ق ر ساۋدا جانە ينتەگراسيا ءمينيسترى ارمان شاققالييەۆ ەكونوميكا، ساۋدا جانە ونەركاسىپ ۆيسە-مينيسترى رەسۋكە كودزۋكي باستاعان جاپونيادان كەلگەن دەلەگاسيامەن كەزدەسۋ وتكىزدى، دەپ حابارلايدى almaty-akshamy.kz
تاراپتار ساۋدا-ەكونوميكالىق ىنتىماقتاستىقتىڭ وزەكتى ماسەلەلەرى مەن پەرسپەكتيۆالارىن، ونىڭ ىشىندە ەكىجاقتى ساۋدانى ۇلعايتۋ مۇمكىندىكتەرىن تالقىلادى.
ارمان شاققالييەۆ اتاپ وتكەندەي، جاپونيا قازاقستانداعى ءىرى ينۆەستورلاردىڭ وندىعىنا كىرەدى. سوڭعى 17 جىلدا جاپوندىق ينۆەستيسيا كولەمى 7،8 ميلليارد دوللاردان استى.
2023 جىلدىڭ 11 ايىنىڭ قورىتىندىسى بويىنشا ءوزارا تاۋار اينالىمى وتكەن جىلدىڭ سايكەس كەزەڭىمەن سالىستىرعاندا 16،5% - عا ۇلعايىپ، 2 ملرد دوللارعا جەتتى.
«ءبىز قازاقستاندىق ونىمدەردىڭ ەكسپورتىن كەڭەيتۋ الەۋەتىن كورىپ وتىرمىز جانە 204 ميلليون دوللارعا 45 وڭدەلگەن تاۋاردى جەتكىزۋدى ودان ءارى ارتتىرۋعا دايىنبىز. قازاقستاندا ءىرى اۋىل شارۋاشىلىعى جانە ازىق-تۇلىك حابىنا اينالۋ ءۇشىن بارلىق رەسۋرستار بار. اۋىل شارۋاشىلىعى ونىمدەرىن، اسىرەسە، جىلقى ەتىن جەتكىزۋدە ۇلكەن مۇمكىندىكتەر بار»، – دەدى ق ر ساۋدا جانە ينتەگراسيا ءمينيسترى.
ساۋدا-ەكونوميكالىق ءوزارا قارىم-قاتىناستاردىڭ ءوسۋى مەن نىعايۋى ءۇشىن ارمان شاققالييەۆ قازاقستاندىق «KazakhExport» پەن جاپونيانىڭ ەكسپورتتىق-كرەديتتىك اگەنتتىگى اراسىندا ساقتاندىرۋ، قايتا ساقتاندىرۋ جانە نەسيەلەرگە كەپىلدىك بەرۋ سالاسىندا تىعىز ىنتىماقتاستىق ورناتۋدى ۇسىندى.
كەزدەسۋدە تاراپتار وساكا قالاسىندا 2025 جىلدىڭ 13 ءساۋىر مەن 13 قازان ايلار ارالىعىندا وتەتىن «ءبىزدىڭ ءومىرىمىز ءۇشىن بولاشاق قوعامىن قۇرۋ» تاقىرىبىنداعى ەكسپو 2025 كورمەسىنە دايىندىق ماسەلەسىن كوتەردى.
قازاقستان رەسپۋبليكاسى ساۋدا جانە ينتەگراسيا ءمينيسترىنىڭ ايتۋىنشا، قازاقستاننىڭ حالىقارالىق كورمەگە قاتىسۋى ەكى ەلدىڭ مۇددەلى كومپانيالارى مەن ىسكەر توپتارى اراسىندا ۇزاق مەرزىمدى جانە ءوزارا ءتيىمدى بايلانىستاردى ورناتۋعا ىقپال ەتەدى.
ءوز كەزەگىندە جاپونيانىڭ ەكونوميكا، ساۋدا جانە ونەركاسىپ ۆيسە-مينيسترى رەسۋكە كودزۋكي ەلدەرىمىز اراسىنداعى ىسكەرلىك قارىم-قاتىناستاردىڭ ودان ءارى جانداندىرۋعا سەنىم ءبىلدىردى، سونداي-اق الداعى كورمەگە ساپالى دايىندىقتى قامتاماسىز ەتۋ ماقساتىندا قازاقستانعا كومەك كورسەتۋگە ۋادە بەردى.