الەۋمەتتىك ماڭىزى بار ازىق-تۇلىك باعاسى باستى نازاردا
پرەمەر-مينيستر اسقار مامين ۇكىمەتتىڭ سيفرلىق كەڭسەسىندە ورتالىق مەملەكەتتىك ورگاندار باسشىلارىنىڭ جانە وڭىرلەر اكىمدەرىنىڭ قاتىسۋىمەن الەۋمەتتىك ماڭىزى بار ازىق-تۇلىك تاۋارلارىنىڭ (ءامات) جانە جانار-جاعارماي ماتەريالدارىنىڭ (ججم) باعالارىن رەتتەۋ ماسەلەلەرى جونىندە كەڭەس وتكىزدى، دەپ حابارلايدى Almaty-akshamy.kz.
قازىرگى جاعداي مەن اتقارىلىپ جاتقان جۇمىستار تۋرالى ساۋدا جانە ينتەگراسيا ءمينيسترى باقىت سۇلتانوۆ، اۋىل شارۋاشىلىعى ءمينيسترى ەربول قاراشوكەيەۆ، ەنەرگەتيكا ءمينيسترى ماعزۇم مىرزاعالييەۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين، شىعىس قازاقستان وبلىسىنىڭ اكىمى دانيال احمەتوۆ، جامبىل وبلىسىنىڭ اكىمى بەردىبەك ساپاربايەۆ، اقتوبە وبلىسىنىڭ اكىمى وڭداسىن ورازالين، پاۆلودار وبلىسىنىڭ اكىمى ءابىلقايىر سقاقوۆ جانە ت. ب. باياندادى.
وتكەن اپتادا قازاقستاندا الەۋمەتتىك ماڭىزى بار ازىق-تۇلىك تاۋارلارى باعاسىنىڭ جالپى ءوسۋ يندەكسى 0،0%-دى قۇرادى. قابىلدانعان شارالار ەسەبىنەن ءۇشىنشى اپتا قاتارىنان ءسابىز (-0،8%)، پياز (-0،7%)، ماكارون ءونىمى (روجكي)، كۇرىش جانە كارتوپ (-0،2%) باعاسىنىڭ تومەندەۋى بايقالادى. قالعان ونىمدەردىڭ باعالارى تۇراقتى. وڭىرلەردە «اينالىم سحەماسىن» قارجىلاندىرۋ 48،9 ملرد تەڭگەگە جەتتى. نىسانالى دەڭگەي 97،7%-عا قامتاماسىز ەتىلدى. «اينالىم سحەماسى» بويىنشا ءتيىمدى جۇمىس نۇر-سۇلتان، الماتى جانە شىمكەنت قالالارىندا، الماتى، شىعىس قازاقستان، باتىس قازاقستان، قوستاناي، سولتۇستىك قازاقستان جانە تۇركىستان وبلىستارىندا بايقالادى.
جۇرگىزىلىپ جاتقان جۇمىستاردىڭ تومەن دەڭگەيى قىزىلوردا جانە ماڭعىستاۋ وبلىستارىندا ساقتالىپ تۇر. قابىلدانعان شارالاردىڭ ارقاسىندا ججم نارىعىنداعى جاعداي تۇراقتاندى. بۇگىندە بارلىق ءموز تاۋلىك سايىنعى وندىرىسپەن جانە اشىق ءتۇستى مۇناي ونىمدەرىن ىشكى نارىققا جونەلتۋمەن شتاتتىق رەجيمدە جۇمىس ىستەپ جاتىر. بيىلعى 19 قاراشاداعى جاعداي بويىنشا مۇناي ونىمدەرىنىڭ جەتكىلىكتى جيىنتىق قورى – 200،6 مىڭ توننا بەنزين جانە 215،8 مىڭ توننا ديزەل وتىنى قالىپتاستىرىلدى، بۇل ەلدىڭ 15 تاۋلىكتىك قاجەتتىلىگىن وتەۋگە جەتكىلىكتى.
وتكەن اپتادا باسەكەلەستىكتى قورعاۋ جانە دامىتۋ اگەنتتىگى مونوپوليالىق جوعارى باعالاردى قويۋ بەلگىلەرى بويىنشا قاراعاندى وبلىسىنداعى قۇس فابريكاسىنا قاتىستى تەرگەۋ جۇمىستارىن باستادى. قاراعاندى، شىعىس قازاقستان، ماڭعىستاۋ وبلىستارى مەن نۇر-سۇلتان قالاسىنداعى تاۋىق جۇمىرتقاسى مەن قۇس ەتى نارىعى سۋبەكتىلەرىنە باعالىق ءسوز بايلاسۋ جانە ۇستەم جاعدايدى تەرىس پايدالانۋ بەلگىلەرىنىڭ بار ەكەندىگى تۋرالى 7 ەسكەرتۋ جىبەرىلدى. باتىس قازاقستان، قوستاناي، اتىراۋ جانە جامبىل وبلىستارىندا وندىرۋشىلەرمەن، كوتەرمە جەتكىزۋشىلەرمەن جانە ساۋدا جەلىلەرىمەن مونوپولياعا قارسى كومپلاەنستىڭ 14 اكتىسى جاسالدى.
جالپى رەسپۋبليكا بويىنشا مونوپولياعا قارسى كومپلاەنستىڭ 154 اكتىسى جاسالدى. پرەمەر-مينيستر ورتالىق مەملەكەتتىك جانە جەرگىلىكتى اتقارۋشى ورگاندارعا الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ جانە تومەندەتۋ، سونداي-اق ينفلياسيانىڭ جالپى دەڭگەيىن 8،5% شەگىندە ۇستاپ تۇرۋ جۇمىسىن جالعاستىرۋدى تاپسىردى. وڭىرلەردىڭ اكىمدىكتەرىنە ءوندىرىس پەن تۇتىنۋ تەڭگەرىمىن ەسكەرە وتىرىپ، تۇراقتاندىرۋ قورلارىندا جەتكىلىكتى قورلاردى قامتاماسىز ەتۋ، «اينالىم سحەماسى» بويىنشا قارجىلاندىرۋدى ۇسىنىلعان كولەمدەرگە دەيىن جەتكىزۋ، باعا بەلگىلەۋدىڭ بارلىق تىزبەگى بويىنشا دەلدالدىق سحەمالاردى تەكسەرەتىن وڭىرلىك كوميسسيالاردىڭ جۇمىسىن جانداندىرۋ تاپسىرىلدى.