ماتەماتيكالىق پاندەر بويىنشا رەسپۋبليكالىق وليمپيادا اياقتالدى.
وعان ەلىمىزدىڭ بارلىق ايماقتارىنان 314 وقۋشى قاتىستى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
بارلىعى 138 ماراپات ساراپقا سالىندى: ءبىرىنشى ورىن - 28، ەكىنشى ورىن – 45 جانە ءۇشىنشى ورىن – 65.
«سىزدەر كۇردەلى تاپسىرمالاردى شەشۋدە ناعىز شەبەرلىك پەن بىلىمدەرىڭىزدى كورسەتتىڭىزدەر. بۇگىنگى جەڭىستەرىڭىز ءبىلىم جولىندا جاڭالىقتار اشاتىن ۇزاق تا قىزىق جولدىڭ باستاماسى بولسىن. عىلىم مەن ءبىلىم الەمىندە الداعى ۋاقىتتا دا تابىستار، جاڭا بيىكتەر مەن ۇمىتىلماس ساتتەر تىلەيمىن»، - دەدى ماراپاتتاۋ راسىمىندە «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى عاجدەمبەك تۇرسىنوۆ.
وليمپيادا قورىتىندىسى بويىنشا ۇزدىك وليمپيادالىق كوماندالار ماراپاتتالدى:
III ورىن – «رفمم» كەاق، شىعىس قازاقستان جانە ماڭعىستاۋ وبلىستارى؛
II ورىن – الماتى قالاسى مەن پاۆلودار وبلىسى؛
I ورىن – استانا قالاسى، اقتوبە مەن تۇركىستان وبلىستارى.
باس جۇلدەنى نازاربايەۆ زياتكەرلىك مەكتەپتەرى كومانداسى جەڭىپ الدى.
ايتا كەتسەك، 7-8 سىنىپ وليمپيادانىڭ باستاپقى كەزەڭىنە 95 282، وبلىستىق كەزەڭگە 9 599 وقۋشى قاتىستى. بۇل كورسەتكىشتەر جارىستىڭ جوعارى دەڭگەيىن جانە وليمپيادانىڭ ماڭىزدىلىعىن كورسەتەدى.