جاپونيادا ءومىر بويىنا كوروناۆيرۋسقا قارسى يممۋنيتەت بەرەتىن ۆاكسينا جاسالىپ جاتىر

ونىڭ قۇرامىندا SARS-CoV-2 ۆيرۋسىنىڭ اقۋىزى بولادى

توكيو مەديسينا عىلىمدارى ينستيتۋتىنىڭ عالىمدار توبى ءومىر بويىنا كوروناۆيرۋستان قورعايتىن يممۋنيتەت قالىپتاستىراتىن ۆاكسينا جاساپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.

The Japan Times باسىلىمىنىڭ سەنبى كۇنى حابارلاۋىنشا، كلينيكالىق سىناقتار شامامەن 2023 جىلى باستالۋى مۇمكىن.

پروفەسسور مينينوري كوحاراي جەتەكشىلىك ەتەتىن ماماندار نەگىز رەتىندە 18 عاسىردا بريتاندىق دارىگەر ەدۆارد دجەننەر ويلاپ تاپقان قوراسانعا قارسى ۆاكسينانى الدى. ونىڭ قۇرامىندا ادامعا زيانى جوق سيىر شەشەگىنىڭ ۆيرۋسى بار. اتالعان ۆاكسينا ادامزاتتى امان الىپ قالعان.

جاپوندىق عالىمدار قوراسانعا قارسى ۆاكسينانىڭ رەكومبينانتتى ۆيرۋسىن جاساۋدى ويلاپ وتىر. ونىڭ قۇرامىندا SARS-CoV-2 ۆيرۋسىنىڭ اقۋىزى بولادى. ولاردىڭ ويىنشا، بۇل ءتاسىل كوروناۆيرۋستان ءومىر بويىنا قورعايتىن يممۋنيتەت قالىپتاستىرۋعا كومەكتەسەدى.

تىشقاندارعا قوراسانعا قارسى ۆاكسينانىڭ رەكومبينانتتى ۆيرۋسىنىڭ قولدانىلۋىمەن تاجىريبە جاسالدى، ناتيجەسىندە انتيدەنەلەر كورسەتكىشى جوعارى بولىپ، 20 ايدان اسا ۋاقىت ساقتالدى. وعان قوسا، 20 ايدان كەيىن قۇس تۇماۋى جۇقتىرىلعان تىشقاندار امان قالدى.

«مەن ادەنوۆيرۋس جانە رنق ۆاكسيناسى سياقتى ءتۇرلى ەكپەلەردىڭ تەحنولوگيالارىمەن جۇمىس ىستەپ كوردىم، الايدا قوراسانعا قارسى ۆاكسينا ۆيرۋسىنىڭ ۆەكتورىن قولداناتىن پرەپاراتتار ەڭ مىقتى بولىپ شىقتى»، - دەدى كوحارا.

ونىڭ ايتۋىنشا، اتالعان ۆاكسينانىڭ كىشىگىرىم جاناما اسەرلەرى بولادى، سونىمەن قاتار ولار تاسىمالداۋ مەن ساقتاۋ ءۇشىن ەرەكشە جاعدايدى قاجەت ەتپەيدى.