جەدەل قىزمەتتەر كەشەندى جۇمىستار جۇرگىزدى.
قاڭتار ايىنىڭ باسىندا وڭىرلەردە ورىن العان تارتىپسىزدىكتەرگە قاتىسقان كۇدىكتىلەر ەلوردادا ۇستالدى، دەپ حابارلايدى Almaty-akshamy.kz
بۇل تۋرالى نۇر-سۇلتان قالالىق پوليسيا دەپارتامەنتى باسقارماسىنىڭ باستىعى ارمان ايماعامبەتوۆ ايتتى.
«وزدەرىڭىز دە بىلەتىندەي، قازىرگى ۋاقىتتا نۇر-سۇلتان قالاسىنىڭ اۋماعىندا «قۇقىقتىق ءتارتىپ» جەدەل الدىن الۋ ءىس-شاراسى وتكىزىلىپ جاتىر. ونىڭ اياسىندا ءبىز زاڭسىز اينالىمنان اتىس قارۋلارىن دا تاركىلەدىك»، - دەدى ول بريفينگ بارىسىندا ب ا ق وكىلدەرىنىڭ ساۋالىنا وراي.
وسى رەتتە ول قاڭتاردىڭ باسىنداعى وقيعالار كەزىندە ەلوردادا تارتىپسىزدىكتەرگە جول بەرىلمەگەندىگىن باسا ايتتى.
«قوعامدىق ءتارتىپتى بۇزعانى ءۇشىن ۇستالعاندار بولدى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر»، - دەدى باسقارما باستىعى.
سونىمەن قاتار ەلوردالىق دەپارتامەنت وكىلى ەلىمىزدىڭ وزگە وڭىرلەردە ورىن العان تارتىپسىزدىكتەرگە قاتىستى دەگەن كۇدىكپەن نۇر-سۇلتان قالاسىندا قولعا تۇسكەن كۇدىكتىلەردىڭ دە بولعاندىعىن اتاپ ءوتتى.
«وزگە وڭىرلەردە ورىن العان وقيعالارعا قاتىسقاندار دا ۇستالدى. قازىرگى ۋاقىتتا جامبىل وبلىسىندا جانە الماتى قالاسىندا ورىن العان وقيعالارعا قاتىسقان 3 كۇدىكتى قولعا ءتۇستى. اتالعان تۇلعالاردان ۇرلانعان زاتتار تابىلدى. كەيبىر فاكتىلەرگە قاتىستى جەدەل قىزمەتتەر كەشەندى جۇمىستار جۇرگىزدى. ۇرلانعان تەلەفونداردى ساتىلىمعا شىعارۋ دەرەكتەرى دە بار. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر»، - دەدى ارمان ايماعامبەتوۆ.