جانارماي كارتالارىن ساتۋ – الاياقتاردىڭ ءىسى

Instargam-دا جانارماي كارتالارىن ساتۋ تۋرالى حابارلاندىرۋلار كوپ.

ولاردىڭ ءبىرىن بەلگىلەنگەن باعامەن ساتىپ العاننان كەيىن، جانارماي قۇيۋ ستانسياسىندا اقشا تولەمەۋگە بولادى ەكەن. بۇل شىندىققا جاناسپايدى، دەپ حابارلايدى Almaty-akshamy.kz 

Stopfake.kz اقپاراتى بويىنشا، قولدانىستا جوق جانارماي كارتالارى العاش رەت 2021 جىلى رەسەيدە ساتىلا باستاعان. الاياقتار كارتالاردى ارنايى ازىرلەنگەن سايت ارقىلى ساتقان، ال سەنگىش كولىك جۇرگىزۋشىلەرى اقشانى ولاردىڭ شوتىنا اۋدارىپ وتىرعان.

قازاقستاندا سحەما ءسال باسقاشا. اۆتوكولىك جۇرگىزۋشىلەرىنە Helios، Qazaq Oil جانە «گازپروم» كومپانيالارىنىڭ جانارماي كارتالارى ۇسىنىلادى. ول قوستانايدا تىركەلگەن كومپانيانىڭ اتىنان Telegram ارقىلى ساتىلادى. الايدا، اشىق دەرەكتەرگە سۇيەنسەك، اتالعان فيرما ءورت سوندىرگىشتەردى تولتىرۋمەن اينالىسادى جانە جانارماي ساۋداسىنا ەشقانداي قاتىسى جوق.

سونىمەن قاتار، 2Gis قىزمەتىندە جانارماي كارتالارىن الۋ ءۇشىن كومپانيانىڭ كەڭسەسىنە حابارلاسىپ، ول جەردەن ەشكىمدى تاپپاعان ادامداردىڭ پىكىرلەرى جازىلعان. 
ايتا كەتەيىك، Helios، Qazaq Oil جانە «گازپروم» رەسمي پورتالدارىندا جانارماي كارتالارىن دەلدالدار ارقىلى ساتۋ تۋرالى ەشتەڭە ايتىلماعان. Qazaq Oil كارتالاردى كومپانيامەن شارت جاساسقاننان كەيىن رەسمي ساتۋ ورتالىقتارىندا 500 تەڭگەگە ساتىپ الۋدى ۇسىنادى.
Helios كومپانياسىنىڭ سايتىندا جانارماي كارتالارى تۋرالى اقپارات مۇلدەم جوق. ونىڭ ورنىنا كليەنتتەرگە ارنايى بونۋستىق كارتالاردى راسىمدەۋ ۇسىنىلادى.
«گازپروم» كومپانياسىندا كورپوراتيۆتىك كليەنتتەرگە ارنالعان جانارماي كارتالارى بار. ونى كومپانيامەن رەسمي كەلىسىمشارت جاساسقاننان كەيىن عانا ساتىپ الۋعا بولادى.

قورىتا ايتقاندا، جانارماي كارتالارىن ساتۋ جارناماسى – الاياقتاردىڭ ءىسى. كومپانيالاردىڭ جانارماي كارتالارى رەسمي بولىمدەردە ساتىلادى جانە ولاردى رەسمي كەلىسىمشارت جاسالعاننان كەيىن عانا ساتىپ الۋعا بولادى. قازنەتتە كارتالارى ساتىلىپ جاتقان كومپانيا مۇلدەم باسقا قىزمەتپەن اينالىسادى جانە ونىڭ كارتالاردى ساتۋعا ەشقانداي قاتىسى جوق.