جاڭبىر كۇنى-تۇنى توقتامايدى.
جاپونيادا ءبىر جارىم ايعا سوزىلاتىن جاڭبىر ماۋسىمى باستالدى. بۇل اقپاراتتى ەل ۇكىمەتى رەسمي حابارلادى. ال ق ر سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى باتىرحان قۇرمانسەيىت كۇنشىعىس ەلىندەگى جاعداي تۋرالى ءوزىنىڭ facebook-تەگى پاراقشاسىندا باياندادى، دەپ حابارلادى Almaty-akshamy.kz Egemen.kz cىلتەمە جاساپ.
ارنايى ەلشىنىڭ ايتۋىنشا، بۇل ماۋسىم «ەلدەگى ەرەكشە مەزگىل» دەپ اتالۋىنىڭ ءوز سەبەبى بار. مۇندا ءبىر جارىم اي بويى جاڭبىر كۇنى-تۇنى توقتامايدى. سوندىقتان جاپونيانىڭ كەيبىر قالالارىندا اۋا ىلعالدانا تۇسەدى.
بۇل جاپون حالقى ءۇشىن ۇيرەنشىكتى جاعداي. سوندىقتان ولار «سۋيۋ» ماۋسىمىنا ارنايى دايىندالادى. جاز مەزگىلىمەن ىلەسە كەلگەن بۇلتتى كۇن شىلدەنىڭ شىلىڭگىر ىستىعى باستالعاندا اشىلادى. سوسىن عانا ءبىر جارىم اي بويى جاۋعان جاۋىن سۋى بۋعا اينالىپ، جەر قۇرعايدى. سالدارىنان اۋا تەمپەراتۋراسى جوعارىلاپ، اپتاپ ىستىق ورنايدى. وسىلايشا، جاپونيا حالقى ءبىراز سارساڭعا تۇسەدى.