جاپونياداعى جويقىن جەر سىلكىنىسى قايتالانۋى مۇمكىن

ءقازىر جاپونيادا ىزدەۋ-قۇتقارۋ وپەراسيالارى جالعاسىپ جاتىر.

قۋاتى 7،6 باللدىق جەر سىلكىنىسىنەن، 62 ادام قازا تاپقان. ۇيلەر قۇلاپ، عيماراتتار ورتەنىپ، جولدار بۇزىلعان، دەپ حابارلايدى Almaty-akshamy.kz

سالدارىنان قۇتقارۋ جۇمىستارى قيىنداپ وتىر. ءدۇمپۋ قايتالانۋى مۇمكىن دەگەن ءقاۋىپ ءالى سەيىلگەن جوق. ال سۋنامي ءقاۋپى تۋرالى دابىل دوعارىلدى. جويقىن ءزىلزالا قۇرباندارىنىڭ سانى ءالى دە ءوسۋى مۇمكىن. سەبەبى قۇتقارۋشىلار تابيعي اپاتتان زارداپ شەككەن اۋداندارعا جەتە الماي جاتىر.

«جەر سىلكىنىسىنەن بەرى 40 ساعاتتان استام ۋاقىت ءوتتى. زارداپ شەككەندەردى قۇتقارۋ ءۇشىن ۋاقىتپەن جارىسىپ جاتىرمىز. بۇگىن ىزدەستىرۋ-قۇتقارۋ وتريادتارىنىڭ سانىن 1000-نان 2000-عا دەيىن ارتتىرامىز، قۇتقارۋشى يتتەردىڭ سانى دا ەكى ەسە كوبەيەدى»، - دەيدى جاپونيا پرەمەر-مينيسترى فۋميو كيسيدا. 

جاپونيادا قۋاتى 7،6 باللدىق ءزىلزالا دۇيسەنبىدە بولدى. ءدۇمپۋ وشاعى يسيكاۆا پرەفەكتۋراسىنداعى نوتو تۇبەگىندە انىقتالعان. عيماراتتار قۇلاپ، جولدار وپىرىلدى. تەڭىزدە الىپ تولقىن كوتەرىلگەن. سۋنامي بيىكتىگى 1 مەتردەن استى. ودان كەيىن لاي كوشكىنى جۇرگەن. ونداعان مىڭ ادام ەلەكتر جارىعىنسىز قالدى. 100 مىڭعا جۋىق تۇرعىن ءقاۋىپسىز جەرگە كوشىرىلىپ، سپورت زالدارى مەن مەكتەپتەرگە ورنالاستىرىلدى.

«ادامدار قاتتى قورقىپ قالعان. ءتۇندى ۇيقىسىز وتكىزدىك. شاعىن دۇمپۋلەر ۇزدىكسىز قايتالاندى»، - دەيدى ەۆاكۋاسيا ورتالىعىنىڭ وپەراتوى ميسۋرۋ كيدا. 

جاپونيا مەتەورولوگيا اگەنتتىگىنىڭ مالىمەتىنشە، ءزىلزالا بولعان وڭىردە دۇيسەنبىدەن بەرى قۋاتى تومەن 150-دەن اسا ءدۇمپۋ بولعان. ءقاۋىپ ءالى سەيىلگەن جوق. الداعى كۇندەرى ماگنيتۋداسى 7 بالعا جۋىق ءزىلزالا قايتالانۋى مۇمكىن دەگەن ەسكەرتۋ جاسالدى.