جاڭا ءتىلدى ۇيرەنۋ جاسقا قارامايدى

وعان دالەل - 82 جاستاعى قاريا اعىلشىن ءتىلىن ۇيرەنىپ ءجۇر

كەنتاۋ قالاسىنىڭ تۇرعىنى قۇرمانبەك دايراباي قارتايدىم دەپ قاراپ وتىرعان جوق. كۇن سايىن قولىنا كىتاپ-داپتەرىن الىپ، اعىلشىن ءتىلىن ۇيرەنىپ ءجۇر. اپتاسىنا ءۇش رەت تىلدەردى وقىتۋ ورتالىعىنا بارىپ، ساباققا قاتىسادى.

وسى كەزگە دەيىن ول 1500 ءسوز ۇيرەنىپتى. ءبىرىنشى دەڭگەيدەن وتكەن ول ارى قاراي دا ءتىل ۇيرەنۋدى جالعاستىرۋ ويىندا بار، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ءتىل ۇيرەنۋ - بۇگىنگى كۇننىڭ باستى تالابى. ەگەر قىزىعۋشىلىق بولسا، ءبىلىم الۋ جاس تالعامايدى. ۇيدە نەمەرەلەرىم بىر-بىرىمەن اعىلشىنشا سويلەسەدى. ونى مەن تۇسىنبەيمىن. سوندىقتان تىلگە دەگەن قىزىعۋشىلىعىم وياندى. اكىمدىكتە تەگىن ۇيرەتەتىن مەكەمە دە بار ەكەن. باردىم. العاشقى كۋرستى ءبىتىردىم. ءقازىر ۇيدە نەمەرەلەرىممەن اعىلشىنشا سويلەسەتىن كەزدەرىمىز كوپ»، - دەيدى قاريا.

كەنتاۋ قالالىق تىلدەردى وقىتۋ ورتالىعىنىڭ ديرەكتورى اقمارال وتەپبايەۆا قۇرمانبەك اقساقالدىڭ ۇزدىك ءتىل ۇيرەنۋشى بولعاندىعىن ايتادى.

«اتامىز ساباققا وفلاين قاتىسىپ، اعىلشىن ءتىلىن نولدەن باستاپ ۇيرەندى. قاراپايىم فرازالار مەن ەرەجەلەردى، وقۋ جانە جازۋدى مەڭگەردى. ءقازىر اعىلشىنشا قويىلعان سۇراقتارعا ءوز بەتىنشە جاۋاپ بەرە الادى. ول كىسى ءتىل ۇيرەنۋشىلەردىڭ ىشىندەگى ەڭ بەلسەندىسى، ءتارتىپتىسى بولا ءبىلدى. اپتاسىنا ءۇش رەت بولاتىن ساباقتان بىردە-بىر رەت قالعان ەمەس»، - دەيدى ول.

اقساقال «ا-1 – beginner» دەڭگەيىن تولىق مەڭگەرىپ، سەرتيفيكات العان. اعىلشىن تىلىندەگى سوزدەردى قۇراپ وقي الادى. ەندى كەلەسى كەزەڭ بويىنشا ساباقتىڭ باستالۋىن كۇتىپ ءجۇر.