جانىبەك ءالىمحان ۇلى كەلەسى جىلى ورتا سالماقتاعى تاعى ەكى چەمپيوندىق بەلبەۋگە تالاسۋى مۇمكىن. الەم چەمپيونىنىڭ قورجىنىندا ءقازىر كاسىپقوي بوكستان WBO جانە IBF نۇسقالارى بويىنشا چەمپيوندىق اتاق بار. Qazaqstan.tv-گە سۇحبات بەرگەن سپورتشىنىڭ سوزىنشە، پروموۋتەرلىك كومپانيالار قارسىلاستىرىمەن كەلىسسوز جۇرگىزىپ جاتىر. ءقازىر WBC چەمپيوندىق بەلبەۋى امەريكالىق دجەرمالل چارلودا بولسا، WBA تيتۋلى ەريسلادني لارانىڭ ەنشىسىندە، دەپ حابارلايدى اlmaty-akshamy.kz.
جانىبەك ءالىمحان ۇلى، WBO جانە IBF نۇسقالارى بويىنشا الەم چەمپيونى:
قارسىلاستار ءقازىر لارو مەن چارلوعا ۇسىنىس جاسالدى. كەلىسسوزدەر جۇرگىزىلىپ جاتىر. ءبىزدىڭ تيتۋلداردىڭ قورعاۋى بار. سول جاعىنان دا بىر-ەكى قارسىلاستار شىعادى. سونىڭ ءبارىن پروموۋتەرلىك كومپانيامەن، مەنەدجەرمەن كەلىسە وتىرىپ، ءبىر چەمپيون قارسىلاستى تاڭداپ، سونى ۇرامىز.
سپورتشى جاتتىعۋدى باستاۋ ءۇشىن قاڭتار ايىندا اقش-قا اتتانادى. جەكپە-جەك ناۋرىز ايىنىڭ اياعىندا نەمەسە ءساۋىردىڭ باسىندا بولۋى مۇمكىن. بوكسشىنىڭ سوزىنشە، شەتەلدىك كومپانيامەن كەلىسىمشارتقا سايكەس، ەشبىر تەلەارناعا شىعۋىنا بولمايدى ەكەن. دەسە دە، جانىبەك امەريكاعا اتتانار الدىندا ۇلتتىق ارناعا سۇحبات بەرىپ، جوسپارلارىمەن ءبولىستى. «Qazaq style» اتىمەن تانىمال كاسىپقوي بوكسشىعا كۇيشى ەرمەك قازمۇحامبەتوۆ اۆتورلىق «ەر جانىبەك» كۇيىن ارناپ، ساتتىلىك تىلەدى.