ونىڭ باستى سەبەبى – «دەلتا» شتاممى بولىپ وتىر.
الماتى قالاسىنىڭ باس سانيتارلىق دارىگەرى جانداربەك بەكشين وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين سۇحباتىندا قالامىز كوروناۆيرۋس بويىنشا 4-تولقىننىڭ الدىندا تۇرعانىن ايتتى، دەپ حابارلايدى Almaty-akshamy.kz.
«قاتاڭ شەكتەۋ رەجيمىن ەنگىزۋگە ءماجبۇر بولىپ وتىرمىز. كاسىپكەرلەرگە ايتارىم، ءبىزدى دە تۇسىنىڭىزدەر. بۇل «ءۇندى» شتامى باسقالارعا قاراعاندا اۋىر بولعاندىقتان، وسىنداي ۇيعارىمعا كەلدىك. ءبىز «جاسىل» ايماققا وتكەندە، اۋرۋ كورسەتكىشى تاۋلىگىنە 100 ناۋقاسقا دەيىن تومەندەدى، ءبىراق جاڭا شتامدارعا بايلانىستى اۋرۋ سانى كۇرت ءوستى. ءۇندى شتامىنىڭ باسقا مۋتاسيالانعان شتامدارمەن سالىستىرعاندا پاتوگەندىلىگى جوعارى. ينفەكسيانىڭ تارالۋىنا جول بەرمەۋ ءۇشىن قاتاڭ شارالاردى قابىلداۋعا ءماجبۇر بولدىق»، – دەدى جانداربەك بەكشين.