ەلىمىزدە جاڭا وڭىرلەردىڭ قۇرىلۋىنا بايلانىستى جەكە جانە زاڭدى تۇلعالارعا بۇرىن بەرىلگەن قۇجاتتارىن قايتا رەسىمدەۋدىڭ قاجەتى جوق.
مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋى اياسىندا اباي، ۇلىتاۋ جانە جەتىسۋ وبلىستارىن قۇرۋ تۋرالى شەشىم قابىلداندى.
ق ر ادىلەت مينيسترلىگى تىركەۋ قىزمەتى جانە زاڭ قىزمەتتەرىن ۇيىمداستىرۋ دەپارتامەنتىنىڭ اتاپ وتۋىنشە، قولدانىستاعى زاڭنامانىڭ ەرەجەلەرىنە سايكەس بۇل رەفورمالار جىلجىمايتىن مۇلىككە جانە زاڭدى تۇلعالارعا قۇقىقتاردى تىركەۋ سالاسىندا بۇرىن بەرىلگەن قۇجاتتاردى قايتا رەسىمدەۋدى تالاپ ەتپەيدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جىلجىمايتىن مۇلىككە قۇقىقتاردى مەملەكەتتىك تىركەۋ تۋرالى» زاڭنىڭ 6-بابىنىڭ 2-تارماعىندا ەلدى مەكەندەر اتاۋىنىڭ، كوشەلەر اتاۋىنىڭ، سونداي-اق ۇيلەر مەن وزگە دە قۇرىلىستاردىڭ رەتتىك ءنومىرىنىڭ (مەكەنجايىنىڭ) وزگەرۋىن، كاداسترلىق نومىرلەردىڭ وزگەرۋىن تىركەۋ قازاقستان رەسپۋبليكاسىنىڭ اكىمشىلىك-اۋماقتىق قۇرىلىسىن رەفورمالاۋعا بايلانىستى قۇقىق يەلەنۋشىگە جۇكتەلمەيدى جانە وتەۋسىز جۇزەگە اسىرىلادى.
وسىلايشا، جاڭا وبلىستاردىڭ قۇرىلۋى، ەلدى مەكەندەردىڭ قايتا اتالۋى مەنشىك يەلەرىن قۇقىق بەلگىلەيتىن (مىسالى: ساتىپ الۋ-ساتۋ، سىيعا تارتۋ شارتى، پايدالانۋعا قابىلداۋ اكتىسى، اكىمدىكتىڭ قاۋلىسى جانە باسقالارى) جانە سايكەستەندىرۋ قۇجاتتارىنا (جەر ۋچاسكەسىنە اكتى، جىلجىمايتىن مۇلىك وبەكتىسىنە تەحنيكالىق پاسپورت) وسىنداي وزگەرىستەر ەنگىزۋ ءۇشىن تىركەۋشى ورگانعا جۇگىنۋگە مىندەتتەمەيدى. ەلدى مەكەن اتاۋىنىڭ وزگەرۋى جانە جىلجىمايتىن مۇلىك وبەكتىسى مەكەنجايىنىڭ باسقا دا دەرەكتەمەلەرى (كوشە اتاۋى، عيماراتتىڭ، ءۇي-جايدىڭ رەتتىك ءنومىرى) «مەكەنجاي تىركەلىمى» اقپاراتتىق جۇيەسىمەن ينتەگراسيالىق ءوزارا ءىس-قيمىل شەڭبەرىندە «جىلجىمايتىن مۇلىك تىركەلىمى» مەملەكەتتىك دەرەكقورىندا اۆتوماتتى تۇردە جاڭارتىلادى»، - دەپ اتاپ وتەدى دەپارتامەنتتەن.
ۆەدومستۆو مالىمەتىنشە، «قۇقىقتىق اكتىلەر تۋرالى» زاڭنىڭ 43-بابىنىڭ 3-تارماعىنا سايكەس ازاماتتارعا جاڭا مىندەتتەر جۇكتەيتىن نەمەسە ولاردىڭ جاعدايىن ناشارلاتاتىن نورماتيۆتىك قۇقىقتىق اكتىلەردىڭ كەرى كۇشى بولمايدى. وسىعان بايلانىستى زاڭدى تۇلعالاردىڭ وبلىستاردىڭ، ەلدى مەكەندەردىڭ بۇرىنعى اتاۋى كورسەتىلگەن رەسمي قۇجاتتارى ءوزىنىڭ زاڭدى كۇشىن جوعالتپايدى. جاڭا وبلىستاردىڭ قۇرىلۋى قۇرىلتاي قۇجاتتارىن (جارعىنى، ساتىپ الۋ-ساتۋ شارتتارىن جانە ت.ب.)، سونداي-اق ءموردى قايتا رەسىمدەۋ جونىندە ادىلەت ورگاندارىن حاباردار ەتۋ جونىندە زاڭدى تۇلعالاردىڭ وكىلدەرىنە مىندەت جۇكتەمەيدى.
ازاماتتىق حال اكتىلەرىن مەملەكەتتىك تىركەۋ تۋرالى كۋالىكتەر اكتىلىك جازبالارمەن دالمە-دال سايكەستەندىرىلىپ جازىلادى. جەرگىلىكتى جەرلەردىڭ اتاۋى سول كەزدە بولعان اكىمشىلىك-اۋماقتىق بولىنىسكە سايكەستەندىرىلىپ كورسەتىلەدى، ال مەملەكەتتىك تىركەۋ ورنى – وسى جەرگىلىكتى جەردە قازىرگى اكىمشىلىك ءبولىنىس بويىنشا قىزمەت كورسەتەتىن تىركەۋشى ورگان كورسەتىلەدى. قۇجاتتاردا ەلدى مەكەننىڭ بۇرىنعى اتاۋىن كورسەتۋ ولاردىڭ جارامسىزدىعىنا اكەپ سوقپايدى. قۇجاتتاردى اۋىستىرۋ ولاردىڭ جارامدىلىق مەرزىمى وتكەن جاعدايدا نەمەسە ولار جوعالعان جاعدايدا جۇزەگە اسىرىلادى.