ەكى ادامنىڭ ءبىر داۋىس بەرۋ كابيناسىنا كىرۋى، ەگەر وعان دالەلدى سەبەپتەر بولسا، ءتارتىپ بۇزۋشىلىق بولىپ تابىلمايدى. ماسەلەن، تۋىستارى كوزى ناشار كورەتىن ازاماتتارعا داۋىس بەرۋگە كومەكتەسۋى مۇمكىن. بۇل تۋرالى الماتى قالالىق رەفەرەندۋم وتكىزۋ جونىندەگى اۋماقتىق كوميسسياسىنىڭ ءتوراعاسى جاننا اسانوۆا مالىمدەدى.
«ءبىز سايلاۋشىلاردىڭ تىزىمنەن تابىلماۋىنىڭ سەبەپتەرىن انىقتادىق. اتاپ ايتقاندا، 99،9% جاعدايدا ادامدار جاي عانا تىزىمنەن شىعارىلعان. ايتالىق، ادام تۋىسقانىنىڭ ۇيىنە تىركەلدى، كەيىن پاتەر يەسى ونى تىركەۋدەن شىعارىپ جىبەرگەن (زاڭعا سايكەس، مەنشىك يەسى مۇنى ىستەي الادى). ال تىركەۋدەن شىعارىلعان ادام بۇل تۋرالى حاباردار بولماي شىعادى. ايتا كەتۋ كەرەك، 3384545 ءنومىرى ارقىلى تىركەلۋ تاريحىن باقىلاي الاسىز. جەكە تۇلعالاردىڭ مەملەكەتتىك دەرەكتەر بازاسىندا كوشى-قون بويىنشا بارلىق اقپارات بار»، – دەدى جاننا اسانوۆا.
ونىڭ ايتۋىنشا، مۇمكىندىگى شەكتەۋلى جاندار سەنىمدى ادامنىڭ كومەگىن پايدالانۋعا قۇقىلى. ماسەلەن، ءبىر كابينادا ەكى سايلاۋشىنىڭ بولعان وقيعا №529 سايلاۋ ۋچاسكەسىندە ورىن العان.
«بۇل جاعدايدا داۋىس بەرۋگە ەكى ادام كەلدى – ەرلى-زايىپتىلار. ولاردىڭ ءبىرى –سوقىر. ەكەۋى دە وسى اۋداندا تىركەلگەن. ەر ادام وزىنە سەنەتىن ادامنىڭ كومەگىن پايدالانۋ قۇقىعىن بەرەتىن نورمانى پايدالاندى. بۇل زاڭ بۇزۋشىلىق ەمەس»، – دەپ ءتۇسىندىردى جاننا اسانوۆا جاعدايعا قاتىستى،
«پەردەنىڭ اشىق بولۋى زاڭ بۇزۋشىلىق پا؟» دەگەن سۇراققا جاننا اسانوۆا مۇنداي تاجىريبە پاندەميا كەزىندە بولعانىن ايتتى. سايلاۋشى شىمىلدىقتى ءوز قالاۋى بويىنشا اشا الادى نەمەسە جابا الادى. بوس كابينادا شىمىلدىقتىڭ اشىق نەمەسە جابىق بولۋى بويىنشا ەشقانداي زاڭ بۇزۋشىلىقتار جوق.
ەسكە سالايىق، 1 ميلليون 126 مىڭ 854 الماتىلىق رەفەرەندۋمدا داۋىس بەرۋ قۇقىعىنا يە بولسا، 1388 ادام سىرتتاي داۋىس بەرۋ ارقىلى داۋىس بەرەدى.