جەكپە-جەك 10 راۋندقا جوسپارلانعان
ەرتەڭ، ياعني 21 قاراشادا لاس-ۆەگاستا (اقش) قازاقستاندىق بوكسشى جانىبەك ءالىمحان ۇلى (10-0، 6 كو) مەن فرانسيالىق حاسسان ندام نجيكام (38-5، 21 كو) تيتۋلدىق جەكپە-جەگى وتەدى. بوكسشىلاردىڭ كەزدەسۋى تاڭعى 08:00-گە جوسپارلانعان، دەپ حابارلايدى Almaty-akshamy.kz Express Qazaqstan-عا سىلتەمە جاساپ.
الىمحانۇلى-نجيكام جەكپە-جەگىنىڭ تىكەلەي كورسەتىلىمى نۇر-سۇلتان قالاسىنىڭ ۋاقىتىمەن 08:00-دە باستالادى. ونى تىكەلەي ەفيردە «Qazsport» تەلەارناسى كورسەتەدى.
جەكپە-جەك 10 راۋندقا جوسپارلانعان. بوكسشىلار ورتا سالماقتاعى WBO Global چەمپيونى اتاعىن ساراپقا سالادى.
جانىبەك ءالىمحان ۇلى ءوزىنىڭ سوڭعى جەكپە-جەگىن ماۋسىم ايىندا وتكىزگەنىن ەسكە سالا كەتەيىك. ول كەزدە ول ورتا سالماقتا الەم چەمپيونى بولعان امەريكالىق بوكسشى روب برانتتى (26-3، 18 كو) 8ء-شى راۋندا نوكاۋتقا جىبەرگەن ەدى. ال حاسسان ندام نجيكام شىلدە ايىندا بوكستاسىپ، ۆەنگريالىق گابور گوربيچتى (26-22-2، 16 كو) ۇپاي بويىنشا جەڭدى.